Amalumbo 22:1-31
Ku mukalamba wa bakemba; ulwa “Nsebula Iikota iya ku Macaca.” Ulwimbo lwa kwa Davidi.
22 Lesa wandi, Lesa wandi, cinshi mwandekelesesha?+
Cinshi ico mushileishila mu kumpususha,Cinshi mushileumfwila ukulilishika kwandi?+
2 Mwe Lesa wandi, ndilila kuli imwe akasuba, lelo tamunjasuka;+Kabili ubushiku nshiikala tondolo, ntwalilila fye ukulilila kuli imwe.
3 Lelo imwe muli ba mushilo,+Amalumbo ayo abena Israele bamulumbanya yalimushinguluka.*
4 Bashifwe balimucetekele;+Balimucetekele kabili mwalebapususha.+
5 Balilile kuli imwe, kabili mwalibapuswishe;Balimucetekele kabili tamwabalekeleshe.*+
6 Lelo ine ndi mwambo, nshili muntu,Abantu balampumya* kabili balinsuula.+
7 Bonse abamona, balampumya;+Balanda kutumfya kutumfya, balapukunya ne mitwe, e lyo balelanda abati:+
8 “Alicetekele Yehova. Lekeni amupusushe!
Apo alimutemwa nga nshi, lekeni amupusushe!”+
9 Nimwe mwamfumishe mwi fumo muli mayo,+Nimwe mwanengele ndeumfwa ukuti nalicingililwa ilyo mayo aleng’onsha.
10 Ukufuma fye ilyo nafyelwe mulansakamana;*Ukutula fye ilyo nali mu nda muli mayo nimwe Lesa wandi.
11 Mwintaluka, pantu amafya yali mupepi,+Kabili nshikwete umbi uwa kungafwa.+
12 Ing’ombe ishilume ishingi nashinshinguluka;+Ing’ombe ishilume isha maka isha ku Bashani nashinshinguluka.+
13 Shanjasamwina utunwa twa shiko,+Nge nkalamo iilebuluma kabili iilesantaula inama ikete.+
14 Nabampongolola nga menshi;Amafupa yandi yonse nayasokoka umo yasuntinkanina.
Umutima wandi uli nge pula;+Wasunguluka mu cifuba candi.+
15 Amaka yandi nayapwa, ndi nge cipimfya ca mutondo uwatobeka;+Ululimi lwandi lwakambatila ku fiponshi;+Mulentwala mu lukungu lwa mfwa.+
16 Pantu abalwani nabanshinguluka nge mbwa;+Ibumba lya bacita ifyabipa lilepalamina kuli ine,+Balesumaula iminwe yandi na makasa nge nkalamo.+
17 Kuti napenda amafupa yandi yonse.+
Abalwani balamona kabili balandolekesha.
18 Ba-akana ifya kufwala fyandi,Kabili bapendula pa kwakana ica kufwala candi.+
19 Lelo imwe, mwe Yehova, mwintaluka.+
Nimwe maka yandi, angufyanyeni ukungafwa.+
20 Mpususheni* ku lupanga,Pokololeni umweo wandi* ku maala* ya mbwa;+
21 Mpususheni ku kanwa ka nkalamo,+ na ku nsengo sha mboo;Njasukeni kabili mpususheni.
22 Nkabilisha ishina lyenu kuli bamunyinane;+Pa bantu abalongene pamo e po nkamulumbanishisha.+
23 Mwe batiina Yehova, mulumbanyeni!
Imwe bonse mwe bana* ba kwa Yakobo, mucindikeni!+
Mutiineni imwe bonse mwe bana* ba kwa Israele.
24 Pantu tasuula nelyo ukulekelesha uo bacusha;+Tafisa icinso cakwe kuli ena.+
Ilyo alilile kuli ena ukuti amwafwe, alyumfwile.+
25 Nkamulumbanishisha pa bantu abengi abalongene pamo;+Nkafikilisha imilapo yandi pa ntanshi ya bamutiina.
26 Abafuuka bakalya no kwikuta;+Abafwaya Yehova bakamulumbanya.+
Mube ne nsansa* umuyayaya.
27 Bonse abaikala ku mpela she sonde bakebukisha Yehova kabili bakesa kuli ena.
Indupwa shonse isha nko shikamukontamina.+
28 Pantu Yehova ni Mfumu;+E uteka inko.
29 Abakankaala* ba pano isonde bonse bakalya kabili bakakontama;Bonse abatentemukila ku lukungu bakamufukamina;Takuli nangu umo uwingapususha umweo wakwe.
30 Abakatuntuka muli bena* bakamubombela;Aba mu nkulo iikakonkapo bakabebako pali Yehova.
31 Bakabila pa fyalungama ifyo acita.
Bakeba abantu abakafyalwa ifyo acita.
Amafutunoti
^ Nelyo “mwabikwa pa.”
^ Nelyo “tamwabalengele insoni.”
^ Nelyo “balanseebanya.”
^ Mu ciHebere, “bampoosa pali imwe.”
^ Nelyo “Pususheni umweo wandi.”
^ Mu ciHebere, “umo fye uo nakwata,” e kutila umweo wakwe nelyo ubumi.
^ Mu ciHebere, “ukuboko.”
^ Mu ciHebere, “ulubuto.”
^ Mu ciHebere, “ulubuto.”
^ Mu ciHebere, “Imitima yenu ibe no bumi.”
^ Mu ciHebere, “Abaina.”
^ Mu ciHebere, “ulubuto.”
