Ibuuku lya Bubili Ilya kwa Samwele 11:1-27
11 Pa kutendeka kwa mwaka,* ilyo imfumu shiya mu kulwa inkondo, Davidi atumine Yoabu na babomfi bakwe na bashilika abena Israele bonse pa kuti bayelofya abena Amone kabili baileshinga Raba,+ lelo Davidi ena ashele mu Yerusalemu.+
2 Bushiku bumo mu nshita ya cungulo* Davidi alimine pa busanshi bwakwe, aya ale-endaukako pa mutenge wa ng’anda ya mfumu.* Ilyo ali pa mutenge amwene umwanakashi alesamba, kabili uyu mwanakashi ali umusuma nga nshi.
3 Davidi atumine uwakuyafwailisha pali uyu mwanakashi, kabili aishilemweba ati: “Ni Bati-sheba+ umwana wa kwa Eliamu,+ umukashi wa kwa Uria+ umwina Hiti.”+
4 Lyena Davidi atumine abakuyamusenda.+ E ico alishile kabili Davidi alileele na Bati-sheba.+ (Aleele nankwe ninshi aleisangulula ku kukowela kwakwe.*)+ Pa numa alibwelelemo ku mwakwe.
5 Bati-sheba alimite, kabili atumiine Davidi amashiwi ya kuti: “Ndi ne fumo.”
6 E lyo Davidi atumine amashiwi kuli Yoabu ati: “Eba Uria umwina Hiti ese kuno.” E ico Yoabu atumine Uria kuli Davidi.
7 Ilyo Uria aishile, Davidi amwipwishe ifyo Yoabu ali, ifyo abashilika bali ne fyo inkondo yale-enda.
8 Lyena Davidi aebele Uria ati: “Kabiye ku mobe uyetuushako.”* Ilyo Uria afumine mu ng’anda ya mfumu, imfumu yalimutumiine ubupe.*
9 Lelo Uria asendeme pa mwinshi wa ng’anda ya mfumu pamo na babomfi ba kwa shikulu wakwe bonse, kabili taile ku ng’anda ku mwakwe.
10 E ico kwali abaebele Davidi abati: “Uria taile ku ng’anda ku mwakwe.” E lyo Davidi aipwishe Uria ati: “Bushe te kutali wafumine? Cinshi ushailiile ku ng’anda ku mobe?”
11 Uria ayaswike Davidi ati: “Icipao+ na bashilika ba bena Israele e lyo na bashilika ba bena Yuda bekala mu nsakwe, kabili shikulu Yoabu na babomfi ba kwa shikulu bapanga inkambi panse pa mpanga. E ico cinshi ine ningaila ku ng’anda ku mwandi mu kulya, mu kunwa na mu kulaala no mukashi wandi?+ Na pali imwe bene,* nshacite icintu ca musango uyu!”
12 Lyena Davidi aebele Uria ati: “Ikala kuno na lelo line, mailo e lyo nkakuleka ukaye.” E ico Uria aikele mu Yerusalemu pali bulya bushiku no bwakonkelepo.
13 Lyena Davidi atumine abakuyamwita pa kuti ese alye no kunwa nankwe, kabili amulengele akolwa. Na lyo line ilyo afumineko icungulo, ailesendama pa busanshi bwakwe pamo na babomfi ba kwa shikulu wakwe, taile ku ng’anda ku mwakwe.
14 Ulucelo Davidi alembeele Yoabu kalata kabili apeele Uria pa kuti atwale.
15 Alembele muli kalata ati: “Ubike Uria ku ntanshi uko inkondo ikosele sana, e lyo imwe mubwelele ku numa, pa kuti bamwipaye.”+
16 Yoabu alibikile sana amano ku fyalecitika mu musumba, kabili abikile Uria apo aishibe ukuti e pali abashilika ba maka.
17 Abaume ba mu musumba balifumine kabili ilyo balwile na Yoabu, ababomfi ba kwa Davidi bamo balifwile, kabili pa bafwile pali na Uria umwina Hiti.+
18 Nomba Yoabu atumine uwakuyaeba Davidi ifyacitike mu nkondo.
19 Aebele uo atumine ati: “Nga wapwisha ukweba imfumu fyonse ificitike mu nkondo,
20 imfumu nalimo ileyakalipa, kabili ileyakweba aiti, ‘Cinshi mwailile mu kulwila mupepi sana no musumba? Bushe tamwaishibe ukutila kuti bamulashila imifwi pa muulu wa cibumba?
21 Nani waipeye Abimeleke+ umwana wa kwa Yerubeshete?+ Bushe te mwanakashi uwali pa muulu wa cibumba uwamupooseele ilibwe lya kupelelako ica kuti no kufwa afwa mu Tebese? Cinshi mwailile mupepi sana ne cibumba?’ Lyena ukalande auti, ‘Umubomfi wenu Uria umwina Hiti na o nafwa.’”
22 E ico inkombe yalile, kabili yaile-eba Davidi fyonse ifyo Yoabu ayebele.
23 Lyena inkombe yaebele Davidi aiti: “Abaume babo balitucilile amaka, kabili balitukonkele mu mpanga; lelo twababweseshe ku mpongolo ya musumba.
24 Kabili abali pa muulu wa cibumba balashile ababomfi benu imifwi, kabili ababomfi ba mfumu bamo balifwa; na Uria umubomfi wenu umwina Hiti alifwa.”+
25 E lyo Davidi aebele inkombe ati: “Uye-eba Yoabu auti, ‘Wisakamana pa fyacitike, pantu ulupanga talusala pa kwipaya. Sansa umusumba na maka yobe yonse kabili uucimfye.’+ Kabili umukoseleshe.”
26 Ilyo umukashi wa kwa Uria aumfwile ukuti umulume wakwe alifwa, atampile ukuloosha umulume wakwe.
27 Ilyo fye inshita ya kuloosha yapwile, Davidi atumine abakuyamusenda. Ilyo bamuletele ku ng’anda ku mwakwe, aishileba umukashi wakwe,+ kabili amufyalile umwana umwaume. Lelo ifi Davidi acitile fyalikalifye sana* Yehova.+
Amafutunoti
^ E kutila pa mwela, mu Israele ici iciputulwa ca mwaka caletendeka mu March nelyo mu April.
^ Nelyo “Icungulo kasuba.”
^ Nelyo “isano.”
^ Kuti yapilibula no kuti ninshi aleisangulula ku makowesha ya ku mweshi.
^ Mu ciHebere, “uyesamba amakasa.”
^ Nelyo “icipande ca mfumu,” e kutila icipande ico uwaleita umweni aletumina umweni uwacindama uo etile.
^ Nelyo “na pali umweo wenu.”
^ Mu ciHebere, “fyalibipile mu menso ya kwa.”
