Abapingushi 9:1-57
9 Mu kupita kwa nshita Abimeleke+ umwana wa kwa Yerubaali aile ku Shekemu kuli banalume, kabili abebele pamo na balupwa ba kwa shikulu wakwe* bonse ati:
2 “Shi ipusheni intungulushi* shonse mu Shekemu amuti, ‘Cinshi cingamuwamina, abana bonse abaume aba kwa Yerubaali 70+ balemuteka nelyo umwaume umo e o alemuteka? Kabili mwilaba ukuti ndi fupa lyenu kabili umunofu wenu.’”*
3 E ico banalume bamulandiileko ifi ku ntungulushi shonse isha mu Shekemu, kabili imitima ya shiko yali pali Abimeleke, pantu shatile: “Ni munyinefwe.”
4 Lyena bamupeele indalama sha silfere 70 isho bafumishe mu ng’anda* ya kwa Baali-beriti,+ kabili Abimeleke ashibomfeshe ku kulipila abaume abashakwete ifya kucita kabili ifinangwa, pa kuti bamushindike.
5 Pa numa aile ku ng’anda ya kwa wishi ku Ofra+ no kwipaya bamunyina,+ abana ba kwa Yerubaali abaume 70 pe libwe limo line. Uwapuswike fye ni Yotamu umwaice pa bana ba kwa Yerubaali bonse pantu alibeleme.
6 Lyena intungulushi shonse isha mu Shekemu na bonse aba mu Betemilo balongene pamo kabili babikile Abimeleke pa bufumu,+ mupepi ne cimuti icikalamba, mupepi no luceshi ulwali mu Shekemu.
7 Ilyo bashimikile Yotamu ifi, ilyo line fye aileiminina pa muulu wa Lupili lwa Gerisimu+ kabili abilikishe intungulushi ati: “Ng’umfweni, mwe ntungulushi sha mu Shekemu, lyena Lesa alakutika kuli imwe.
8 “Bushiku bumo ifimuti fyaile mu kusuba icimuti ica kuti cibe imfumu pali fyena. E ico fyaebele umuolife afiti, ‘Ube imfumu yesu.’+
9 Lelo umuolife waebele ifi ifimuti auti, ‘Bushe ndeke ukufumya amafuta yandi ayo babomfya pa kucindika Lesa na bantu, indeya mu kupungila pa fimuti fimbi?’
10 Lyena ifi ifimuti fyaebele umukunyu afiti, ‘Isa ube imfumu yesu.’
11 Lelo umukunyu wa-aswike auti, ‘Bushe ndeke ukutwala ifisabo fyandi ifyalowa kabili ifisuma, indeya mu kupungila pa fimuti fimbi?’
12 E lyo ifimuti fyaebele icimuti ca mwangashi afiti, ‘Isa niwe ube imfumu yesu.’
13 Icimuti ca mwangashi na co caebele ifimuti aciti, ‘Bushe ndeke ukufumya umwangashi wandi uupya uulenga Lesa na bantu balesekelela, indeya mu kupungila pa fimuti?’
14 Pa kulekelesha ifimuti fyonse fyaebele kalanangwa afiti, ‘Isa niwe ube imfumu yesu.’+
15 E lyo kalanangwa aebele ifimuti ati, ‘Nga cishinka mulensuba ukuba imfumu yenu, iseni muube mu cintelelwe candi. Lelo nga te ifyo, lekeni umulilo ufume muli kalanangwa kabili oce imikedari ya mu Lebanone.’
16 “Nomba bushe ifi mubikile Abimeleke pa bufumu+ namulungika? Bushe ifi mucitile filelanga ukuti namucitila Yerubaali na ba mu ng’anda yakwe ifisuma? Bushe ifi mucitile nafilingana ne fyo amucitiile?
17 Ilyo tata alemulwila,+ ali-ibikile mu kapoosa mweo pa kuti amulubule ku bena Midiani.+
18 Lelo buno bushiku namwimina aba mu ng’anda ya kwa tata kabili namwipaya abana bakwe abaume 70, pe libwe limo line.+ Lyena mwalenga Abimeleke, umwana wa mubomfi wakwe umwanakashi+ aba imfumu pa ntungulushi sha mu Shekemu pantu fye ni munyinenwe.
