Abapingushi 11:1-40
11 Nomba Yefta+ umwina Gileadi ali mushilika wa maka; nyina ali ni cilende, kabili Gileadi e wali wishi wa kwa Yefta.
2 Lelo muka Gileadi na o alimufyalile abana abaume. Ilyo abana baume aba mukashi wakwe bakulile, batamfishe Yefta kabili bamwebele abati: “Tapali nangu cimo ico ukapyana pa fya mu ng’anda ya kwa shifwe, pantu uli mwana wa mwanakashi umbi.”
3 E ico Yefta abutwike bamunyina ayaikala mu calo ca Tobu. Kabili abaume abashakwete fya kucita baile kuli Yefta, kabili e waishileba intungulushi yabo.
4 Ilyo papitile inshita, abena Amone balwile na bena Israele.+
5 Ilyo abena Amone balwile na bena Israele, ilyo line abakalamba ba mu Gileadi baile mu kusenda Yefta ku calo ca Tobu.
6 Baebele Yefta abati: “Tuleya ube umukalamba we bumba lya bashilika besu, pa kuti tulwishe abena Amone.”
7 Lelo Yefta aebele abakalamba ba mu Gileadi ati: “Bushe te imwe mwampatile ica kuti mwantamfishe na mu ng’anda ya kwa tata?+ Nomba cinshi mwaishila kuli ine ilyo mwakwata amafya?”
8 E lyo abakalamba ba mu Gileadi baebele Yefta abati: “E calenga twise kuli iwe. Nga twaya na iwe kabili wayacimfya abena Amone, ninshi ukaba intungulushi yesu fwe bena Gileadi bonse.”+
9 E ico Yefta aebele abakalamba ba mu Gileadi ati: “Nga mwambwesesha ku Gileadi pa kuti nkayelwa na bena Amone kabili Yehova nga akalenga nkabacimfye, ninshi nkaba intungulushi yenu!”
10 Abakalamba ba mu Gileadi baebele Yefta abati: “Yehova nabe kambone pali ifwe na iwe, kabili akatupingule nga ca kuti tatwakacite ifyo walanda.”
11 E ico Yefta aile na bakalamba ba mu Gileadi, kabili abantu bamulengele aba intungulushi yabo kabili umukalamba wa bashilika. Kabili amashiwi ayo Yefta alandile aliyabwekeshepo pa cinso ca kwa Yehova mu Mispa.+
12 Lyena Yefta atumine abakuyaeba imfumu ya bena Amone+ ati: “Cinshi nakulufyanya pa kuti wise mu kulwisha icalo candi?”
13 E ico imfumu ya bena Amone yaebele abo Yefta atumine aiti: “Ni co ilyo abena Israele bafumine ku Egupti, balipokele impanga yandi+ iyatendekela pa Arnone+ ukufika ku Yaboke, ukuyafika fye na ku Yordani.+ Nomba mbwesesheni impanga yandi mu mutende.”
14 Lelo Yefta na kabili atumine abakuyaeba imfumu ya bena Amone
15 ukuti:
“Ifi e fyo Yefta alanda: ‘Abena Israele tabapokele impanga ya bena Moabu+ ne mpanga ya bena Amone,+
16 pantu ilyo abena Israele bafumine ku Egupti, bapitile mu matololo bafika na kuli Bemba Wakashika+ kabili baile ku Kadeshe.+
17 Lyena abena Israele batumine abakuyaeba imfumu ya ku Edomu+ ukuti: “Lekeni tupiteko mu calo cenu,” lelo imfumu ya ku Edomu yalikeene. Kabili balitumine amashiwi na ku mfumu ya ku Moabu,+ lelo tayabasuminishe. E ico abena Israele batwalilile ukwikala mu Kadeshe.+
18 Ilyo balepita mu matololo, tabapitile mu calo ca Edomu+ na mu calo ca Moabu. Baile ku kabanga ka calo ca Moabu+ no kupanga inkambi kwi shilya lya Arnone. Tabaingile mu calo ca bena Moabu,+ pantu Arnone e wali umupaka wa bena Moabu.
