Abapingushi 1:1-36
1 Pa numa ya mfwa ya kwa Yoshua,+ abena Israele* baipwishe Yehova abati:+ “Nani pali ifwe uukabalilapo ukuyasansa abena Kanaani?”
2 Yehova abaswike ati: “Ni Yuda e ukabalilapo.+ Moneni! ndepeela* ici calo mu minwe yakwe.”
3 Lyena Yuda aebele Simeone munyina ati: “Natuleya bonse mu mpanga iyo bampeela*+ pa kuti tuyesansa abena Kanaani. Pa numa na ine nkaya na iwe mu mpanga iyo bakupeela.” E ico Simeone aile nankwe.
4 Ilyo aba mu mukowa wa kwa Yuda baile, Yehova alengele bacimfye abena Kanaani na bena Perisi,+ ica kuti bacimfishe abaume 10,000 mu Beseke.
5 Basangile Adoni-beseke mu Beseke, balimulwishishe kabili balicimfishe abena Kanaani+ na bena Perisi.+
6 Ilyo Adoni-beseke afulumwike, balimupepeke kabili ilyo bamwikete balimuputwile ifikumo ne fikondo ifikalamba.
7 Lyena Adoni-beseke atile: “Kwaliba imfumu 70 isho baputwile ifikumo ne fikondo ifikalamba ishitoola ifya kulya mwi samba lye tebulo lyandi. Filya fine nacitile e fyo na ine Lesa ancita.” Pa numa bamuletele ku Yerusalemu+ kabili kulya kwine e ko afwilile.
8 Kabili abaume aba mu mukowa wa kwa Yuda balwishishe umusumba wa Yerusalemu+ no ku-upoka; baipeye abaleikalamo ku lupanga baoca no musumba.
9 Pa numa abaume aba mu mukowa wa kwa Yuda baile mu kulwisha abena Kanaani abaleikala mu citungu ca mpili na mu Negebu na mu Shefela.+
10 E ico aba mu mukowa wa kwa Yuda bailesansa abena Kanaani abaleikala mu Hebrone (kale Hebrone baleita ukuti Kiriati-arba), kabili baipeye Sheshai, Ahimani na Talmai.+
11 Ilyo bafumine kulya, bailesansa abaleikala mu Debiri.+ (Kale Debiri baleita ukuti Kiriati-sefere.)+
12 Lyena Kalebu+ atile: “Uukacimfya umusumba wa Kiriati-sefere no ku-upoka, nkamupeela Aksa umwana wandi umwanakashi pa kuti akabe umukashi wakwe.”+
13 Oteniele+ umwana wa kwa Kenasi,+ umwaice wa kwa Kalebu, aliucimfishe. E ico amupeele Aksa umwana wakwe umwanakashi pa kuti abe umukashi wakwe.
14 Nomba ilyo Aksa aleya ku ng’anda, aebele umulume wakwe ukuti alombe impanga kuli Kalebu wishi. Lyena Aksa alikiile pa mpunda.* Kalebu amwipwishe ati: “Cinshi ulefwaya?”
15 Aksa aebele wishi ati: “Ndefwaya mumpaale, pantu namumpeela impanga ku kapinda ka ku kulyo;* ndefwaya mumpeele ne mpanga ya Gulote-maimu.”* E ico amupeele Gulote yabela pa muulu na Gulote yabela mwi samba.
16 Kabili abatuntwike mu mwina Keni,+ shifyala wa kwa Mose,+ bafumine mu musumba wa tuncindu+ pamo na ba mu mukowa wa kwa Yuda kabili baile ku matololo ya Yuda, ayabela ku kapinda ka ku kulyo aka Aradi.+ Baile kulya no kutendeka ukwikala na bantu ba muli ulya musumba.+
17 Lelo Yuda aile na Simeone munyina, kabili basanshile abena Kanaani abaleikala mu musumba wa Sefati, balyonawile no musumba onse fye.+ E ico bainike ulya musumba ukuti Horma.*+
