Kalata ya Butatu iya kwa Yohane 1:1-14
1 Ine ne mwaume umukalamba* nalembela Gai, uwatemwikwa, uo natemwa icine cine.
2 We mutemwikwa, ndekupepelako ukuti ifintu fyonse fitwalilile ukulakwendela bwino kabili ule-enda umutende, nge fi fine ifintu filekwendela bwino pali ino nshita.
3 Pantu nalisekelele nga nshi ilyo aba bwananyina baishile no kushimika pa cine ico waishiba, nga filya fine wenda mu cine.+
4 Takwaba icintu nangu cimo icilenga ndesekelela* nga nshi ukucila pa kumfwa ukuti abana bandi bale-enda mu cine.+
5 We mutemwikwa, waliba uwa cishinka muli fyonse ifyo ubombela aba bwananyina abesa kuli iwe nangu ca kuti tawabeshiba no kubeshiba.+
6 Balashimikila aba mu cilonganino pa fyo waba no kutemwa. Shi ulebafishapo ilyo baleya ukulingana ne fyo Lesa afwaya.+
7 Pantu ni pa mulandu we shina lya kwa Lesa bailiile mu ncende ishapusanapusana, ukwabula ukupokelela akantu nangu kamo+ ku bena fyalo.
8 E ico tufwile ukulapokelela bwino aba musango uyu,+ pa kuti twingaba ababomfi banabo mu cine.+
9 Nalilembeele aba mu cilonganino fimo, lelo Diotrefe uufwaya ukuba pa ntanshi pali bena,+ alasuusha fyonse ifyo tulanda.+
10 E ico nga naisa, nkebukisha ifyo acita, pantu alalanda ifyabipa pali ifwe.+ Tapelela fye pali ifi, lelo tapokelela na ba bwananyina+ mu mucinshi, na bonse abafwaya ukubapokelela alesha ukubakaanya kabili alesha ukubatamfya mu cilonganino.
11 We mutemwikwa, wilapashanya abacita ifyabipa, lelo ulepashanya abacita ifisuma.+ Uucita ifisuma wa kwa Lesa.+ Uucita ifyabipa ninshi tatala amonapo Lesa.+
12 Aba bwananyina bonse balashimika ifisuma pali Demetri pantu ekala ukulingana ne fyo icine cilanda. Na kuba, na ifwe bene tuli nte, kabili nawishiba ukuti ubunte bwesu bwa cine.
13 Ninkwata ifingi ifya kukulembela, lelo nshilefwaya nkonkanyepo ukukulembela ku kalembelo na kuli inki.
14 Lelo ndesubila ukwisakumona bwangu, kabili tukalanda pa kanwa nkati.
Umutende ube na iwe.
Ifibusa kuno fyakuposha. Umposesheko na bacibusa bonse umo umo.
