Ibuuku lya Bubili Ilya kwa Samwele 2:1-32
2 Pa numa, Davidi aipwishe Yehova+ ati: “Bushe nje ku musumba umo pa misumba ya kwa Yuda?” Yehova amwebele ati: “Kabiye.” Lyena Davidi aipwishe ati: “Ni ku musumba nshi nalaya?” Lesa amwaswike ati: “Kabiye ku Hebrone.”+
2 E ico Davidi alile pamo na bakashi bakwe babili, Ahinoamu+ umwina Yesreele na Abigaili+ uwafwililwe umulume wakwe Nabali umwina Karmele.
3 Davidi alisendele na baume abo ali nabo,+ cila muntu ali na ba mu ng’anda yakwe, kabili baileikala mu misumba iyali mupepi na Hebrone.
4 Lyena abaume ba mu mukowa wa kwa Yuda balishile kabili basubile Davidi pa kuti abe imfumu ya ba mu mukowa wa kwa Yuda.+
Baebele Davidi abati: “Abena Yabeshe-gileadi e bashiikile Shauli.”
5 E ico Davidi atumine aba kuyaeba abena Yabeshe-gileadi ati: “Yehova amupaale, pantu filya mwashiikile shikulwinwe Shauli,+ mwamulangile ukutemwa ukushipwa.
6 Yehova engamulanga ukutemwa ukushipwa kabili engaba ne cishinka kuli imwe. Na ine wine nkaba ne cikuuku kuli imwe pa mulandu ne fyo mwacitile.+
7 Nomba amaboko yenu yakose kabili mube abashipa, pantu shikulwinwe Shauli alifwa, kabili aba mu mukowa wa kwa Yuda nabansuba pa kuti imbe imfumu yabo.”
8 Pali iyi nshita ninshi Abnere+ umwana wa kwa Nere umukalamba wa bashilika ba kwa Shauli alitwala Ishiboshete,+ umwana wa kwa Shauli ku Mahanaimu+
9 kabili ninshi alimusonta ukuba imfumu ya bena Gileadi,+ abena Ashere, abena Yesreele,+ abena Efraimu,+ abena Benjamini na bena Israele bonse.
10 Ishiboshete umwana wa kwa Shauli, ali ne myaka 40 ilyo atendeke ukuteka abena Israele, kabili atekele pa myaka ibili. Lelo aba mu mukowa wa kwa Yuda bena baletungilila Davidi.+
11 Davidi ali imfumu ya ba mu mukowa wa kwa Yuda mu Hebrone pa myaka 7 ne myeshi 6.+
12 Mu kupita kwa nshita, Abnere umwana wa kwa Nere na babomfi ba kwa Ishiboshete, umwana wa kwa Shauli, bafumine ku Mahanaimu+ baya ku Gibeone.+
13 Yoabu+ umwana wa kwa Seruya+ na babomfi ba kwa Davidi nabo baile ku cishiba ca Gibeone, kabili e ko bailekumanina nabo. Ibumba limo lyaikele kuli luno lubali lwa cishiba e lyo ibumba limbi lyaikele kuli lulya lubali.
14 Abnere asukile aeba Yoabu ati: “Leka abalumendo beme, balwe* pa menso yesu.” Yoabu na o amwebele ati: “Nabeme.”
15 E ico balimine kabili pe bumba lya kwa Ishiboshete umwana wa kwa Shauli basalilepo abalumendo abena Benjamini 12 aba kulwa na balumendo 12 abo basalile pa babomfi ba kwa Davidi.
16 Baikatene ku mitwe kabili cila muntu alashile umunankwe ulupanga mu lubafu, kabili bonse balifwile. E ico cilya cifulo icaba mu Gibeone bacinike abati Helkati-hasurimu.
17 Inkondo yalikosele sana bulya bushiku, kabili ababomfi ba kwa Davidi basukile bacimfya Abnere na bena Israele.
18 Abana ba kwa Seruya+ batatu nabo e ko bali, e kutila Yoabu,+ Abishai+ na Asaele;+ kabili Asaele alebutukisha nga filya impombo ibutukisha.
19 Asaele apepeke Abnere, kabili alemukonka fye ukwabula ukupaatukila ku kulyo nelyo ku kuso.
20 Ilyo Abnere acebukile ku numa, aipwishe Asaele ati: “Bushe niwe Asaele?” na o amwaswike ati, “Nine.”
21 Lyena Abnere amwebele ati: “Paatukila ku kulyo nangu ku kuso wikatepo umo pa balumendo, kabili umupoke fyonse ifyo akwete.” Lelo Asaele talefwaya ukuleka ukumupepeka.
22 E ico Abnere aebele Asaele na kabili ati: “Leka ukumpepeka, nga te ifyo nalakwipaya. Bushe munonko Yoabu akamona shani nga nakwipaya?”
23 Lelo talefwaya ukuleka ukumupepeka, e ico Abnere amulashile ifumo cimfutyanuma+ mu lufumo ica kuti lyapulile na ku numa; kabili apo pene e po awilile no kufwa afwa. Bonse abalepita apo Asaele afwilile, baleiminina.
24 Lyena Yoabu na Abishai bakonkele Abnere. Ilyo akasuba kalewa, bafikile pa kapili ka Ama, akaloshanya na Gia mu nshila ya ku matololo ya Gibeone.
25 Kabili abena Benjamini balongene ku numa ya kwa Abnere, kabili bapangile ibumba limo, e lyo baiminina pa muulu wa kapili kamo.
26 Lyena Abnere abilikishe Yoabu ati: “Bushe tukatwalilila fye ukulaipayana? Bushe tawishibe ukuti ifikafumamo fikabipa? Ni lilali ukeba abantu ukuti baleke ukukonka bamunyinabo?”
27 E lyo Yoabu amwaswike ati: “Na pali Lesa wa cine, aubula kulanda, abantu nga bacitwalilila fye ukukonka bamunyinabo mpaka ulucelo.”
28 Nomba Yoabu alishishe intandala, kabili abaume abo ali nabo balilekele ukukonka abena Israele, e fyo balekele ukulwa.
29 Lyena Abnere na baume abo ali nabo bapitile mu Araba+ ubushiku bonse kabili ba-abwike Yordani, e lyo bapita mu mukonko basuka bafika na ku Mahanaimu.+
30 Ilyo Yoabu abwelele mu kukonka Abnere, alonganike abantu bonse. Pa babomfi ba kwa Davidi paafwile Asaele e lyo na bambi 19.
31 Lelo ababomfi ba kwa Davidi balicimfishe abena Benjamini na baume ba kwa Abnere, kabili baipeyepo abaume 360.
32 Basendele Asaele+ bayamushiika mu nshiishi ya kwa wishi iyaba mu Betelehemu.+ Lyena Yoabu na baume bakwe baendele ubushiku bonse, kabili bwabacelele mu Hebrone.+
Amafutunoti
^ Nelyo “bacimfyanye.”