Abapingushi 8:1-35
8 Lyena abaume abena Efraimu bamwebele abati: “Cinshi wacitiile ifi? Cinshi tawatwitiile ilyo waleya mu kulwisha abena Midiani?”+ Kabili balyumene nankwe sana.+
2 Lelo Gideone abebele ati: “Bushe ico ncitile nacicila pa fyo imwe mwacita? Bushe imyangashi abena Efraimu batolelesha+ tayacila imyangashi iyo abena Abiesere basombola?+
3 Lesa apeele bacilolo ba kwa Midiani, Orebu na Seebu,+ mu minwe yenu. Bushe ico ncitile nacicila pa fyo imwe mwacita?” Ilyo alandile aya mashiwi, balitekele imitima.*
4 Lyena Gideone afikile ku mumana wa Yordani kabili alyabwike. Ena pamo na bashilika 300 balinakile, lelo balitwalilile ukukonka abalwani babo.
5 E ico aebele abaume abena Sukote ati: “Shi peeleniko abantu abo ndi nabo umukate, pantu nabanaka kabili tulekonka Seba na Salimuna, imfumu sha ku Midiani.”
6 Lelo bacilolo ba bena Sukote bamwebele abati: “Bushe nawikata Seba na Salimuna pa kuti tupeele abashilika bobe umukate?”
7 E lyo Gideone atile: “Pali ifi mwalanda, nkamufopawilapo ku fimuti fya myunga ifya mu matololo na kuli ficilasa+ ilyo Yehova akapeela Seba na Salimuna mu minwe yandi.”
8 Ilyo afumine ku Sukote aile ku Penuele kabili alombele fimo fine, lelo abena Penuele nabo bamwaswike filya fine abaume ba ku Sukote bamwaswike.
9 E ico abaume ba ku Penuele nabo abebele ati: “Nga nabwela umutende, nkesabongolola ulu lupungu.”+
10 Nomba Seba na Salimuna bali mu Karkore pamo na bashilika babo, abali nalimo 15,000. Aba e bashilika bonse abashele pa bashilika abena Kabanga,+ pantu abashilika 120,000 abaipangeshe na bapanga balibepeye.
11 Gideone alekonka fye inshila ya baleikala mu matenti ku kabanga ka Noba na Yogebea,+ kabili asanshile abali mu nkambi mu kupumikisha.
12 Ilyo Seba na Salimuna, imfumu sha ku Midiani bafulumwike, alibakonkele no kubekata, na bashilika bonse balipelenganishiwe.
13 Lyena Gideone umwana wa kwa Yoashi alibwelulwike ku nkondo, apitile mu kashila kaya ku Herese.
14 Mu nshila aikete umulumendo umwina Sukote e lyo alamwipusha fimo. E ico umulumendo amulembeele amashina ya bacilolo na mashina ya ntungulushi sha mu Sukote. Amulembeele amashina ya baume 77.
15 E lyo aile ku baume ba mu Sukote no kubeba ati: “Moneni ninjikata Seba na Salimuna abo mwansaalwililepo amuti: ‘Bushe nawikata Seba na Salimuna pa kuti tupeele abashilika bobe abanakile umukate?’”+
16 Lyena asendele abakalamba ba mu musumba wa bena Sukote kabili abafopawilile ku fimuti fya myunga ifya mu matololo na kuli ficilasa.+
17 Lyena abongolwele ulupungu lwa ku Penuele,+ aipaya na baume ba muli uyu musumba.
18 Nomba aipwishe Seba na Salimuna ati: “Bushe abaume mwaipeye mu Tabore balemoneka shani?” Bamwaswike abati: “Balemoneka nge fi fine ulemoneka, bonse balemoneka nga bana ba mfumu.”
19 E lyo abebele ati: “Bali ni bamunyinane, abo nafyelwe nabo inda imo. Na pali Yehova, amukanabepaya, na ine nga namuleka mwaba no mweo.”