19 Nomba nga namulungika pa fyo mucitiile Yerubaali na ba mu ng’anda yakwe, sekeleleni pamo na Abimeleke kabili lekeni na o asekelele pamo na imwe.
20 Lelo nga tamulungike, umulilo naufume muli Abimeleke kabili oce intungulushi sha mu Shekemu na ba mu Betemilo,+ kabili umulilo naufume mu ntungulushi sha mu Shekemu na mu ba mu Betemilo oce Abimeleke.”+
21 Lyena Yotamu+ afulumukiile ku Beere, kabili kulya kwine e ko aikele pantu aletiina Abimeleke munyina.
22 Abimeleke atekele* abena Israele pa myaka itatu.
23 Lyena Lesa alengele* Abimeleke ne ntungulushi sha mu Shekemu baleka ukumfwana, kabili intungulushi sha mu Shekemu shabepele Abimeleke.
24 Ico acitiile ifi ni co alefwaya ukulandula pa bunkalwe bacitile ku bana ba kwa Yerubaali 70, pa kuti Abimeleke abe no mulandu wa mulopa pa kwipaya bamunyina,+ na pa kuti intungulushi sha mu Shekemu shibe no mulandu wa mulopa pantu shalimwafwile ukwipaya bamunyina.
25 E ico intungulushi sha mu Shekemu shatumine abaume aba kuyamubelamina pa muulu wa mpili, kabili onse uwapita mu musebo apo bali balemupoka ifyo akwete. Mu kupita kwa nshita kwali abaile-eba Abimeleke ifyo aba baume balecita.
26 Lyena Gaali umwana wa kwa Ebede na bamunyina baile mu Shekemu,+ kabili intungulushi sha mu Shekemu shalimucetekele.
27 Baile mu mabala yabo balonganika ne myangashi e lyo baikama kabili bapangile umutebeto. Pa numa baingile mu ng’anda ya kwa lesa wabo,+ balalya no kunwa e lyo balatiipwila Abimeleke.
28 Lyena Gaali umwana wa kwa Ebede alandile ati: “Finshi Abimeleke na Shekemu bali pa kuti tulebabombela? Bushe Abimeleke te mwana wa kwa Yerubaali,+ kabili bushe Sebuli te ntungulushi yakwe? Mulebombela abaume ba kwa Hamore, wishi wa kwa Shekemu! Inga cinshi ico tulingile ukulabombela Abimeleke?
29 Nga nine naletungulula aba bantu, nga nalifumya Abimeleke pali bucilolo.” Lyena aebele Abimeleke ati: “Fusha abashilika bobe kabili mwise tulwe.”
30 Ilyo Sebuli intungulushi ya musumba aumfwile ifyo Gaali umwana wa kwa Ebede alandile, alikalipe nga nshi.
31 E ico atumine inkombe kuli Abimeleke mu bumfisolo.* Shailemweba ashiti: “Umfweni! Gaali umwana wa kwa Ebede na bamunyina nomba bali mu Shekemu, kabili baletunka abantu ba mu musumba pa kuti bamwimine.
32 Nomba imwe na baume abo muli nabo mwime ubushiku, kabili muyebelama kunse ya musumba.
33 Akasuba nga katula fye, mukeme mukasanse umusumba; kabili abaume abo ali nabo nga bafuma pa kuti bamulwishe, mukacite fyonse ifyo mwingacita pa kuti mukamucimfye.”
34 E ico Abimeleke na bantu bonse abo ali nabo balimine ubushiku, kabili bailebelama kunse ya musumba wa Shekemu mu mabumba 4.
35 Ilyo Gaali umwana wa kwa Ebede afumine, aiminina na pa mpongolo ya musumba, Abimeleke na bantu ali nabo balisokolweke apo babeleme.
36 Ilyo Gaali amwene abantu, aebele Sebuli ati: “Mona! Abantu baletentemuka impili.” Lelo Sebuli amwebele ati: “Finshingwa fya mpili ulemona ukuti bantu.”
37 Na kabili Gaali alandile ati: “Mona! Abantu balefumina pa kati ka mpanga, kabili ibumba limo lileisa mu nshila iyapita mupepi ne cimuti icikalamba ica Meonenimu.”
38 E lyo Sebuli amwebele ati: “Bushe te iwe waleyumfwa auti ‘Finshi Abimeleke ali pa kuti tulemubombela?’+ Bushe aba te bantu abo wasuulile? Ale nomba kabiye ubalwishe.”
