Ibuuku lya Bubili Ilya kwa Samwele 23:1-39
23 Aya e mashiwi ya kulekelesha aya kwa Davidi:+
“Amashiwi ayo Davidi umwana wa kwa Yese+ alandile,Kabili amashiwi ya muntu uo bacindamike,+Uo Lesa wa kwa Yakobo asubile,+Kemba umusuma uo baimbapo mu nyimbo+ sha bena Israele.
2 Umupashi wa kwa Yehova walandiile muli ine;+Icebo cakwe cali pa lulimi lwandi.+
3 Lesa wa kwa Israele alilandile;Icilibwe ca kwa Israele+ canjebele aciti:
‘Uuleteka abantu nga mulungami,+Nga alatiina Lesa pa kuteka abantu,+
4 Imitekele yakwe iba ngo lubuuto lwa lucelo ilyo akasuba katula,+Ngo lucelo ilyo kushili amakumbi.
Nga filya kubuuta imfula nga yakalika,Ulubuuto ne mfula filenga icani camena.+
5 Bushe ifi te fyo Lesa amona ing’anda yandi?
Pantu alipangana na ine icipangano ca muyayaya,+Ico ateyanya bwino sana kabili ica cishinka.
Pantu e pusukilo lyandi kabili e co nsekelelamo,E co akalengela cikafikilishiwe.+
6 Lelo ifinangwa fya bantu bafipoosa+ nge fimpusa fya myunga,Pantu te kuti bafisendele ku minwe.
7 Umuntu pa kufikata,Afwile ukuipangasha ne fyela ne fumo,Kabili bafwile ukufyoca fyonse pa cifulo fyaba.”
8 Aya e mashina ya bashilika batatu aba maka aba kwa Davidi:+ Yoshebu-bashebete umwina Hakmone, umukalamba wa aba bashilika.+ Bushiku bumo aipeye abantu 800 kwi fumo.
9 Uwakonkelepo ali ni Eleasari+ umwana wa kwa Dodo+ umwana wa kwa Ahohe uwali pa bashilika ba maka batatu abali na Davidi ilyo basonsombele abaPelishiti. AbaPelishiti balilongene pa kuti balwe inkondo kabili ilyo abashilika abena Israele bafulumwike,
10 Eleasari ena alishipile kabili atwalilile fye ukulaipaya abaPelishiti mpaka ukuboko kwakwe kwanaka sana kabili iminwe yakwe yalikosele pa mulandu wa kwikata ulupanga.+ E ico pali bulya bushiku Yehova alengele abantu bakwe bacimfya icine cine;*+ kabili abashilika abena Israele balibwelele mu kusenda ifipe fya bantu abo aipeye.
11 Uwamukonkelepo ali ni Shama umwana wa kwa Age umwina Harari. AbaPelishiti balongene pa Lehi, apali ibala umwali ilanda ilingi sana; kabili abashilika abena Israele bafulumwike abaPelishiti.
12 Lelo ena alishipile aiminina na pa kati ke bala no kulicingilila. Atwalilile ukwipaya abaPelishiti ica kuti Yehova alengele abantu bakwe bacimfya icine cine.*+
13 Intungulushi shitatu pa ntungulushi 30 shaile kuli Davidi ku lucengo lwa Adulamu+ pa nshita ya kusombola, kabili abaPelishiti bapangile inkambi mu Mupokapoka* wa Refaimu.+
14 Pali ilya nshita ninshi Davidi alifiseme,+ kabili ninshi abashilika ba baPelishiti bapangile inkambi mu Betelehemu.
15 Lyena Davidi afulwike amenshi ya mu Betelehemu e lyo atila: “Ala ifyo ningatemwa ukunwa amenshi ya mu cishima ca mu Betelehemu icabela mupepi ne mpongolo!”