20 Lyena aebele Yetere ibeli lyakwe ati: “Ima ubepaye.” Lelo umulumendo tasomwene ulupanga lwakwe; aletiina pantu ali mwaice.
21 E ico Seba na Salimuna bamwebele abati: “Nga uli mwaume, iwe wine ima utwipaye.” Lyena Gideone aliimine abepaya+ kabili afumishe utubekobeko* mu mikoshi ya ngamila shabo.
22 Pa numa abena Israele baebele Gideone abati: “Iwe no mwana obe no mwishikulu obe mutampe ukututeka, pantu walitupususha ku bena Midiani.”+
23 Lelo Gideone abebele ati: “Ine nshakamuteke kabili umwana wandi na o takamuteke. Yehova e ukamuteka.”+
24 Gideone akonkenyepo ukubeba ati: “Lekeni imulombeko icintu cimo: pa fintu ifyo cila muntu apokolwele, ampeelepo isikiyo lya kufwala ku moona.” (Pantu abo bacimfishe balikwete amasikiyo ya kufwala ku moona aya golde, ico bali bena Ishmaele.)+
25 Nabo bamwebele abati: “Twalakupeela.” Awe bayanshike insalu kabili cila muntu apooselepo isikiyo lya kufwala ku moona ukufuma pa fintu ifyo apokolwele.
26 Amasikiyo ya kufwala ku moona aya golde ayo alombele yafinine amashekele* ya golde 1,700, kabili balimupeele no tubekobeko,* amasikiyo, ifya kufwala fya nsalu yakashikila ifyo imfumu sha ku Midiani shalefwala pamo no tumaceni uto bafumishe mu mikoshi ya ngamila.+
27 Gideone apangiilemo efode+ aibika na mu musumba wakwe mu Ofra;+ kabili abena Israele bonse batendeke ukupepa* iyi efode,+ ica kuti yaishileba iciteyo kuli Gideone na ku ba mu ng’anda yakwe.+
28 E fyo abena Israele bacimfishe abena Midiani,+ kabili tababwekeshepo ukwimina* abena Israele; lyena mu calo mwali umutende pa myaka 40 mu nshiku sha kwa Gideone.+
29 E ico Yerubaali+ umwana wa kwa Yoashi alibwelelemo ku ng’anda ku mwakwe e ko alaikala.
30 Gideone akwete abana abaume 70,* pantu aupile abanakashi abengi.
31 Kanakashi wakwe uwali mu Shekemu na o amufyalile umwana umwaume, kabili amwinike ati Abimeleke.+
32 Kabili Gideone umwana wa kwa Yoashi alifwile pa numa ya kwikala imyaka iingi, kabili bamushiikile mu nshiishi ya kwa wishi Yoashi, mu musumba wa Ofra, uwa bena Abiesere.+
33 Ilyo fye Gideone afwile, abena Israele batendeke ukupepa* ba Baali+ na kabili, kabili babulile Baali-beriti e waba lesa wabo.+
34 Abena Israele tabaibukishe Yehova Lesa wabo,+ uwabapuswishe ku balwani babo bonse ababashingulwike;+
35 kabili tabalangile aba mu ng’anda ya kwa Yerubaali, e kutila Gideone, ukutemwa ukushipwa pa fisuma fyonse ifyo acitiile abena Israele.+
Amafutunoti
^ Mu ciHebere, “imipashi yabo yalilekele ukumumanya.”
^ Utu utubekobeko twalemoneka nga filya umweshi uba nga wamoneka.
^ Utu utubekobeko twalemoneka nga filya umweshi uba nga wamoneka.
^ Ishekele limo lyalefina amagramu ukucilako panono pali 11. Moneni Ifyebo Fyalundwako pa B14.
^ Mu ciHebere, “batendeke ukucita ubucende.”
^ Mu ciHebere, “ukwimisha abena Israele imitwe.”
^ Mu ciHebere, “akwete abana abaume 70 abafumine mwi tanta lyakwe.”
^ Mu ciHebere, “batendeke ukucita ubucende na.”
