Amalumbo 35:1-28
Ulwimbo lwa kwa Davidi.
35 Mwe Yehova ndubulwileniko umulandu ku balendwisha;+Lweni na balwa na ine.+
2 Buuleni inkwela iinono* ne ikalamba,+Mwise mu kungafwa.+
3 Buuleni ifumo ne sembe lya kulwilako inkondo* muye mu kulwisha abalwani bandi.+
Njebeni amuti:* “Nine ipusukilo lyobe.”+
4 Nabomfwe insoni abalelunga umweo wandi kabili nabaseebane.+
Abalepanga ukundofya nababwelelemo ninshi nabaseebana.
5 Lekeni babe nge misungu iyo baleulula ku mwela;Malaika wa kwa Yehova nabatamfye.+
6 Inshila yabo naifiiteKabili naitelele ilyo malaika wa kwa Yehova alebapepeka.
7 Pantu bateya isumbu apafisama pa kuti banjikate apabula umulandu;Banyimbila* icilindi apabula umulandu.
8 Ifyabipa nafimucitikile mu kupumikisha,Naekatwe mwi sumbu ilyo ateyele pa kuti anjikate;Naponenemo no kufwa.+
9 Lelo ine* nkasekelela pa mulandu wa fyo Yehova acita;Nkasekelela pantu alimpuswishe.
10 Amafupa yandi yonse yakalanda ayati:
“Mwe Yehova, nani uwaba nga imwe?
Mulapususha uushakwata bakumwafwa ku bamucila amaka;+Mulapususha uushakwata bakumwafwa no mupiina ku babebila.”+
11 Bakambone ababifi baima pa kuti banshinine,+Balenjipusha pa fintu ifyo nshaishiba no kwishiba.
12 Balancita ifyabipa pa fisuma ifyo mbacitila,+Balenga naba no bulanda* ubo uwafwilwa akwata.
13 Lelo ilyo balwele, nafwele insamu;Nalefunga pa kuti ncushe umweo wandi,Kabili ilyo Lesa asha-aswike ipepo lyandi,*
14 Nale-enda ninshi ndeloosha filya ningaloosha cibusa wandi nelyo munyinane;Nalikonteme ninshi ndi no bulanda, bulya umuntu akwata nga aleloosha nyina.
15 Nomba ilyo naipunwine balisekelele kabili balilongene pamo;Balongene pamo pa kuti bansanse ukwabula ukwibukila;Balinsantawile kabili tabaikele tondolo.
16 Abashitiina Lesa balampumya,*Balasumanya ameno pa mulandu wa kuti balamfulilwa.+
17 Mwe Yehova, bushe mwakulalolesha fye ukwabula ukucitapo nangu cimo?+
Mpokololeni* ku balensansa,+Pokololeni umweo wandi* ku nkalamo ishana isha masense.*+
18 Lyena nkamutootela mu lukuta ulukalamba;+Pa bantu abengi e po nkamulumbanishisha.
19 Mwileka abandwisha apabula umulandu basekelele pa filencitikila;Mwileka abampata apabula umulandu+ balempumya.*+
20 Pantu tabalanda ifingalenga kwaba umutende;Lelo balapangila abekala umutende ifya bucenjeshi.+
21 Basamuna utunwa twabo pa kumbepesha,Batila: “Te apa nomba! Amenso yesu yaimwena.”
22 Namumona mwe Yehova ificitike. Mwi-ikala tondolo.+
Mwe Yehova, mwi-italusha kuli ine.+
23 Buukeni kabili imeni, pa kuti munandileko ku balempeela imilandu,Mwe Yehova Lesa wandi ndubulwileniko.
24 Mpinguleni ukulingana no bulungami bwenu,+ mwe Yehova Lesa wandi,Mwileka abalwani bandi basekelele pa fyo ndecula.
25 Mwileka balande mu mitima yabo abati: “Eya! Ifi e fyo twalefwaya.”*
Belanda no kuti: “Natumumina.”+
26 Lekeni bonse bomfwe insoni kabili baseebane,Bonse abasekelela pa fyo ncula.
Lekeni abaitutumuna pali ine bomfwe insoni kabili baseebane.
27 Lelo abasekelela pa mulandu wa kuti nalilungama, bena nabasansamuke;Nabalelanda lyonse abati:
“Lekeni Yehova acindikwe, uusekelela pa mulandu wa kuti umubomfi wakwe ali no mutende.”+
28 Lyena ululimi lwandi lukalanda* pa bulungami bwenu+Kabili nkamulumbanya akasuba konse.+
Amafutunoti
^ Ilingi line abalebomfya iyi inkwela bantu abalepoosa imifwi.
^ Nelyo “isembe ilyatwa kubili.”
^ Nelyo “Ebeni umweo wandi amuti.”
^ Nelyo “Baimbila umweo wandi.”
^ Nelyo “umweo wandi.”
^ Nelyo “Balenga umweo wandi waba no bulanda.”
^ Nelyo “ilyo ipepo lyabwelele pa cifuba candi.”
^ Nelyo kuti yapilibula no kuti, “Abashitiina Lesa balampumisha pali keke.”
^ Nelyo “Pokololeni umweo wandi.”
^ Mu ciHebere, “umo fye uo nakwata,” e kutila umweo wakwe, nelyo ubumi.
^ Nelyo “imisepela ya nkalamo.”
^ Nelyo “baleimya ifipenipeni fyabo pa kumpumya.”
^ Nelyo “Eya! Ifi e fyo umweo wesu walefwaya.”
^ Nelyo “lukalanda mu kantepentepe.”
