Ibuuku lya Bubili Ilya kwa Samwele 15:1-37
15 Pa numa ya ifi, Abishalomu apangiishe iceleta, ashitile na bakabalwe kabili akwete abaume 50 aba kuti balebutuka pa ntanshi yakwe.+
2 Abishalomu alecelela ukuyaiminina mu mbali ya musebo wa ku mpongolo ya musumba.+ Nomba nga kwaisa umuntu uuli no mulandu wa kuti imfumu ipingule,+ Abishalomu alemwita kabili alemwipusha ati: “Wafuma ku musumba nshi?” na o aleasuka ati: “Umubomfi wenu afumine ku mukowa umo pa mikowa ya kwa Israele.”
3 Abishalomu alemweba ati: “Wamona, umulandu obe uli fye bwino, lelo ku mfumu takwaba nangu umo uwa kukutika umulandu obe.”
4 Abishalomu alebeba ati: “Kanshi nga nine basontele ukuba kapingula mu calo! Lyena umuntu onse uuli no mulandu nangu uulefwaya ukumupingwilako umulandu nga aisa kuli ine, nga naleba no mulinganya pa kumupingula.”
5 Kabili umuntu nga apalama kuli ena pa kuti amufukamine, aletambika ukuboko kwakwe no kumwikata e lyo amutomona.+
6 Ifi fine e fyo Abishalomu alecita abena Israele bonse abaleya ku mfumu pa kuti ibapingule. E fyo Abishalomu aleongola imitima ya bena Israele.+
7 Pa mpela ya myaka 4,* Abishalomu aebele imfumu ati: “Lekeni nje ku Hebrone,+ ndeyafikilisha umulapo wandi uo nalapile kuli Yehova.
8 Pantu umubomfi wenu alapile umulapo+ ilyo aleikala mu Geshuri+ mu Siria uwa kuti: ‘Nga ca kuti Yehova ambwesesha ku Yerusalemu, nkatuula ilambo* kuli Yehova.’”
9 E ico imfumu yamwebele aiti: “Wende umutende.” Na o alimine aya ku Hebrone.
10 Nomba Abishalomu atumine abaume mu bumfisolo aba kuyaeba abantu mu mikowa yonse iya bena Israele ati: “Nga mwaumfwa fye intandala yalila, mubilishe amuti, ‘Abishalomu aba imfumu mu Hebrone!’”+
11 Kwali abaume 200 abaile kulya na Abishalomu abo aitile, kabili ilyo baleya tabaishibe nangu cimo pa fyalecitika.
12 Kabili ilyo Abishalomu atuulile amalambo, atumine abakuyaita Ahitofele+ umwina Gilo, uwa ku musumba wa Gilo+ uwali impanda mano ya kwa Davidi.+ Amapange ya kwa Abishalomu yalekoselako fye, kabili abantu abalemutungilila balefulilako.+
13 E lyo kwaishile uwaebele Davidi ati: “Abaume abena Israele batemenwe Abishalomu.”
14 Ilyo line fye Davidi aebele ababomfi bakwe bonse abo ali nabo mu Yerusalemu ati: “Imeni, natubutuke,+ pantu tatwapusuke kuli Abishalomu! Angufyanyeni pantu nga atusanga alatucimfya kabili alaipaya bonse mu musumba ku lupanga!”+
15 E lyo ababomfi ba mfumu baebele imfumu abati: “Fyonse ifyo shikulu imfumu yalatweba ukuti tucite, e fyo fwe babomfi benu twalacita.”+
16 E ico imfumu yalifumine kabili aba mu ng’anda ya iko bonse bali-ikonkele, lelo yashile bakanakashi ba iko 10+ pa kuti balesunga ing’anda.*
17 Kabili imfumu yaleya fye, ninshi na bantu bonse baleikonka, e lyo bonse baileiminina pa Bete-merhaki.
18 Ababomfi ba iko bonse abo yaile nabo na bena Kerete bonse, abena Pelete+ bonse na bena Giti,+ e kutila abaume 600 abakonkele imfumu ukufuma ku Gati,+ balepita pa ntanshi ya iko ilyo yalebaceeceeta.
19 Lyena imfumu yaebele Itai+ umwina Giti aiti: “Cinshi na iwe uletukonkela? Bwelelamo uleikala ne mfumu iipya, pantu uli mulebeshi, kabili wafulumuka fye mu calo cobe.