39 E ico Gaali atangilile intungulushi sha mu Shekemu kabili alwishishe Abimeleke.
40 Abimeleke alikonkele Gaali, kabili Gaali alifulumwike, kabili abengi balibepeye ica kuti ifitumbi fyabo fyafikile na ku mpongolo ya musumba.
41 Kabili Abimeleke atwalilile ukwikala mu Aruma, kabili Sebuli+ atamfishe Gaali na bamunyina mu Shekemu.
42 Ubushiku bwakonkelepo abantu balifumine mu musumba, kabili kwali abaile-eba Abimeleke.
43 E ico ayakenye abantu mu mabumba yatatu kabili babeleme mu mpanga. Ilyo amwene abantu balefuma mu musumba, alibasanshile no kubepaya.
44 Abimeleke na mabumba yakwe baileiminina pa mpongolo ya musumba, ninshi amabumba yabili yalesansa bonse abafumine mu musumba, kabili balibepeye.
45 Abimeleke alwile na ba muli ulya musumba akasuba konse kabili aliupokele. Alipeye abantu abalimo, e lyo abongolola umusumba+ aitilamo no mucele.
46 Ilyo intungulushi shonse ishaleikala mu lupungu lwa Shekemu shaumfwile ifi, ilyo line fye shaile mu muputule wa panshi ya ng’anda* ya kwa Elberiti.+
47 Ilyo bashimikile fye Abimeleke ukuti intungulushi shonse isha mu lupungu lwa Shekemu shalilongene pamo,
48 Abimeleke na baume bonse abo ali nabo baninine Ulupili lwa Salmone. Abimeleke abuulile isembe atema umusambo wa cimuti, awimya aubika pa kubeya e lyo aeba abantu abo ali nabo ati: “Ifyo mwacimona nacita, na imwe angufyanyeni citeni filya fine!”
49 E ico abantu bonse nabo batemene imisambo kabili bakonkele Abimeleke. Lyena bailetuulika imisambo pa muputule wa panshi, bakoshapo no mulilo. E ico abantu bonse abali mu lupungu lwa Shekemu nabo balifwile. Abaume na banakashi abafwile bali nalimo 1,000.
50 Lyena Abimeleke aile ku musumba wa Tebese; aileshinga uyu musumba e lyo aupoka.
51 Pa kati ka uyu musumba pali ulupungu ulwakosa, kabili e mo abaume na banakashi bonse kumo ne ntungulushi sha mu musumba bafulumukile. Bali-ikomene e lyo banina pa mutenge wa lupungu.
52 Abimeleke apaleme ku lupungu pa kuti alonaule, kabili aile pa mwinshi wa lupungu pa kuti aloce.
53 Lyena umwanakashi umo aponeeshe ilibwe lya kupelelako pa mutwe wa kwa Abimeleke, kabili icipanga calitobeke.+
54 Bwangu bwangu Abimeleke aitile umubomfi uwamusendeele ifyanso kabili amwebele ati: “Somona ulupanga lobe unjipaye pa kuti abantu bekatila, ‘Umwanakashi e wamwipeye.’” E ico umubomfi wakwe alimulashile ulupanga, afwa no kufwa.
55 Ilyo abaume ba mu Israele bamwene ukuti Abimeleke nafwa, bonse balibwelelemo ku mwabo.
56 E fyo Lesa alandwile Abimeleke pa fyabipa ifyo acitile wishi pa mulandu wa kuti alipeye bamunyina 70.+
57 Na kabili Lesa alilandwile abaume ba mu Shekemu pa fyabipa fyonse ifyo bacitile. E ico icitiipu ca kwa Yotamu+ umwana wa kwa Yerubaali+ caishile pali bena.
Amafutunoti
^ Mu ciHebere, “ulupwa lwa mu ng’anda ya kwa wishi wa kwa nyina.”
^ Nelyo kuti lyapilibula no kuti, “abene ba calo.”
^ Nelyo “ndi mulopa wenu.”
^ Nelyo “mwi tempele lya.”
^ Nelyo “ali cilolo pa.”
^ Mu ciHebere, “atumine umupashi wabipa uwalengele.”
^ Nelyo “mu bucenjeshi.”
^ Nelyo “itempele.”
