Abapingushi 6:1-40
6 Lelo abena Israele batendeke ukucita ifyabipa mu menso ya kwa Yehova na kabili.+ E ico Yehova abapeele mu minwe ya bena Midiani pa myaka 7.+
2 Abena Midiani balecusha abena Israele.+ Pa mulandu wa bena Midiani, abena Israele baipangiile umwa kufisama* mu mpili, mu ncengo na mu ncende umo abantu bashingafika.+
3 Abena Israele nga babyala imbuto, abena Midiani na bena Amaleke+ na bena Kabanga+ balebasansa.
4 Balepangila abena Israele inkambi pa kuti babasanse kabili baleonaula ifisabo fya mu calo cabo ukuyafika fye na ku Gasa. Tabalebashilamo ifya kulya nangu fimo nelyo fye ni mpaanga nelyo ing’ombe nangu ni mpunda.+
5 Pantu baleisa ne fitekwa fyabo na matenti yabo, kabili baleba abengi kwati ni makanta.+ Bena ne ngamila shabo baleba iminshipendwa,+ kabili baleisa mu calo mu kuconaula.
6 E ico abena Israele baliculile nga nshi pa mulandu wa bena Midiani; kabili abena Israele balilile kuli Yehova.+
7 Ilyo abena Israele balilile kuli Yehova pa mulandu wa bena Midiani,+
8 Yehova atumiine abena Israele kasesema kabili abebele ati: “Ifi e fyo Yehova Lesa wa kwa Israele alandile, ‘Namufumishe mu Egupti, mu ng’anda ya busha.+
9 E ico nalimupuswishe ku bena Egupti na kuli bonse abalemucusha kabili nalimutamfiisheko abalwani benu pa kuti imupeele icalo cabo.+
10 Kabili namwebele ukuti: “Nine Yehova Lesa wenu.+ Tamufwile ukulatiina balesa ba bena Amore abene ba calo muleikalamo.”+ Lelo tamwang’umfwilile.’”*+
11 Pa numa malaika wa kwa Yehova alishile+ kabili aikele mwi samba lya cimuti icikalamba icali mu Ofra, icali ca kwa Yoashi umwina Abiesere.+ Gideone umwana wakwe umwaume+ alesokola ingano umwa kukamina imyangashi pa kuti ashifise ku bena Midiani.
12 Malaika wa kwa Yehova amoneke kuli ena kabili amwebele ati: “Yehova ali na iwe,+ we mushilika wa maka.”
13 E lyo Gideone amwebele ati: “Iye mwe shikulu, nomba nga ca kuti Yehova aba na ifwe, cinshi calenga ifyabipa fyonse ifi filetucitikila?+ Bushe ifipesha amano fyakwe fyonse ifyo bashifwe batushimikile+ abati, ‘Yehova atufumishe mu Egupti,’ fili kwi?+ Nomba Yehova natulekelesha,+ kabili natupeela mu minwe ya bena Midiani.”
14 Yehova alimuloleshe e lyo amweba ati: “Kabiye uyebomfya amaka yobe ku kupususha Israele mu minwe ya bena Midiani,+ pantu nine nakutuma.”
15 Gideone amwebele ati: “Iye mwe Yehova. Kuti napususha shani Israele? Moneni! Umukowa* wandi e wacepesha pa bena Manase, kabili nine nacepesha pa ba mu ng’anda ya kwa tata.”
16 Lelo Yehova amwebele ati: “Apo nkaba na iwe,+ ukacimfya abena Midiani kwati muntu umo fye ulecimfya.”
17 Lyena amwebele ati: “Nga nine mwasala ukuti mombe uyu mulimo, nangeni icishibilo icalalenga nshininkishe ukuti nimwe mulelanda na ine.
18 Shi mwifuma pano mpaka imuletele ubupe.”+ Na o amwebele ati: “Nalaikala pano pene mpaka ubwele.”
19 Awe Gideone ailepekanya akana ka mbushi kabili abulile itepe* lya buunga bwa ngano apangamo ne mikate iishatutumuka.+ Abikile inama mu museke, umuto aubikile mu mpoto; lyena alimutwalile mwi samba lya cimuti icikalamba.
20 Nomba malaika wa kwa Lesa wa cine amwebele ati: “Senda inama no mukate uushatutumuka uye ufibike pali cilya icilibwe icikalamba, witulwilepo no muto.” Kabili ifi fine e fyo acitile.
21 Lyena malaika wa kwa Yehova akumishe inkonto iyo aikete pa nama ne mikate iishatutumuka, kabili umulilo wafumine mu cilibwe waoca inama ne mikate iishatutumuka.+ Lyena malaika wa kwa Yehova alilubile.
22 E lyo Gideone ailwike ukuti uo ali nankwe ni malaika wa kwa Yehova.+
Ilyo line Gideone alandile ati: “Iye mwe Shikulu Mulopwe Yehova, namona malaika wa kwa Yehova na menso yandi!”*+
23 Lelo Yehova amwebele ati: “Umutende ube na iwe. Witiina;+ tawafwe iyo.”
24 E ico Gideone akuuliile Yehova iciipailo palya pene, kabili baciita ukuti Yehova-shalomu*+ ukufika na lelo. Cicili mu Ofra, umusumba wa bena Abiesere.
