Abapingushi 13:1-25
13 Abena Israele balibwekeshepo ukucita ifyabipa mu menso ya kwa Yehova,+ kabili Yehova abapeele mu minwe ya baPelishiti+ pa myaka 40.
2 Pali ilya nshita kwali umuntu umo ku Sora+ uwa mu lupwa lwa bena Dani,+ ishina lyakwe ali ni Manoa.+ Umukashi wakwe talekwata abana.+
3 Mu kupita kwa nshita, malaika wa kwa Yehova amoneke ku mwanakashi kabili amwebele ati: “Mona, taukwata abana. Lelo ukemita no kufyala umwana umwaume.+
4 E ico taufwile ukulanwa umwangashi nelyo ubwalwa,+ kabili taulingile ukulalya icakowela nangu cimo.+
5 Mona! Ukemita, kabili ukafyala umwana umwaume, kabili mwikatala amumubeyapo umushishi,+ pantu akaba umuNasiri wa kwa Lesa ilyo akafyalwa fye,* kabili e ukatampa ukupususha abena Israele mu minwe ya baPelishiti.”+
6 Lyena uyu mwanakashi aile ku mulume wakwe no kumweba ati: “Kwaciba umuntu wa kwa Lesa wa cine uwaciisa kuli ine, kabili acilamoneka nga malaika wa kwa Lesa wa cine, uwa bukata nga nshi. Nshacimwipusha uko acifuma, kabili tacinjeba ishina lyakwe.+
7 Lelo acinjeba ati, ‘Mona! Ukemita no kufyala umwana umwaume. Nomba wilanwa umwangashi nelyo ubwalwa, kabili wilalya conse icakowela, pantu umwana akaba umuNasiri wa kwa Lesa ilyo akafyalwa fye* mpaka ubushiku akafwa.’”
8 Manoa apaapeete Yehova ati: “Mwe Yehova. Shi lekeni umuntu wa kwa Lesa wa cine uo mwacituma, abwele ese atwebe ifyo tufwile ukukusha umwana uukafyalwa.”
9 E ico Lesa wa cine alicitile ifyo Manoa amulombele, kabili malaika wa kwa Lesa wa cine abwelele ku mwanakashi ninshi naikala mwi bala. Lelo tali no mulume wakwe Manoa.
10 Ilyo line fye uyu mwanakashi abutukiile ku mulume wakwe kabili amwebele ati: “Moneni! Ulya muntu uwaishile kuli ine bulya bushiku aisa na kabili.”+
11 Lyena Manoa aliimine aya pamo no mukashi wakwe. Ilyo afikile kuli uyu mwaume amwipwishe ati: “Bushe nimwe mwalandile no mukashi wandi?” Na o amwaswike ati: “Nine.”
12 E lyo Manoa amwebele ati: “Lekeni ifyo mwalandile fikacitike! Bushe uyu mwana akaba shani, kabili mulimo nshi akalabomba?”+
13 E ico malaika wa kwa Yehova aebele Manoa ati: “Umukashi obe afwile ukukonka fyonse ifyo namwebele.+
14 Tafwile ukulya fyonse ififuma ku mwangashi, tafwile ukunwa umwangashi nelyo ubwalwa,+ kabili talingile ukulya icakowela nangu cimo.+ Alekonka fyonse ifyo namwebele.”
15 Nomba Manoa aebele malaika wa kwa Yehova ati: “Mukwai ikaleni tumupekanishisheko akana ka mbushi.”+
16 Lelo malaika wa kwa Yehova aebele Manoa ati: “Nangu njikale nshalye ifya kulya fyobe; lelo nga ulefwaya ukutuulila Yehova umutuulo wa koca, kuti watuula.” Manoa taishibe ukuti ali ni Malaika wa kwa Yehova.
17 Lyena Manoa aebele malaika wa kwa Yehova ati: “Nimwe bani ishina,+ pa kuti tukamucindike ilyo ifyo mwalandile fikacitika?”
18 Lelo malaika wa kwa Yehova amwebele ati: “Cinshi ulefwaila ukwishibila ishina lyandi? Lishina lya kupapusha.”
19 Lyena Manoa abuulile akana ka mbushi no mutuulo wa ngano kabili afituulile kuli Yehova pa cilibwe. Kabili alecita* icipesha amano ninshi Manoa no mukashi wakwe balemonako.
20 Ilyo ulubingu lwaimine pa ciipailo lwaya mu muulu, malaika wa kwa Yehova aile ku muulu mu lubingu ulwafumine pa ciipailo ninshi Manoa no mukashi wakwe balemonako. Ilyo line fye bawile ubukupeme.
21 Malaika wa kwa Yehova tamoneke na kabili kuli Manoa no mukashi wakwe. Lyena Manoa aishileiluka ukuti kanshi ali ni malaika wa kwa Yehova.+
22 Lyena Manoa aebele umukashi wakwe ati: “Nangu cibe shani twalafwa, pantu natumona Lesa.”+
23 Lelo umukashi wakwe amwebele ati: “Yehova nga alefwaya ukutwipaya, nga tapokelele umutuulo wa koca+ no mutuulo wa ngano uo tumutuulile, nga tatulangile fyonse ifi, kabili nga tatwebele fyonse ifi.”
24 Pa numa, uyu mwanakashi alifyele umwana umwaume kabili amwinike ati Samsone;+ kabili ilyo umwana alekula, Yehova alemupaala.
25 Mu kupita kwa nshita umupashi wa kwa Yehova watendeke ukumucincisha+ ninshi ali mu Mahane-dani+ iyali pa kati ka Sora na Eshtaole.+
Amafutunoti
^ Mu ciHebere, “ilyo akafuma fye mwi fumo.”
^ Mu ciHebere, “ilyo akafuma fye mwi fumo.”
^ E kutila Lesa alecita.
