Ibuuku lya Bubili Ilya kwa Samwele 4:1-12
4 Ilyo Ishiboshete+ umwana wa kwa Shauli aumfwile ukuti Abnere alifwile ku Hebrone,+ alitiinine nga nshi* kabili abena Israele bonse balisakamene.
2 Kwali abaume babili abali abakalamba ba fipondo fya mwana wa kwa Shauli: umo ali ni Baana e lyo umbi ali ni Rekabu. Aba bali bana ba kwa Rimone umwina Beerote, uwa mu mukowa wa kwa Benjamini. (Pantu umusumba wa Beerote+ na o baleupendela pa misumba ya bena Benjamini.
3 Abena Beerote babutukiile ku Gitaimu,+ kabili balebeshi kulya kwine ukufika na lelo.)
4 Nomba Yonatani+ umwana wa kwa Shauli, alikwete umwana umwaume uwalemene amakasa.+ Ali ne myaka 5 ilyo baumfwile ukuti Shauli na Yonatani balifwile ku Yesreele.+ E ico uwalemusunga alimwimishe kabili alibutwike, lelo ilyo alebutuka, alimuponeshe pa mulandu wa kuti ali no mwenso, e fyo alemene. Uyu mwana ali ni Mefiboshete.+
5 Abana ba kwa Rimone umwina Beerote, e kutila Rekabu na Baana, baile ku ng’anda ya kwa Ishiboshete, pa nshita akasuba kakabile sana kabili ilyo aletuusha ninshi akasuba kali pa kati ka mutwe.
6 Baingile mu ng’anda kwati balesenda ingano, kabili bamulashile mu lufumo. Lyena Rekabu na munyina Baana+ balifyukile.
7 Ilyo baingile mu ng’anda, bamusangile nalaala pa busanshi mu muputule wakwe uwa kulaalamo, balimulashile bamwipaya no kumwipaya bamuputulako no mutwe. Lyena basendele umutwe wakwe kabili baendele ubushiku bonse mu musebo waya ku Araba.
8 Kabili batwele umutwe wa kwa Ishiboshete+ kuli Davidi ku Hebrone e lyo baeba imfumu abati: “Mukwai uyu e mutwe wa kwa Ishiboshete umwana wa kwa Shauli umulwani wenu+ uwalefwaya ukumwipaya.*+ Shikulu mwe mfumu, buno bushiku Yehova namulandwilako Shauli na batuntuka muli ena.”
9 Lelo Davidi aebele Rekabu na Baana munyina, abana ba kwa Rimone umwina Beerote ati: “Na pali Yehova uwampuswishe* lintu nali na macushi,+
10 ilyo umo andeteele ilyashi lya kuti, ‘Shauli nafwa,’+ kabili ena alemona kwati andeteele ilyashi ilisuma, lelo nalimwikete namwipaya+ mu Siklagi. E cilambu namupeele pa lyashi aletele!
11 Pali bufi abantu ababifi abepaile umulungami mu ng’anda yakwe pa busanshi bwakwe! Bushe nshifwile ukumukanda pa kusuumya umulopa wakwe+ pa kuti imufumye pano isonde?”
12 Lyena Davidi aebele abalumendo ukuti babepaye.+ Balibaputwileko amaboko na makasa e lyo babakobeka+ mupepi ne cishiba mu Hebrone. Lelo basendele umutwe wa kwa Ishiboshete, bayaushiika mu nshiishi ya kwa Abnere mu Hebrone.
Amafutunoti
^ Mu ciHebere, “amaboko yakwe yalinakile.”
^ Nelyo “uwalefwaya umweo wenu.”
^ Nelyo “uwalubwile umweo wandi.”