25 Bulya bwine bushiku mu nshita ya bushiku Yehova amwebele ati: “Senda ing’ombe iilume iyana, iya kwa wiso, e kutila ing’ombe yalenga bubili iya myaka 7, kabili ubongolole iciipailo ca kwa Baali ica kwa wiso, uputaule ne cimuti ca kupepelapo* ico aimika mupepi ne ci ciipailo.+
26 Nga wapwisha ukukuulila Yehova Lesa obe iciipailo pali ulu ulupili na mabwe ayo utantike bwino, usende ing’ombe iilume iyana iyalenga bubili uituule umutuulo wa koca pa nkuni sha cimuti ca kupepelapo* ico uputawile.”
27 E ico Gideone asendele abaume 10 pa babomfi bakwe kabili alicitile ifyo Yehova amwebele. Nomba apo aletiina sana aba mu ng’anda ya kwa wishi na baume ba mu musumba, tacitile ifi akasuba, aficitile ubushiku.
28 Ilyo abaume ba mu musumba bashibwike ulucelocelo, bamwene iciipailo ca kwa Baali nabacibongolola ne cimuti ca kupepelapo* ico baimike nabacitema, kabili bamwene ing’ombe iilume iyana iya bubili nabaituula ilambo pa ciipailo ico bakuulile.
29 E lyo balaipushanya abati: “Nani acitile ifi?” Ilyo bafwailishe, batile: “Ni Gideone mwana Yoashi e wacitile ifi.”
30 E ico abaume ba mu musumba baebele Yoashi abati: “Fumya umwana obe pa kuti tumwipaye, pantu alibongolola iciipailo ca kwa Baali, kabili alitema icimuti ca kupepelapo* icaimikwe mupepi ne ciipailo.”
31 Lyena Yoashi+ aebele bonse abamwimiine ati: “Bushe mufwile ukucingilila Baali? Bushe mulingile ukumupokolola? Onse uulecingilila Baali twalamwipaya luno lucelo.+ Baali nga ni Lesa, lekeni aipokolole umwine,+ apo umuntu alibongolola iciipailo cakwe.”
32 Kabili pali bulya bushiku ainike Gideone ukuti Yerubaali,* pantu atile: “Lekeni Baali aipokolole umwine, pantu umuntu nabongolola iciipailo cakwe.”
33 Abena Midiani+ bonse na bena Amaleke+ na ba ku Kabanga baumene akapi;+ kabili balyabwike umumana bayapanga inkambi mu Mupokapoka* wa Yesreele.
34 Lyena umupashi wa kwa Yehova waishile* pali Gideone+ kabili alishishe intandala,+ kabili abena Abiesere+ balishile mu kumutungilila.
35 Atumine inkombe ku bena Manase bonse, kabili nabo bene balimutungilile. Na kabili atumine inkombe ku bena Ashere, ku bena Sebuluni na ku bena Naftali, kabili balishile kuli ena.
36 Lyena Gideone aebele Lesa wa cine ati: “Nga ca kuti mulepusushisha Israele muli ine nga fintu mulaile,+
37 moneni nalabika amasako ya mpaanga apa kupumina ingano. Nga ca kuti umume waikala fye ku masako yeka e lyo pa mushili pena pashale apauma, nalaishiba ukuti mukapusushisha Israele muli ine, nge fyo mulaile.”
38 Kabili ifi fine e fyacitike. Ilyo ashibwike ubushiku bwakonkelepo ulucelo, akamine amasako, kabili mwafumine amenshi ayengesula imbale yafonka iikalamba.
39 Lelo Gideone aebele Lesa wa cine ati: “Shi mwimfulilwa, lekeni nande na kabili umuku fye umo. Shi lekeni momfye amasako ya mpaanga pa kuti njeshe na kabili. Shi lekeni amasako ya mpaanga yeka yome, e lyo pa mushili ponse pabe umume.”
40 E ico ifi fine e fyo Lesa acitile ubushiku; amasako ya mpaanga e yaumine fye, lelo pa mushili ponse pali umume.
Amafutunoti
^ Nelyo kuti lyapilibula no kuti, “amatala ya panshi.”
^ Mu ciHebere, “tamwaumfwile ishiwi lyandi.”
^ Mu ciHebere, “Ikana lyandi.”
^ Mwi tepe mwaleingila amalita 22. Moneni Ifyebo Fyalundwako pa B14.
^ Mu ciHebere, “twamonana na malaika wa kwa Yehova icinso ne cinso.”
^ Ilyalola mu kuti “Yehova wa Mutende.”
^ Moneni Amashiwi ya mu Baibo ne fyo Yapilibula.”
^ Ilyalola mu kuti “Lekeni Baali Aipokolole.”
^ Nelyo “Impanga Iyabatama iya.”
^ Mu ciHebere, “wafimbile.”
