Abapingushi 18:1-31
18 Muli shilya nshiku mu Israele tamwali imfumu.+ Kabili muli shilya inshiku aba mu mukowa wa kwa Dani+ balefwaya impanga ya kwikalamo, pantu na pali ilya ine nshita ninshi bena tabalakwata impanga ya kwikalamo nge fyo aba mu mikowa imbi iya bena Israele bakwete.+
2 E ico aba mu mukowa wa kwa Dani batumine abaume 5 aba mu lupwa lwabo, aba maka, abafumine mu Sora na mu Eshtaole,+ mu kufwaya incende apakwikala no kumona ifyo yaba. Babebele abati: “Kabiyeni, kafwayeni incende apakwikala kabili mukamone ne fyo yaba.” Ilyo bafikile mu citungu ca mpili ica kwa Efraimu, baile ku ng’anda ya kwa Mika+ kabili e ko baleele.
3 Ilyo bapaleme ku ng’anda ya kwa Mika, baumfwile ishiwi* lya mulumendo umwina Lebi, e lyo baya kuli ena kabili balamwipusha abati: “Nani akuletele kuno? Finshi ulecita kuno? Cinshi ulefwaya kuno?”
4 Lyena alibalondolwelele ifyo Mika amucitiile kabili abebele ati: “Mika anjebele ukuti mbe shimapepo wakwe, e lyo alendipila.”+
5 Lyena bamwebele abati: “Shi twipushisheko kuli Lesa pa kuti twishibe nga tukenda bwino nelyo iyo.”
6 Shimapepo abebele ati: “Kabiyeni umutende. Yehova aleba na imwe pa lwendo lwenu.”
7 E ico abaume 5 balile, bayafika na ku Laishi.+ Bamwene ukuti abantu abali kulya balikwete fyonse ifyo balekabila nge fyo abena Sidone bali. Baleikala umutende kabili takwali uwalebatiinya,+ takwali no walesansa icalo cabo pa kuti alebacusha. Uko baleikala kwali ukutali sana no kwaleikala abena Sidone, kabili tabalebombela pamo na bantu bambi.
8 Ilyo babwelelemo kuli bamunyinabo ku Sora na ku Eshtaole,+ bamunyinabo babepwishe abati: “Mwaendele shani?”
9 Babaswike abati: “Natuyebasansa, pantu natumona ukuti icalo cisuma nga nshi. Cinshi muleshimunukila? Mwishingashinga ukuyapoka icalo.
10 Ilyo mukafika, mukamona ukuti abantu baikala ku matwi tondolo,+ kabili icalo cikalamba. Lesa napeela icalo cabo mu minwe yenu. Muli ici calo mwaliba fyonse ifyo umuntu engakabila pano isonde.”+
11 Lyena abaume 600 aba mu mukowa wa kwa Dani abaipangeshe ne fyanso fya nkondo, balifumine mu Sora na mu Eshtaole.+
12 Bailepanga inkambi pa Kiriati-yearimu+ mu Yuda. E co bainikila ilya ncende iyabela ku masamba ya Kiriati-yearimu ukuti Mahane-dani*+ ukufika na lelo.
13 Ilyo bafumine kulya, baile ku citungu ca mpili ica kwa Efraimu kabili baile ku ng’anda ya kwa Mika.+
14 Lyena abaume 5 abailelengula icalo ca Laishi+ baebele bamunyinabo abati: “Bushe mwalishiba ukuti muli aya mayanda mwaliba ica kufwala ca efode ne fimpashanya fibili?+ Nomba tontonkanyeni ifyo mwalacitapo.”
15 E ico baile ku ng’anda ya mulumendo umwina Lebi,+ uwaleikala mupepi ne ng’anda ya kwa Mika, e lyo balamuposha.
16 Pali iyi nshita abaume 600 aba mu mukowa wa kwa Dani+ abaipangeshe ne fyanso fya nkondo, baiminine fye pa mpongolo.
17 Abaume 5 abailelengula icalo+ balingile mu ng’anda ya kwa Mika pa kuti basende icimpashanya icabaswa, ica kufwala ca efode,+ utulubi twa terafimu*+ ne cimpashanya ico baenga.+ (Shimapepo+ aiminine pa mpongolo na baume 600 abaipangeshe ne fyanso fya nkondo.)
