Ibuuku lya Bubili Ilya kwa Samwele 8:1-18
8 Mu kupita kwa nshita, Davidi alisanshile abaPelishiti+ kabili alibacimfishe.+ Lyena Davidi alipokele abaPelishiti incende ya Mateg-amma.
2 Alicimfishe abena Moabu+ kabili abalaalike panshi e lyo abapima ne ntambo. Abali mu mitande ibili iyo apimine e bo aipeye, e lyo abali mu mutande umo uo apimine bena tabepeye.+ Abena Moabu baishileba ababomfi ba kwa Davidi kabili balemuletela umutuulo.+
3 Davidi acimfishe Hadadesere umwana wa kwa Rehobu imfumu ya ku Soba+ ilyo aleya mu kupokolola incende ya ku Mumana wa Yufrate+ pa kuti ibe yakwe na kabili.
4 Davidi amupokele abashilika 1,700 abalenina pali bakabalwe e lyo na bashilika bambi 20,000. Lyena alemanike bakabalwe bonse abaletinta amaceleta, ashileko fye bakabalwe 100 abaletinta amaceleta.+
5 Ilyo abena Siria aba ku Damaseke+ baile mu kwafwa Hadadesere imfumu ya ku Soba, Davidi aipeyepo abena Siria 22,000.+
6 Lyena Davidi apangile inkambi sha bashilika mu musumba wa Damaseke uwa mu Siria. Abena Siria baishileba ababomfi ba kwa Davidi kabili balemuletela umutuulo. Yehova alelenga Davidi alecimfya* konse uko aleya.+
7 Davidi alipokele na babomfi ba kwa Hadadesere inkwela sha golde, ashitwala na ku Yerusalemu.+
8 Imfumu Davidi yasendele umukuba uwingi nga nshi mu Beta na mu Berotai, iyali imisumba ya kwa Hadadesere.
9 Nomba Toi imfumu ya ku Hamati+ alyumfwile ukuti Davidi alicimfishe abashilika ba kwa Hadadesere bonse.+
10 E ico Toi atumine umwana wakwe Yoramu ku Mfumu Davidi pa kuti ayeiposha kabili aitashe pantu yalilwile na Hadadesere kabili yalimucimfishe (pantu Hadadesere alelwa na Toi libili libili), kabili Yoramu aleteele Davidi ifipe fya silfere, ifya golde ne fya mukuba.
11 Imfumu Davidi yapeele Yehova ifi pamo na silfere na golde ifyo yapokele aba muli ifi fyalo fyonse ifyo yacimfishe:+
12 icalo ca bena Siria ne ca bena Moabu,+ ica bena Amone, ica baPelishiti,+ ica bena Amaleke+ ne fyo yapokele kuli Hadadesere+ umwana wa kwa Rehobu imfumu ya ku Soba.
13 Na kabili Davidi alilengele ishina lyakwe lyalumbuka ilyo abwelele ku Mupokapoka wa Mucele+ uko aipaile abena Edomu 18,000.
14 Alipangile inkambi sha bashilika mu Edomu. Mu Edomu monse alipangilemo inkambi sha bashilika, kabili abena Edomu bonse baishileba ababomfi ba kwa Davidi.+ Yehova alelenga Davidi alecimfya* konse uko aleya.+
15 Davidi alitwalilile ukuteka abena Israele bonse.+ Alepingula abantu bakwe bonse+ mu mulinganya kabili mu bulungami.+
16 Yoabu+ umwana wa kwa Seruya e wali umukalamba wa bashilika, kabili Yehoshafati+ umwana wa kwa Ahiludi e walelembela imfumu ifyebo.
17 Sadoke+ umwana wa kwa Ahitubu na Ahimeleke umwana wa kwa Abiatari e bali bashimapepo, e lyo Seraya e wali kalemba.
18 Benaya+ umwana wa kwa Yehoyada e wali intungulushi ya bena Kerete na bena Pelete.+ Kabili abana ba kwa Davidi e baishileba bacilolo bakalamba.*
Amafutunoti
^ Nelyo “alepususha Davidi.”
^ Nelyo “alepususha Davidi.”
^ Mu ciHebere, “baishileba bashimapepo.”
