Abapingushi 15:1-20
-
Samsone alandula abaPelishiti (1-20)
15 Ilyo papitile inshita, mu nshiku sha kuseepa ingano, Samsone aile mu kutandalila umukashi wakwe, kabili alisendele na kana ka mbushi. Atile: “Ndefwaya ukumona umukashi wandi mu muputule wa kulaalamo.”* Lelo shifyala tamusuminishe ukwingila.
2 Shifyala amwebele ati: “Ine naleti, ‘Ufwile walimupata.’+ E co namufiishe ku nshindishi yobe.+ Bushe umwaice wakwe tawama ukumucila? E o upilemo fye.”
3 Lelo Samsone amwebele ati: “Uno muku wena abaPelishiti tabakampeele umulandu nga nabacita ububi.”
4 E ico Samsone aileikata bamumbwe 300. Lyena abuulile ifyenge, abuula na bamumbwe babili babili e lyo alabakaka imicila pamo, alabika ne cenge pa kati ka micila ibili iyo akakile.
5 Lyena ayashishe ifyenge kabili alekele bamumbwe baya mu mabala ya ngano aya baPelishiti. Alyocele fyonse ukutendekela ku myanshi* ukufika na ku ngano isho bali bashilaseepa kumo na mabala ya myangashi na ya miolife.
6 AbaPelishiti baipwishe abati: “Nani acitile ifi?” Lyena babebele abati: “Ni Samsone shifyala wa mwina Timuna, pantu aufishe umukashi wa kwa Samsone ku nshindishi yakwe.”+ E ico abaPelishiti baileoca ulya mwanakashi na ba mu ng’anda ya kwa wishi.+
7 Lyena Samsone abebele ati: “Apo mwacita ifi, nshalekepo fye mpaka nkalandule.”+
8 Lyena alipeye abaPelishiti abengi nga nshi, kabili aile mu kwikala mu lucengo lwa Etamu.
9 Pa numa abaPelishiti bailepanga inkambi mu Yuda kabili batampile ukulapitana mu Lehi.+
10 Lyena abaume ba mu Yuda babepwishe abati: “Cinshi mwaishila mu kulwa na ifwe?” Nabo babaswike abati: “Twishile mu kwikata* Samsone pa kuti tumucite nge fyo atucitile.”
11 E ico abaume ba mu Yuda 3,000 baile ku lucengo lwa Etamu kabili baebele Samsone abati: “Bushe tawaishiba ukuti abaPelishiti e batuteka?+ Cinshi watucitila ifi?” E lyo abaswike ati: “Ifyo bancitile na ine e fyo mbacitile.”
12 Lelo bamwebele abati: “Twishile mu ku kwikata* pa kuti tukutwale ku baPelishiti.” Lyena Samsone abebele ati: “Lapeni ukuti tamwansanse.”
13 Bamwebele abati: “Awe, tatwakwipaye iyo, twalakukaka fye, e lyo tukutwale ku baPelishiti.”
E ico balimukakile ne myando ibili iipya, bamufumya na mu lucengo.
14 Ilyo afikile ku Lehi, abaPelishiti baliweleshe kabili balisekelele ilyo bamumwene. Lyena umupashi wa kwa Yehova walengele aba na maka+ ica kuti imyando bamukakile ku maboko yasangwike nge nsalu iyapya ku mulilo, kabili yaiponene fye ku maboko yakwe.+
15 Nomba amwene umubango wa mpunda uubishi; aliubulile kabili aipaileko abaume 1,000.+
16 Lyena Samsone alandile ati:
“Ku mubango wa mpunda naipailako abalwani kabili nabatuulika imiina!
Ku mubango wa mpunda naipailako abaume 1,000.”+
17 Ilyo apwishishe ukulanda, apoosele umubango kabili ainike ilya ncende ati Ramatilehi.*+
18 Lyena icilaka calimwikete sana, kabili alilile kuli Yehova ati: “Nimwe mwacilenga ukuti ne mubomfi wenu ncimfye. Nomba bushe mwalaleka mfwe ku cilaka kabili abashasembululwa banjipaye?”
19 E ico Lesa alengele pa ncende apali apafonka mu Lehi palepuke, kabili amenshi yalifumine.+ Ilyo anwene, amaka* yalibwelele kabili alipuupuutwike. E co ainikile ilya ncende ati En-hakore,* iyaba mu Lehi ukushinta na lelo.
20 Kabili ali kapingula wa bena Israele mu nshiku sha baPelishiti pa myaka 20.+
Amafutunoti
^ Nelyo “mu muputule wa mu kati.”
^ Nelyo “imipo.”
^ Nelyo “mu kukaka.”
^ Nelyo “kukaka.”
^ Ilyalola mu kuti “Akapili ka Mubango.”
^ Mu ciHebere, “umupashi walibwelele.”
^ Ilyalola mu kuti, “Akamfukumfuku ka Uuleita.”