Ibuuku lya Bubili Ilya kwa Samwele 17:1-29
17 Lyena Ahitofele aebele Abishalomu ati: “Mukwai lekeni nsale abaume 12,000, aba kuti nje nabo mu kusansa Davidi mu nshita ya bushiku.
2 Ndeyafika apo ali ninshi nanaka icine cine kabili natompoka amaboko.+ Ndeyamutiinya kabili abantu bonse abo ali nabo balayafulumuka. Nga bafulumuka nalayaipaya fye imfumu yeka.+
3 Lyena nkabwesesha abantu bonse kuli imwe. Ifikacitikila umuntu uo mulefwaya, e fikalenga abantu bonse bakabwele nelyo bekabwela. Lyena abantu bonse bakaba aba mutende.”
4 Abishalomu na bakalamba ba bena Israele bonse balitemenwe ifyo Ahitofele alandile.
5 Lelo Abishalomu atile: “Iteni Hushai+ umwina Ariki, twise tumfwe ifyo na o alaisalandapo.”
6 E ico Hushai aingile umwali Abishalomu. Lyena Abishalomu amwebele ati: “Ifi ne fi e fyo Ahitofele alandile. Bushe tucite ifyo alandile? Nga te ifyo, twebe ifyo twalacita.”
7 E lyo Hushai aebele Abishalomu ati: “Amano ayo Ahitofele amupandile uno muku tayaweme!”+
8 Hushai alandile no kuti: “Imwe mwalishiba bwino ukuti shinwe na bantu bakwe ba maka,+ kabili nabakalipa kwati ni bere uulufishe abana mu mpanga.+ Na kabili shinwe mushilika wa nkondo,+ kabili talaale apo abantu bakwe balelaala.
9 Fino tulelanda nafisama mu lucengo* nangu ku ncende imbi;+ kabili nga e wabalilapo ukubasansa, abakomfwako bakatila, ‘Abantu abalekonka Abishalomu babacimfya!’
10 Nangu fye muntu uwashipa nge nkalamo*+ akatutuma ku mulandu wa mwenso; pantu abena Israele bonse balishiba ukuti shinwe wa maka.+ Balishiba no kuti abaume abo ali nabo balishipa.
11 Ine ndemupanda amano ya kuti: Lekeni abena Israele bonse ukutendekela ku Dani ukufika ku Beere-sheba+ bese balongane kuno, bafule ngo mucanga wa mu lulamba lwa bemba,+ kabili imwe bene nimwe mufwile ukubatungulula ku nkondo.
12 Tukayamusansa konse uko tukamusanga, kabili tukamuwapo nga filya fine umume uwa pa mushili; lyena tapakabe nangu umo uukapusuka, ena nelyo umo pa baume bonse abo ali nabo.
13 Nga ca kuti akayafisama mu musumba, abena Israele bonse bakaya ne ntambo kabili tukayakuulila ifibumba fya musumba mu mupokapoka ica kuti muli uyo musumba tamwakashale nangu kalibwe.”
14 Lyena Abishalomu na baume bonse aba mu Israele batile: “Amano ayo Hushai umwina Ariki atupanda yawama+ ukucila ayo Ahitofele atupandile!” Yehova alefwaya ukufulunganya amano ayo Ahitofele abapandile+ nangu ca kuti yali mano ayasuma, pa kuti Yehova alenge ifyabipa ficitikile Abishalomu.+
15 Pa numa Hushai aebele Sadoke na Abiatari+ bashimapepo ati: “Ifi ne fi e fyo Ahitofele aebele Abishalomu na bakalamba ba mu Israele pa kubapanda amano, kabili ifi ne fi e fyo ine mbapandile amano.
16 Nomba angufyanyeni ukutuma abakuyacenjesha Davidi abati, ‘Buno bushiku mwi-ikala mu fyabu* fya mu matololo ya Yordani, lelo mwabuke, pantu nga tamwayabuke, nalimo imfumu na bantu bonse abo ili nabo kuti baloba.’”+
17 Yonatani+ na Ahimaasi+ baleikala mu Ene-rogele;+ e ico umubomfi umukashana alilebeba kabili nabo baile-eba Imfumu Davidi, pantu tabalefwaya abantu babamone pa kwingila mu musumba.
18 Lelo umulumendo umo alibamwene, kabili aile-eba Abishalomu. E ico bonse babili balyangufyenye ukuya kabili bailefika ku ng’anda ya muntu umo mu Bahurimu,+ uwali ne cishima mu lubansa lwakwe. Lyena baingile mu cishima,
19 kabili umukashi wa uyo muntu alikupike pa cishima, e lyo abikapo ifyo atwile. Takwali nangu umo uwaishibe.
20 Ilyo ababomfi ba kwa Abishalomu bafikile pa ng’anda ya uyu mwanakashi, bamwipwishe abati: “Ahimaasi na Yonatani bali kwi?” Umwanakashi abaswike ati: “Bacipita pano balungeme ku mumana.”+ Lyena aba abaume batendeke ukubafwaya lelo tababasangile, e ico babweleelemo ku Yerusalemu.
21 Ilyo balya baume babwelelemo, Ahimaasi na Yonatani balifumine mu cishima bayaeba Imfumu Davidi abati: “Imeni kabili angufyanyeni ukwabuka umumana, pantu ifi ne fi e fyo Ahitofele apangile ukumucita.”+
22 Ilyo line Davidi na bantu bonse abo ali nabo balimine ba-abuka na Yordani. Ilyo bwaleca, ninshi bonse nabaabuka Yordani.
23 Ilyo Ahitofele amwene ukuti tabakonkele amano ayo abapandile, aninine pa mpunda, aya na ku ng’anda yakwe mu musumba wakwe.+ Pa numa ya kweba aba mu ng’anda yakwe ifya kucita,+ ali-ikulike.+ E fyo afwile kabili bamushiikile mu nshiishi ya fikolwe fyakwe.
24 Davidi ena aile ku Mahanaimu,+ e lyo Abishalomu ayabwike Yordani pamo na baume bonse abena Israele.
25 Pa cifulo ca kwa Yoabu+ uwaleangalila abashilika, Abishalomu apyanikepo Amasa.+ Amasa ali mwana wa mwina Israele, ishina lya uyu mwaume ali ni Itra uwaleele na Abigaili+ umwana mwanakashi wa kwa Nahashi, nkashi nankwe wa kwa Seruya, nyina wa kwa Yoabu.
26 Abena Israele na Abishalomu bapangile inkambi mu citungu ca Gileadi.+
27 Ilyo Davidi afikile fye ku Mahanaimu, Shobi umwana wa kwa Nahashi uwa ku Raba+ ya bena Amone, Makiri+ umwana wa kwa Amiele uwa ku Lo-debari, na Barsilai+ umwina Gileadi uwa ku Rogelimu
28 baletele ifya kulaalapo, imbale shafonka, inongo, ingano, barle, ubuunga bwa ngano, ingano ishasalulwa, cilemba, ilanda, ingano ishauma,
29 ubuci, impaanga no mukaka uwatikama.* Ifi fyonse ifya kulya baleteele Davidi na bantu abo ali nabo pa kuti balye,+ pantu batile: “Abantu mu matololo bali ne nsala, nabanaka kabili bali ne cilaka.”+
Amafutunoti
^ Nelyo “mu cilindi; umuyenge.”
^ Mu ciHebere, “uwakwata umutima ngo wa nkalamo.”
^ Nelyo kuti lyapilibula no kuti, “amalungu.”
^ E kutila Bata.