Abapingushi 3:1-31
3 Ishi e nko isho Yehova alekele ukuti shishale mu calo pa kuti esesheko abena Israele bonse abashaliko ilyo mu Kanaani mwali inkondo+
2 (ico acitiile ifi ni co alefwaya aba mu nkulo sha bena Israele ishakonkelepo beshibe ifya kulwa inkondo, e kutila abashaishibe ifya kulwa inkondo):
3 bakateka 5 aba baPelishiti,+ na bena Kanaani bonse, abena Sidone+ na bena Hibi+ abaikele mu Lupili lwa Lebanone+ ukufuma ku Lupili lwa Baali-hermone ukuyafika fye na ku Lebohamati.*+
4 Ico ashiliile ishi inko mu calo ni co alefwaya ukwesha abena Israele pa kuti amone nga bali no kukonka amafunde ya kwa Yehova ayo apeele bashibo ukupitila muli Mose.+
5 E ico abena Israele baleikala na bena Kanaani,+ abena Hiti, abena Amore, abena Perisi, abena Hibi na bena Yebusi.
6 Baleupa abana banakashi ba ishi inko, kabili baleufya abana babo abanakashi ku bana baume ba ishi inko, kabili batendeke ukubombela balesa ba shiko.+
7 E ico abena Israele balecita ifyabipa mu menso ya kwa Yehova, balilabile Yehova Lesa wabo kabili balepepa ba Baali+ ne fimuti ifyo baimike.*+
8 E ico ubukali bwa kwa Yehova ububilima ngo mulilo bwaishile pa bena Israele, kabili abapeele* mu minwe ya kwa Kushani-rishataimu imfumu ya ku Mesopotamia.* Abena Israele babombeele Kushani-rishataimu pa myaka 8.
9 Ilyo abena Israele balilile kuli Yehova,+ Yehova alisalile uwa kubapususha.+ Asalile Oteniele+ umwana wa kwa Kenasi, umwaice wa kwa Kalebu.
10 Umupashi wa kwa Yehova waishile pali ena,+ kabili aishileba kapingula wa bena Israele. Ilyo aile mu kulwa inkondo, Yehova apeele Kushani-rishataimu imfumu ya Mesopotamia* mu minwe yakwe ica kuti acimfishe Kushani-rishataimu.
11 Lyena mu calo mwali umutende pa myaka 40. Pa numa Oteniele umwana wa kwa Kenasi alifwile.
12 Na kabili abena Israele batendeke ukucita ifyabipa mu menso ya kwa Yehova.+ E ico Yehova alekele Egelone imfumu ya ku Moabu+ akwata amaka pa bena Israele, pantu balecita ifyabipa mu menso ya kwa Yehova.
13 Kabili Egelone aumene akapi na bena Amone+ na bena Amaleke+ pa kuti babalwishe. Balisanshile abena Israele babapoka no musumba wa tuncindu.+
14 Abena Israele babombeele Egelone imfumu ya ku Moabu pa myaka 18.+
15 Lyena abena Israele balilile kuli Yehova.+ E ico Yehova asalile uwa kubapususha.+ Asalile Ehudi+ umwana wa kwa Gera, umwina Benjamini+ uwalebomfya ukuboko kwa ku kuso.+ Mu kupita kwa nshita, abena Israele batumine Ehudi ukuti atwalile Egelone imfumu ya ku Moabu umutuulo.
16 Nomba Ehudi afulile ulupanga ulwatwa konse konse, kabili lwalepele umukono umo.* Alukakiile pe tanta lya ku kulyo mu ca kufwala cakwe.
17 Lyena apeele Egelone imfumu ya Moabu umutuulo. Nomba Egelone ali uwaina nga nshi.
18 Ilyo Ehudi apeele imfumu umutuulo, alibwelelemo pamo na basendele umutuulo.
19 Lelo ilyo bafikile pa fimpashanya* mu Gilgali,+ ena alibwelulwike kabili aebele imfumu ati: “Mwe mfumu, ndefwaya ukumwebako ilyashi lya nkaama.” E ico imfumu yatile: “Bonse fumeni muno!” Lyena ababomfi ba iko bonse balifumine.
20 E ico Ehudi aile kuli yena ninshi nayikala mu muputule wa iko uwa pa muulu umwatalala. E lyo ayeba ati: “Nimukwatila amashiwi ayafumine kuli Lesa.” E ico yalimine pa cipuna ca iko ica bufumu.
21 Lyena Ehudi apishishe ukuboko kwakwe ukwa ku kuso kwi tanta lyakwe ilya ku kulyo, asomona no lupanga e lyo alasa imfumu mu lufumo.
22 Ne citubo calingile kabili amafuta yalicilike apaingilile ulupanga, pantu tasomwene ulupanga mu lufumo lwa iko no busali bwalifumine.
23 Lyena Ehudi afumiine pa windo,* pa numa ya kwisala ifiibi fya muputule wa pa muulu no kufikoma.
24 Ilyo afumine, ababomfi ba mfumu balibwelele kabili bamwene ukuti ifiibi fya mu muputule wa pa muulu fyalikomenwe. E ico batile: “Ifwile ileyafwilisha* mu muputule wa mu kati umuli umwela watalala.”
25 Kanshi balelolela fye mpaka basakamana, kabili ilyo bamwene ukuti taileisula ifiibi fya muputule wa pa muulu, babuulile amakii no kufikomonona, kabili bamwene shikulwibo nawa panshi nafwa!
26 Ehudi alifyukile ilyo balewayawaya, kabili alipitile pa fimpashanya*+ ayafika na ku Seira umutende.
27 Ilyo afikile, alishishe ipenga+ mu citungu ca mpili ica Efraimu;+ kabili abena Israele bafumine nankwe mu citungu ca mpili ninshi ali pa ntanshi yabo.
28 Lyena abebele ati: “Nkonkeni pantu Yehova napeela abalwani benu, abena Moabu, mu minwe yenu.” E ico balimukonkele kabili bailepoka ifyabu fya Yordani pa kuti balwishe bwino abena Moabu, kabili takwali nangu umo uo balekele ayabuka.
29 Pali ilya nshita baipeye abaume abena Moabu nalimo 10,000.+ Aba abaume bonse bali abakosa kabili aba maka; takwali nangu umo uwapuswike.+
30 Pali bulya bushiku abena Israele balicimfishe abena Moabu; kabili mu calo mwali umutende pa myaka 80.+
31 Kapingula uwakonkelepo ni Shamigari+ umwana wa kwa Anati, uwaipeye abaume abaPelishiti 600+ ku ca kusonkwelako ing’ombe.+ Uyu kapingula na o alipuswishe abena Israele.
Amafutunoti
^ Nelyo “apa kwingilila mu Hamati.”
^ Mu ciHebere, “abashitishe.”
^ Mu ciHebere, “Aramu-naharaimu.”
^ Mu ciHebere, “Aramu.”
^ Uyu umukono walepele amasentimita nalimo 38. Moneni Ifyebo Fyalundwako pa B14.
^ Nelyo kuti lyapilibula no kuti, “apo baleimba amabwe.”
^ Nelyo kuti lyapilibula no kuti, “apakwingilila umwela.”
^ Mu ciHebere, “ileifimba amakasa.”
^ Nelyo kuti lyapilibula no kuti, “apo baleimba amabwe.”
