Ibuuku lya Bubili Ilya kwa Samwele 20:1-26
20 Nomba kwali umwaume icinangwa, ishina lyakwe ali ni Sheba,+ umwana wa kwa Bikri umwina Benjamini. Alishishe intandala+ kabili atile: “Tatuli bantu ba kwa Davidi, kabili tapali nangu cimo ico tukanonkelamo mu mwana wa kwa Yese.+ Mwe bena Israele, cila muntu aleya mu kupepa balesa bakwe!”*+
2 E lyo abaume abena Israele bonse balekele ukukonka Davidi kabili batendeke ukukonka Sheba umwana wa kwa Bikri;+ lelo abaume abena Yuda bena batwalilile fye ukukonka imfumu yabo ukufuma ku Yordani ukuyafika ku Yerusalemu.+
3 Ilyo imfumu Davidi yafikile ku ng’anda* ya iko ku Yerusalemu,+ yabuulile bakanakashi ba iko 10, abo yashile pa kuti balesunga ing’anda,+ kabili yababikile mu ng’anda beka umo balebalonda. Yalebapeela ifya kulya, lelo tayalelaala nabo.+ Baleikala fye umu mwine umo babesalile mpaka ubushiku bafwile, baleikala kwati bali ni bamukamfwilwa nangu ca kuti umulume wabo ali no mweo.
4 Nomba imfumu yaebele Amasa+ aiti: “Wite abaume abena Yuda bese kuno mu nshiku shitatu, na iwe wine ufwile ukwisa.”
5 E ico Amasa aile mu kwita abena Yuda, lelo taishile pa nshita imfumu yamwebele.
6 Lyena Davidi aebele Abishai+ ati: “Sheba+ umwana wa kwa Bikri kuti atucita ifyabipa ukucila ifyo Abishalomu atucitile.+ Kabiye na bashilika bandi mumukonke, pa kuti mumusange ilyo ashilafika ku misumba ya malinga pantu kuti twamulufya.”
7 E ico abaume ba kwa Yoabu,+ abena Kerete, abena Pelete+ na baume ba maka bonse balimukonkele. Bafumine mu Yerusalemu pa kuti bapepeke Sheba umwana wa kwa Bikri.
8 Ilyo bafikile mupepi ne libwe ilikalamba ilyaba mu Gibeone,+ Amasa+ alikumene nabo. Nomba Yoabu afwele ifya kufwala fya nkondo, kabili ali no lupanga mu musana, mu cikwama ca luko. Ilyo apaleme kuli Amasa, ulupanga lwalisomweke, lwapona no kupona.
9 Yoabu aipwishe Amasa ati: “Bushe uli umutende munyinane?” Lyena Yoabu amwikete ku mwefu, amwikatile ku kuboko kwa ku kulyo e lyo acita kwati alefwaya ukumutomona.
10 Lelo Amasa tabikileko amano ku lupanga ulo Yoabu aikete, kabili Yoabu amulashile ulupanga mu lufumo+ ica kuti na mala yapongolokele panshi. Amulashile fye umuku umo afwa no kufwa. Lyena Yoabu na Abishai munyina bakonkele Sheba umwana wa kwa Bikri.
11 Umulumendo wa kwa Yoabu umo aiminine apali Amasa kabili alelanda ati: “Onse uuli ku lubali lwa kwa Yoabu kabili onse uwaba ku lubali lwa kwa Davidi, akonke Yoabu!”
12 Amasa alefutauka fye mu mulopa pa kati ka musebo. Ilyo uyu mulumendo amwene ukuti abantu bonse baleiminina, afumishe Amasa mu musebo, amutwala mu mpanga. Lyena amufimbile ica kufwala, pantu amwene ukuti onse uwafika apo ali aleiminina.
13 Ilyo amufumishe mu musebo, abaume bonse bakonkele Yoabu pa kuti bapepeke Sheba+ umwana wa kwa Bikri.
14 Sheba apitile mu mikowa ya bena Israele yonse, aya na ku Abele ya mu Bete-maaka.+ Abena Bikri balilongene e lyo nabo bamukonka.
15 Yoabu na baume abo ali nabo baileshinga Abele ya mu Bete-maaka umwali Sheba kabili batuulike amaloba nge cibumba, pantu amaloba yali mupepi ne cibumba. Kabili abaume bonse abali na Yoabu balenenuna ilinga pa kuti baliwishe.
16 E lyo umwanakashi wa mano mu musumba abilikishe ati: “Umfweni, umfweni mwe baume! Shi ebeni Yoabu amuti, ‘Palama kuno pa kuti inande na iwe.’”
17 E ico alipaleme, e lyo umwanakashi amwipusha ati: “Bushe niwe Yoabu?” Na o ayaswike ati: “Nine.” E lyo umwanakashi amwebele ati: “Umfwa ifyo ne mubomfi obe nalakweba.” Na o amwebele ati: “Landa.”
18 Umwanakashi akonkenyepo ati: “Kale balelanda abati, ‘Abantu nga balefwaya ukupwisha ubwafya, balingile ukwipusha aba mu musumba wa Abele,’ pa kuti babapandeko amano.
19 Ndeimininako abantu ba mutende kabili aba cishinka aba mu Israele. Mulefwaya ukonaula umusumba uwaba nga nyina wa misumba mu Israele. Cinshi mulefwaila ukulofesha* ubupyani bwa kwa Yehova?”+
20 Yoabu ayaswike ati: “Te kuti ngonaule umusumba.
21 Ifyo te fyo cili. Sheba+ umwana wa kwa Bikri uwa mu citungu ca mpili ica kwa Efraimu,+ napondokela Imfumu Davidi.* Nga mwatupeela fye uyu muntu, nshacite nangu cimo ku musumba.” Lyena umwanakashi aebele Yoabu ati: “Mona! Balakupoosela umutwe wakwe pa cibumba!”
22 Ilyo line umwanakashi wa mano ailelanda na bantu bonse kabili baputwile Sheba umwana wa kwa Bikri umutwe, bapoosela na Yoabu. E lyo Yoabu alishishe intandala kabili abaume bafumine ku musumba, cila muntu aile ku mwakwe.+ Yoabu na o abweleele ku Yerusalemu ku mfumu.
23 Nomba Yoabu ali mukalamba wa bashilika bonse aba bena Israele;+ Benaya+ umwana wa kwa Yehoyada+ ali umukalamba wa bena Kerete na bena Pelete.+
24 Adoramu+ ali mukalamba wa bantu abo baebele ukulabombela imfumu; Yehoshafati+ umwana wa kwa Ahiludi e walelembela imfumu ifyebo.
25 Sheva ali ni kalemba; Sadoke+ na Abiatari+ bali ni bashimapepo.
26 Kabili Ira umwina Yairi na o ali ni cilolo mukalamba* uwa kwa Davidi.
Amafutunoti
^ Nelyo kuti lyapilibula no kuti, “abwelele ku matenti yakwe.”
^ Nelyo “kwi sano.”
^ Mu ciHebere, “ukuminina.”
^ Mu ciHebere, “naimisha Imfumu Davidi ukuboko.”
^ Mu ciHebere, “aishileba shimapepo.”
