Kalata ya Bubili iya kwa Yohane 1:1-13
1 Ine ne mwaume umukalamba* nalembela umwanakashi uwasalwa na bana bakwe, abo natemwa icine cine. Te ine neka nabatemwa iyo, lelo na bonse abaishiba icine balibatemwa,
2 pa mulandu wa cine icaba mu mitima yesu, kabili icikatwalilila ukuba mu mitima yesu umuyayaya.
3 Icikuuku icaibela, uluse no mutende ukufuma kuli Lesa Shifwe na kuli Yesu Kristu Umwana wa kwa Shifwe fyakulaba na ifwe, pamo ne cine no kutemwa.
4 Ndasekelela nga nshi pa kusanga ukuti abana bobe bamo bale-enda mu cine,+ nga filya fine twapokelele ifunde kuli Shifwe.
5 E ico nomba ndekulomba iwe we mwanakashi ukuti tuletemwana. (Ifunde ilyo na kulembela te lipya iyo, lelo ni lilya line twakwata ukufuma fye ku kutendeka.)+
6 Kabili ukutemwa kwalola mu kuti tulecita ifintu ukulingana na mafunde yakwe.+ Ili e funde ilyo mwaumfwa ukufuma fye ku kutendeka ilya kuti, lyonse mulelanga ukutemwa.
7 Pantu abantu abengi ababepa nabasalanganina muli ici calo,+ abashisumina ukuti Yesu Kristu alishile no kuba umuntunse.+ Umuntu uucita ifi ni kabepa kabili e mukaanya Kristu.+
8 Muleba abacenjela pa kuti mwikonaula ifyo twabombela, lelo mukapokelele icilambu cenu conse.+
9 Onse uupula mwi sambilisho lya kwa Kristu kabili uushikalilila muli ili isambilisho te mubomfi wa kwa Lesa.+ Uukonka ili isambilisho e mubomfi wa kwa Lesa kabili e musambi wa Mwana.+
10 Umuntu nga aisa kuli imwe ne sambilisho ilyapusana ne li, mwimupokelela mu mwenu+ nangu fye ku muposha.
11 Pantu uwamuposha ninshi akumako ku milimo yakwe iyabipa.
12 Nangu ca kutila ninkwata ifintu ifingi ifya kumulembela, nshilefwaya ukufilemba pe pepala kabili kuli inki, lelo ndesubila ukwisa kuli imwe no kulanda na imwe pa kanwa nkati, pa kuti mukasekelele nga nshi.
13 Abana ba kwa nkashi inobe uwasalwa, bakuposha.
Amafutunoti
^ Nelyo “eluda.”