18 Lyena Yuda apokele Gasa+ ne mpanga ya uko, Ashkelone+ ne mpanga ya uko, na Ekrone+ ne mpanga ya uko.
19 Yehova ali na baume aba mu mukowa wa kwa Yuda kabili bapokele icitungu ca mpili, lelo balifililwe ukutamfya abaleikala mu mpanga iyabatama, pantu balikwete amaceleta ya fyela ifyatwa.+
20 Bapeele Kalebu umusumba wa Hebrone, nge fyo Mose alandile,+ kabili atamfishemo abana ba kwa Anaki batatu.+
21 Lelo abena Benjamini tabatamfishe abena Yebusi abaleikala mu Yerusalemu, e ico abena Yebusi bekala na bena Benjamini mu Yerusalemu ukufika na lelo.+
22 Abatuntwike muli Yosefe+ nabo baile mu kulwisha Betele, kabili Yehova ali nabo.+
23 Abatuntwike muli Yosefe balelengula Betele (kale uyu musumba balewita ukuti Lusi),+
24 kabili inengu shamwene umwaume alefuma mu musumba. E ico shamwebele ashiti: “Shi tulange apa kwingilila mu musumba. Nga watulanga tatwakwipaye.”*
25 E ico uyu mwaume alibalangile apa kwingilila mu musumba, kabili baipeye aba mu musumba ku lupanga, lelo uyu mwaume na ba mu lupwa lwakwe bonse balibalekele baya.+
26 Uyu mwaume aile ku calo ca bena Hiti kabili ailekuula umusumba, awinika no kuti Lusi, kabili ifi fine e fyo bawita ukufika na lelo.
27 Manase tapokele Bete-sheani ne misumba ya uko iinono, Taanaki+ ne misumba ya uko iinono, abaleikala mu Dore ne misumba ya uko iinono, abaleikala mu Ibleamu ne misumba ya uko iinono na baleikala mu Megido ne misumba ya uko iinono.+ Abena Kanaani bakakatile fye muli cilya calo.
28 Ilyo abena Israele bakoseleko, ba-alwile abena Kanaani baba abasha babo,+ kabili tababatamfishe bonse mu misumba.+
29 Abena Efraimu nabo tabatamfishe abena Kanaani abaleikala mu Gesere. E ico abena Kanaani balitwalilile ukwikala na bena Efraimu mu Gesere.+
30 Sebuluni tatamfishe abaleikala mu Kitrone na baleikala mu Nahalole.+ Abena Kanaani balitwalilile ukwikala na bena Sebuluni kabili babalwile abasha babo.+
31 Ashere tatamfishe abaleikala mu Ako na baleikala mu Sidone,+ mu Alabu, mu Aksibu,+ mu Helba, mu Afiki+ na mu Rehobu.+
32 E ico abena Ashere batwalilile ukwikala na bena Kanaani abaleikala mu calo, pantu balifililwe ukubatamfyamo.
33 Naftali tatamfishe abaleikala mu Bete-shemeshe na baleikala mu Bet-anati,+ lelo balitwalilile ukwikala na bena Kanaani abaleikala muli iyi misumba.+ Abaleikala mu Bete-shemeshe na baleikala mu Bet-anati balibalwile baba abasha babo.
34 Abena Amore tabalekele abena Dani balaikala mu mpanga iyabatama,+ e ico baikele mu citungu ca mpili.
35 Kanshi abena Amore balikeene ukufuma mu Lupili lwa Herese, mu Ayalone+ na mu Shaalibimu.+ Lelo ilyo abatuntwike muli Yosefe bakwatiileko amaka, babalwile baba abasha babo.
36 Impanga ya bena Amore yatampiile pa nshila iyaninika iya Akrabimu,+ kabili yatampiile ku Sela no kuya pa muulu.
Amafutunoti
^ Mu ciHebere, “abana abaume aba kwa Israele.”
^ Nelyo “nimpeela.”
^ Mu ciHebere, “bampendwila.”
^ Nelyo kuti yapilibula no kuti, “atootele ninshi ali pa mpunda.”
^ Nelyo “Negebu.” Iyi impanga ya ku kapinda ka ku kulyo yali iyauma.
^ Ilyalola mu kuti “Ifishiba.”
^ Ilyalola mu kuti “Incende Iyaonaulwa.”
^ Mu ciHebere, “tukakulanga ukutemwa ukushipwa.”
