Abapingushi 7:1-25
7 Lyena Yerubaali, e kutila Gideone,+ na bashilika bonse abo ali nabo, baimine lucelocelo bayapanga inkambi pa Kamfukumfuku ka Harode, lelo inkambi ya bena Midiani yena yabelele ku kapinda ka ku kuso aka kwa Gideone, pa kapili ka More, mu mupokapoka.*
2 E lyo Yehova aebele Gideone ati: “Abashilika abo uli nabo nabafulisha. Nga napeela abena Midiani mu minwe yabo,+ nalimo abena Israele bakalaitakisha ukuti bacimfiishe abalwani babo ku maka yabo.+
3 Nomba eba abashilika auti, ‘Onse uuletiina kabili uuletutuma abwelelemo ku ng’anda.’”+ E ico ilyo Gideone abeseshe, abashilika 22,000 balibwelelemo ku ng’anda, kwashele fye abali 10,000.
4 Na lyo line Yehova aebele Gideone ati: “Abantu bacili nabafulisha. Batwale ku mulonga uleke mbeshe kulya kwine. Uo nakweba nati, ‘Uyu uleya nankwe,’ e o walaya nankwe, lelo uo nakweba nati, ‘Uyu tawaye nankwe,’ ninshi tawaye nankwe.”
5 E ico atwele abashilika ku mulonga.
Lyena Yehova aebele Gideone ati: “Bonse abalekabaula amenshi ku lulimi nga filya imbwa ikabaula, ubabike beka, kabili bonse abalefukama pa kunwa, nabo ubabike beka.”
6 Abashilika abakabawile amenshi mu lupi bali 300. Lelo abashala bena balifukeme pa kunwa amenshi.
7 Nomba Yehova aebele Gideone ati: “Abashilika 300 abacikabaula amenshi ku lulimi e bo nkabomfya pa kumupususha, kabili nkapeela abena Midiani mu minwe yobe.+ Lelo uleke abashilika abashala babwelelemo ku mayanda.”
8 E ico ilyo bapokele aba abashilika ifya kulya ne ntandala, Gideone abebele ukuti babwelelemo ku mayanda, kabili ashele fye na bashilika 300. Inkambi ya bena Midiani yali mwi samba lya nkambi ya kwa Gideone mu mpanga iyabatama.+
9 Mu nshita ya bushiku Yehova aebele Gideone ati: “Ima kasanse abalwani mu nkambi, pantu nimbapeela mu minwe yobe.+
10 Lelo nga uletiina ukuyabasansa, kabiye ku nkambi na Pura umubomfi obe.
11 Uyeumfwa ifyo balelanda, lyena walashipa* ica kuti mwalayasansa abali mu nkambi.” Awe ena na Pura umubomfi wakwe baile ku mbali ya nkambi ya balwani babo.
12 Nomba abena Midiani na bena Amaleke na bena Kabanga bonse+ abali abengi nga makanta, bali mu mpanga iyabatama, kabili ingamila shabo shali iminshipendwa,+ ishingi ngo mucanga wa mu lulamba lwa bemba.
13 Nomba Gideone aliileko, kabili kwali umwaume uwaleshimikila umunankwe iciloto. Alemushimikila ati: “Umfwa ifyo ndotele. Nacilota umukate uwabulungana uwa barle ulekunkulukila mu nkambi yesu. Ilyo wacifika pe tenti, wacilipunka na maka ica kuti lyawa no kuwa.+ Lyena wacilipilibula, lyabongoloka no kubongoloka.”
14 E lyo umunankwe amwebele ati: “Nangu cibe shani, ulu lupanga lwa kwa Gideone+ umwana wa kwa Yoashi, umwina Israele. Lesa napeela fwe bena Midiani na bashilika besu bonse mu minwe yakwe.”+
15 Ilyo Gideone aumfwile fye iciloto no bupilibulo bwa ciko,+ alifukeme alapepa. Pa numa, abwelele ku nkambi ya bena Israele no kubeba ati: “Imeni, pantu Yehova napeela abena Midiani na bashilika babo bonse mu minwe yenu.”
16 Lyena ayakenye abashilika 300 mu mabumba yatatu kabili bonse abapeele intandala+ ne mitondo iikalamba, kabili mu kati ka mitondo mwali ifyenge.*
17 E lyo abebele ati: “Mulemona ifyo ndecita, kabili na imwe ifyo fine e fyo mulecita. Nga nafika ku mbali ya nkambi, mufwile ukucita ifyo ndeyacita.
18 Ine pamo na bonse abo ndi nabo nga twalisha intandala, na imwe mulingile ukulisha intandala ninshi namushinguluka inkambi yonse, kabili mufwile ukupunda amuti, ‘Ulupanga lwa kwa Yehova no lwa kwa Gideone!’”
19 Gideone na bashilika 100 abo ali nabo bafikile ku mbali ya nkambi ilyo ubulinde bwa pa kati ka bushiku bwatendeke,* ninshi e lyo bapwisha fye ukubika abalinshi pa fifulo fyabo ifya kubombelapo. Balishishe intandala+ no kutobaula imitondo iikalamba iyo basendele.+
20 E ico abashilika abali mu mabumba yatatu balishishe intandala no kutobaula imitondo iikalamba. Baikatile ifyenge ku maboko ya ku kuso, kabili ku maboko ya ku kulyo baikatileko intandala isho balelisha, kabili balepunda abati: “Ulupanga lwa kwa Yehova no lwa kwa Gideone!”
21 Ilyo balecita ifi, cila muntu ali apo aiminine ninshi nabashinguluka inkambi yonse, kabili abashilika bonse aba bena Midiani balifulumwike ninshi balepunda.+
22 Abashilika 300 bakonkenyepo ukulisha intandala, kabili Yehova alengele abashilika mu nkambi yonse balaipayana;+ kabili balifulumwike ukuyafika na ku Bete-shita, na ku Serera, bailefika fye na ku mbali ya Abele-mehola+ mupepi na ku Tabati.
23 Kabili Gideone aitile abaume ba mu Israele aba mu mukowa wa kwa Naftali, uwa kwa Ashere na bonse aba mu mukowa wa kwa Manase,+ kabili bapepeke abena Midiani.
24 Gideone atumine inkombe mu citungu ca mpili conse ica kwa Efraimu, kabili shaile-eba abantu ashiti: “Kabiyeni muyesansa abena Midiani kabili muyebacilikila pa fyabu fya tumana ukufika na ku Bete-bara na ku Yordani.” E ico abaume bonse aba muli Efraimu balilongene, kabili babacilikiile pa fyabu fya tumana ukufika na ku Bete-bara na ku Yordani.
25 Kabili baikete bacilolo babili aba ku Midiani, e kutila Orebu na Seebu. Baipaile Orebu pa cilibwe ca Orebu,+ e lyo Seebu ena bamwipaile apo balekamina imyangashi pa Seebu. Bakonkenyepo ukukonka abena Midiani,+ kabili baletele umutwe wa kwa Orebu no wa kwa Seebu kuli Gideone mu citungu ca Yordani.
Amafutunoti
^ Nelyo “impanga iyabatama.”
^ Mu ciHebere, “amaboko yenu yalakosa.”
^ E kutila ifya kusanikilako.
^ Ubu “bulinde bwa pa kati ka bushiku” bwaletendeka pa 10 koloko ya bushiku, kabili bwalepwa pa 2 koloko ya bushiku.