19 “‘Pa numa abena Israele batumine inkombe kuli Sihone imfumu ya bena Amore, uwaletekela mu Heshebone, kabili abena Israele bamwebele abati: “Lekeni tupiteko mu calo cenu pa kuti tuleya ku calo cesu.”+
20 Lelo Sihone aletwishika ico abena Israele balefwaila ukupitila mu calo cakwe, e ico alonganike abashilika bakwe bonse, bayapanga ne nkambi mu Yahasi kabili balwile na bena Israele.+
21 E ico Yehova Lesa wa bena Israele apeele Sihone na bashilika bakwe bonse mu minwe ya bena Israele, ica kuti balibacimfishe kabili abena Israele bapokele incende yonse iyo abena Amore baleikalamo muli cilya citungu.+
22 E fyo bapokele impanga yonse iya bena Amore ukutendekela pa Arnone ukufika ku Yaboke kabili ukufuma ku matololo ukuyafika ku Yordani.+
23 “‘Yehova Lesa wa bena Israele e watamfishe abena Amore muli ici calo pa kuti apeele abantu bakwe abena Israele,+ icalo ca bena Amore. Nomba bushe imwe kuti mwabatamfyamo?
24 Bushe conse ico Kemoshe lesa wenu+ amupeela tamupoka? E ico onse uo Yehova Lesa wesu atutamfishako e o tukatamfya.+
25 Nomba bushe walicila Balaki+ umwana wa kwa Sipore, uwali imfumu ya Moabu? Bushe alilwishenyepo na bena Israele, nelyo bushe alyeseshepo ukulwa nabo?
26 Ilyo abena Israele baleikala mu Heshebone na mu misumba ya iko iinono+ na mu Aroere na mu misumba ya iko iinono na mu misumba yonse iyaba mu lulamba lwa Arnone pa myaka 300, cinshi ushapokeele iyi imisumba pa myaka yonse iyi?+
27 Nshakulufyanya, lelo ifi uletusansa ulelufyanya. Leka Yehova Kapingula+ apingule lelo abena Israele na bena Amone.’”
28 Lelo imfumu ya bena Amone tayaumfwile amashiwi ayo Yefta aitumiine.
29 Umupashi wa kwa Yehova waishile pali Yefta,+ kabili apitile mu Gileadi na mu mpanga ya bena Manase pa kuya ku Mispa* ya mu Gileadi,+ kabili ilyo afumine mu Mispa ya mu Gileadi aile mu kulwa na bena Amone.
30 Lyena Yefta alapile umulapo+ kuli Yehova, kabili atile: “Nga mwapeela abena Amone mu minwe yandi,
31 ninshi uukabalilapo ukufuma mu ng’anda yandi mu kunsengela ilyo nkabwela umutende ku kulwisha abena Amone, akaba wa kwa Yehova,+ kabili nkamutuula ngo mutuulo wa koca.”+
32 E ico Yefta aile mu kulwa na bena Amone kabili Yehova abapeele mu minwe yakwe.
33 Alipeye abena Amone abengi nga nshi ukufuma pa Aroere ukuyafika ku Miniti. Acimfishe imisumba 20 ukuyafika fye na ku Abele-keramimu. E fyo abena Israele bacimfishe abena Amone.
34 Yefta asukile afika ku Mispa+ ku mwakwe, kabili moneni! umwana wakwe umwanakashi aishile mu kumusengela, alelisha na kaoma ka nyenjele uku ninshi alecinda! Nomba uyu e mwana fye akwete. Takwete umwana umbi umwaume nelyo umwanakashi.
35 Ilyo amumwene, alepwile ifya kufwala fyakwe kabili alandile ati: “Yangu we mwana wandi! Ala wanenga ubulanda, kanshi niwe nalatuma mu kubombela Lesa! Nomba nalilaya Yehova, kabili te kuti njalule.”+
36 Na lyo line aebele wishi ati: “Tata nga mwalilaya Yehova, citeni fye ukulingana ne fyo mwalaile,+ pantu Yehova namulandwilako abalwani benu, abena Amone.”
37 Lyena aebele wishi ati: “Ndelombako fye icintu cimo: Ndekeni mbe fye neka pa myeshi ibili, kabili lekeni ndeya ku mpili, kabili lekeni ndooshe bunacisungu bwandi pamo na bakashana banandi.”*
38 E lyo amwebele ati: “Kabiye!” E ico amulekele aya pa myeshi ibili, kabili aile ku mpili pamo na bakashana banankwe mu kuloosha pali bunacisungu bwakwe.
39 Ilyo imyeshi ibili yapwile, alibwelelemo kuli wishi, kabili wishi alifikilishe umulapo alapile pali ena.+ Uyu umukashana tabalile alaalapo no mwaume. Kabili apa e patulile ulutambi* lwa mu Israele ulwa kuti:
40 Cila mwaka abakashana abena Israele baleya mu kutasha umwana mwanakashi wa kwa Yefta umwina Gileadi pa nshiku 4 mu mwaka.
Amafutunoti
^ Mu ciHebere, “Mispe.”
^ Nelyo “njeloosha pamo na banandi pantu nshakataleupwa.”
^ Nelyo “ifunde lya mu Israele ilya kuti.”