20 Waishile fye mailo, kabili lelo nkusende ule-endauka na ifwe, indeya na iwe lyonse ilyo mfwile ukuya na konse uko mfwile ukuya? Bwelelamo, senda na bamunonko bonse, kabili Yehova engakulanga ukutemwa ukushipwa kabili engaba ne cishinka kuli iwe!”+
21 Lelo Itai ayaswike imfumu ati: “Na pali Yehova, na pali shikulu imfumu, konse ukukaba shikulu imfumu, uko kwine e kukaba no mubomfi wenu, ninjipekanya no kufwila pamo na imwe!”+
22 E lyo Davidi aebele Itai+ ati: “Kabiye wabuke umupokapoka.” E ico Itai umwina Giti, na baume bakwe bonse pamo na bana balyabwike.
23 Abantu bonse mu calo balelila imisowa ilyo aba abantu bonse baleabuka, kabili imfumu yaiminine mu mbali ya Mupokapoka wa Kidrone;+ abantu bonse baleabukila ku musebo uwalola ku matololo.
24 Sadoke+ na o e ko ali pamo na bena Lebi+ bonse abasendele icipao+ ca cipangano ica kwa Lesa wa cine;+ kabili batekele Icipao ca kwa Lesa wa cine panshi; lyena Abiatari+ apaleme ku cipao mpaka abantu bonse ba-abuka ukufuma mu musumba.
25 Lelo imfumu yaebele Sadoke aiti: “Bwesesha Icipao ca kwa Lesa wa cine ku musumba.+ Yehova nga atemwa, na ine wine akambwesha kabili akaleka nkamone Icipao ne cifulo ca ciko.+
26 Lelo nga alanda ukuti, ‘Nshikutemenwe,’ ninshi akancite ifyo alefwaya.”
27 Imfumu yaebele Sadoke shimapepo ati: “Bushe te iwe we wiluka ifimonwa?+ Bweleleni ku musumba umutende, kabili muleya na bana benu abaume babili, Ahimaasi umwana obe na Yonatani+ umwana wa kwa Abiatari.
28 Moneni nkalolela pa fyabu fya mumana wa Yordani mu matololo mpaka mukanjishibishe.”+
29 E ico Sadoke na Abiatari babweseeshe Icipao ca kwa Lesa wa cine ku Yerusalemu, kabili e ko baikele.
30 Ilyo Davidi alenina Ulupili lwa Miolife,+ alelila ninshi nafimba na ku mutwe; kabili tafwele indyato. Abantu bonse abali nankwe nabo balifimbile ku mitwe, kabili balelila ilyo balenina.
31 Lyena kwali abaebele Davidi abati: “Ahitofele ali pa bantu abaumana akapi+ na Abishalomu.”+ E lyo Davidi atile: “Mwe Yehova,+ lengeni amano ayo Ahitofele alebapanda bayamone ngo buwelewele!”+
32 Ilyo Davidi afikile pa muulu apo abantu balekontamina Lesa, Hushai+ umwina Ariki+ ali palya pene pa kuti amonane nankwe, ninshi nalepula no mwingila wakwe kabili ali ne loba pa mutwe.
33 Lelo Davidi amwebele ati: “Nga waya na ine, ukayaba icisendo kuli ine.
34 Lelo nga wabwelela ku musumba kabili wayaeba Abishalomu auti, ‘Ndi mubomfi wenu mwe mfumu. Kale nali umubomfi wa kwa shinwe, nomba ndi mubomfi wenu.’+ Lyena kuti wamfulunganishishako amano ayo Ahitofele alebapanda.+
35 Nga wabwelelamo, ukayasanga Sadoke na Abiatari bashimapepo. Ulingile ukulaeba Sadoke na Abiatari bashimapepo fyonse ifyo ukalaumfwa mu ng’anda ya mfumu.+
36 Mona! Kulya bali na bana babo babili, Ahimaasi+ umwana wa kwa Sadoke na Yonatani+ umwana wa kwa Abiatari. Aba bene e bo mwingatuma ukwisanjeba fyonse ifyo mukomfwa.”
37 E ico Hushai cibusa wa kwa Davidi+ afikile mu musumba ninshi e lyo Abishalomu aleingila mu Yerusalemu.
Amafutunoti
^ Nelyo kuti yapilibula no kuti, “imyaka 40.”
^ Nelyo “nkapepa.” Mu ciHebere, “nkabombela.”
^ Nelyo “isano.”