16 E lyo aba abashilika ba maka batatu baileingila mu nkambi ya baPelishiti ku maka, kabili batapile amenshi mu cishima ca mu Betelehemu icabela mupepi ne mpongolo, e lyo baletela Davidi; lelo alikeene ukunwa, ayetile panshi pa cinso ca kwa Yehova.+
17 Alandile ati: “Te kuti ncite ica musango uyu mwe Yehova! Bushe inwe umulopa+ wa bantu abaibikile mu kapoosa mweo pa kuti bayetapa amenshi?” E ico alikeene ukunwa yalya menshi. Ifi e fyo abashilika bakwe batatu aba maka bacitile.
18 Abishai+ munyina Yoabu umwana wa kwa Seruya,+ ali mukalamba wa bashilika bambi batatu; aipeye abantu 300 kwi fumo, kabili na o aishibikwe nga filya fine balya bambi batatu baishibikwe.+
19 Nangu ca kuti ali uwacindikwa ukucila abashala batatu, kabili e wali intungulushi yabo, tafikile pa cifulo ico balya abashilika batatu aba kubalilapo bafikilepo.
20 Benaya+ umwana wa kwa Yehoyada ali mwaume uwashipa* uwacitile ifingi mu Kabseele.+ Aipeye abana babili abaume aba kwa Ariele uwa ku Moabu, kabili pa bushiku kwali imfula ya bungululu bwabuuta, aingile mu cilindi, aipaya ne nkalamo.+
21 Na kabili aipeye umwina Egupti ipaka. Nangu ca kuti umwina Egupti alikete ifumo, aile kuli ena ne nkonto kabili amusompwele ifumo, e lyo amwipaila kuli lilya line ifumo.
22 Ifi e fyo Benaya umwana wa kwa Yehoyada acitile, kabili na o aishibikwe nga filya fine balya abashilika ba maka batatu aba kubalilapo baishibikwe.
23 Nangu ca kuti ali uwacindikwa sana ukucila balya 30, tafikile pa cifulo ico balya batatu bafikilepo. Lelo Davidi amupeele umulimo wa kulamulinda.
24 Asaele+ munyina Yoabu ali pali balya 30: Elhanani umwana wa kwa Dodo uwa ku Betelehemu,+
25 Shama umwina Herode, Elika umwina Herode,
26 Helese+ umwina Pelete, Ira+ umwana wa kwa Ikeshe umwina Tekoa,
27 Abiesere+ umwina Anatote,+ Mebunai umwina Husha,
28 Salmone umwina Ahohe, Maharai+ umwina Netofa,
29 Helebu umwana wa kwa Baana umwina Netofa, Itai umwana wa kwa Ribai uwa ku Gibea umwina Benjamini,
30 Benaya+ umwina Piratone, Idai uwa ku mimana ya Gaashi,+
31 Abialiboni umwina Araba, Asimabete umwina Bahurimu,
32 Eliaaba umwina Shaalibimu, abana abaume aba kwa Yashene, Yonatani,
33 Shama umwina Harari, Ahiamu umwana wa kwa Sharari umwina Harari,
34 Elifelete umwana wa kwa Ahasibai umwana wa mwina Maaka, Eliamu umwana wa kwa Ahitofele+ umwina Gilo,
35 Hesero umwina Karmele, Paarai umwina Arbi,
36 Igali umwana wa kwa Natani uwa ku Soba, Bani umwina Gadi,
37 Seleke umwina Amone, Naharai umwina Beerote, uwalesendela Yoabu umwana wa kwa Seruya ifyanso,
38 Ira umwina Itri, Garebu umwina Itri+
39 na Uria+ umwina Hiti. Bonse pamo bali 37.
Amafutunoti
^ Nelyo “alipuswishe abantu bakwe.”
^ Nelyo “apuswishe abantu bakwe.”
^ Nelyo “Impanga Iyabatama.”
^ Mu ciHebere, “umwana mwaume uwa mwaume uwa maka.”