18 Baingile mu ng’anda ya kwa Mika no kusenda icimpashanya icabaswa, ica kufwala ca efode, utulubi twa terafimu* ne cimpashanya ico baenga. Lyena shimapepo abepwishe ati: “Finshi mulecita?”
19 Lelo bamwebele abati: “Ikala tondolo. Leka ukulanda, kabili natuleya pa kuti uyeba impanda mano* yesu kabili shimapepo wesu. Bushe icawamapo ni ciisa, utwalilile ukuba shimapepo wa ng’anda ya muntu umo+ nelyo uyeba shimapepo wa mukowa umwaba indupwa ishingi mu Israele?”+
20 E ico shimapepo alitemenwe ifyo bamwebele, kabili abuulile ica kufwala ca efode, utulubi twa terafimu* ne cimpashanya icabaswa+ e lyo aya pamo na ba bantu.
21 Lyena balyalwike balola no ko baleya, batangisha na bana, ifitekwa ne fipe fya mutengo.
22 Baendeleko fye intamfu iinono ukufuma ku ng’anda ya kwa Mika, abantu abali mu mayanda yali mupepi ne ng’anda ya kwa Mika balilongene pamo e lyo bakonka aba mu mukowa wa kwa Dani kabili balibasangile.
23 Ilyo bababilikishe, balipilibwike kabili baebele Mika abati: “Cinshi ulefwaya? Cinshi walonganikila aba bantu pamo?”
24 E ico abebele ati: “Namunsendela tulesa uto napangile, namusenda na shimapepo. Finshi nshele na fyo? Inga kuti mwanjipusha shani amuti, ‘Cinshi ulefwaya?’”
25 Aba mu mukowa wa kwa Dani bamwebele abati: “Wilatupaatila, pantu abaume abakalipe* kuti bakwimina ica kuti bakwipaila pamo na ba mu ng’anda yobe.”
26 E ico aba mu mukowa wa kwa Dani balitwalilile ukwenda; kabili ilyo Mika amwene ukuti bali na maka ukumucila, alibwelelemo ku ng’anda ku mwakwe.
27 Ilyo basendele ifyo Mika apangile na shimapepo wakwe, baile ku Laishi,+ ukwali abantu abaikele umutende kabili abashakwete nangu umo uwa kubatiinya.+ Balibepeye ku lupanga, baoca no musumba.
28 Takwali nangu umo uwa kubapokolola, pantu umusumba wali ukutali no musumba wa Sidone, kabili tabalebombela pamo na bantu bambi, kabili umusumba wali mu mupokapoka* wa mu Beterehobo.+ Lyena aba mu mukowa wa kwa Dani bakuulile umusumba cipya cipya batendeka no kwikalamo.
29 Kabili bainike ulya musumba ati Dani,+ ilyali ishina lya wali icikolwe cabo, uwali umwana wa kwa Israele.+ Lelo uyu musumba kale balewita ukuti Laishi.+
30 Pa numa, aba mu mukowa wa kwa Dani baimike icimpashanya icabaswa,+ kabili Yonatani+ umwana wa kwa Gershomu,+ umwana wa kwa Mose, pamo na bana bakwe e baishileba bashimapepo ba ba mu mukowa wa kwa Dani mpaka ubushiku basendele aba mu musumba mu kuyaba bankole.
31 Kabili baimike icimpashanya icabaswa ico Mika apangile, kabili cali palya pene inshiku shonse isho ing’anda ya kwa Lesa wa cine yali mu Shilo.+
Amafutunoti
^ Nelyo “imilandile ya.”
^ Ilyalola mu kuti “Inkambi ya kwa Dani.”
^ Nelyo “tulesa twa mu ng’anda; ifimpashanya ifyo balebomfya pa kupepa.”
^ Nelyo “tulesa twa mu ng’anda; ifimpashanya ifyo balebomfya pa kupepa.”
^ Mu ciHebere, “shifwe.”
^ Nelyo “tulesa twa mu ng’anda; ifimpashanya ifyo balebomfya pa kupepa.”
^ Nelyo “abaume aba myeo ya cipyu.”
^ Nelyo “impanga iyabatama.”
