Amalumbo 89:1-52
Maskili* ya kwa Etani+ umwina Esera.
89 Nkemba umuyayaya pa fyo Yehova acita ifilanga ukuti aliba no kutemwa ukushipwa.
Ku kanwa kandi nkalenga aba mu nkulo shonse bakeshibe ukuti muli ba cishinka.
2 Pantu natila: “Ukutemwa kwenu ukushipwa kukabako umuyayaya,+Kabili mwalilenga icishinka cenu cabako umuyayaya nga filya imyulu yabako umuyayaya.”
3 “Nimpangana icipangano na Davidi, umubomfi wandi uo nasala;+Nindapa kuli ena nati:+
4 ‘Nkalenga umwana*+ obe akabeko umuyayaya,Kabili nkalenga icipuna cobe ica bufumu cikabeko ku nkulo shonse.’”+ (Selah)
5 Imyulu ilamulumbanya mwe Yehova, pa mulandu wa fipesha amano ifyo mwacita,Ilamulumbanya mu lukuta lwa ba mushilo, pa mulandu wa kuti muli ba cishinka.
6 Pantu nani mu muulu uwalingana na Yehova?+
Nani pa bana baume ba kwa Lesa+ uwaba nga Yehova?
7 Aba mwi bumba* lya ba mushilo balatiina Lesa;+Mukulu kabili bonse abamushinguluka balamutiina.+
8 Mwe Yehova Lesa wa mabumba,Nani uwaba na maka nga imwe, mwe Jah?+
Muli ba cishinka muli fyonse.+
9 Mwalikwata amaka pali bemba iilulunkene;+Amabimbi nga yaima mulayatalalika.+
10 Mwalicimfya Rahabu+ no kumwipaya kwati muntu uo bepeye ku lupanga.+
Mwalisalanganya abalwani benu ku kuboko kwenu ukwa maka.+
11 Imyulu yenu, ne sonde na lyo lyenu;+Icalo na fyonse ifyabamo+ nimwe mwafipangile.
12 Nimwe mwapangile akapinda ka ku kuso na kapinda ka ku kulyo;Ulupili lwa Tabore+ no lwa Hermone,+ shilalumbanya ishina lyenu ninshi shilesekelela.
13 Ukuboko kwenu kwa maka;+Ukuboko kwenu kwalikosa;+Ukuboko kwenu ukwa ku kulyo kulacimfya.+
14 Ubulungami no bupingushi e mufula wa cipuna cenu ica Bufumu;+Ukutemwa ukushipwa ne cishinka fyaiminina pa ntanshi yenu.+
15 Ba nsansa abamulumbanya ninshi balesekelela.+
Bendela mu lubuuto lwa cinso cenu mwe Yehova.
16 Balasekelela akasuba konse pa mulandu we shina lyenu,Kabili balacindamikwa pa mulandu wa bulungami bwenu.
17 Pantu muli bukata bwa maka yesu,+Kabili tulakwatilako amaka* pa mulandu wa kuti mulatupaala.+
18 Pantu inkwela yesu ya kwa Yehova,Uwa Mushilo wa kwa Israele e mwine wa mfumu yesu.+
19 Pali ilya nshita mwalandile na baba ne cishinka kuli imwe mu cimonwa, kabili mwatile:
“Nimpeela impalume amaka;+Nincindamika uo nasala pa bantu.+
20 Ninsanga umubomfi wandi Davidi;+Nimusuba na mafuta yandi aya mushilo.+
21 Ukuboko kwandi kukamutungilila,+Kabili ukuboko kwandi kukamukosha.
22 Takwakabe umulwani uukamweba ukutuula umutuulo,Kabili takwakabe uushalungama uukamucusha.+
23 Nkashonaula abalwani bakwe ninshi alemonako+Kabili nkepaya abamupata.+
24 Nkamulanga ifyo naba ne cishinka no kutemwa ukushipwa,+Kabili akakwatilako amaka* pa mulandu we shina lyandi.
25 Nkabika ukuboko kwakwe* pali bemba,Kabili nkabika ukuboko kwakwe ukwa ku kulyo pa mimana.+
26 Akalanjita ati: ‘Nimwe Tata,Nimwe Lesa wandi kabili Icilibwe umo mpusukila.’+
27 Kabili nkalenga akabe ibeli lyandi,+Akacila imfumu shonse isha pano isonde.+
28 Nkamulanga ukutemwa ukushipwa umuyayaya,+Kabili nshakatobe icipangano napangana nankwe.+
29 Nkalenga umwana* wakwe akabeko umuyayayaKabili nkalenga icipuna cakwe ica bufumu cikabeko umuyayaya nga filya imyulu yabako umuyayaya.+
30 Abana bakwe nga baleka ukukonka amafunde yandiKabili nga baleka ukukonka ifyo nabeba ukulakonka,*
31 Nga bakaana ukukonka ifipope fyandiKabili nga batoba amafunde yandi,
32 Lyena nkabakandila ku nkonto+ pa mulandu wa bucintomfwa* bwabo,Kabili nkabafopaula pa mulandu wa filubo fyabo.
33 Lelo nkatwalilila ukumulanga ukutemwa ukushipwa,+Kabili nshakafilwe ukufikilisha ifyo nalaya.
34 Nshakatobe icipangano candi+Kabili nshakalule ifyo imilomo yandi yalandile.+
35 Ine ne wa mushilo nindapa umuku wa limo;Nshakabepe Davidi.+
36 Umwana* wakwe akabako umuyayaya;+Icipuna cakwe ica bufumu cikabako umuyayaya nga filya akasuba kabako umuyayaya.+
37 Cikabako umuyayaya,Nga filya umweshi uwaba nge nte ya cishinka wabako umuyayaya mu muulu.” (Selah)
38 Lelo imwe mwalimusuula kabili mwalimukaana;+Mwalifulilwa umuntu wenu uwasubwa.
39 Namusuula icipangano mwapangene no mubomfi wenu;Namusaalula icilongwe* cakwe filya mucipoosele panshi.
40 Namubongolola ifibumba fyakwe fyonse ifya mabwe;Namubongolola amalinga yakwe ayakosa.
41 Abapitanshila bonse nabamwibila ifipe;Naseebana ku bena mupalamano bakwe.+
42 Namulenga abalwani bakwe bamucimfya;*+Namulenga abalwani bakwe bonse basekelela.
43 Mwalilenga ulupanga lwakwe lwaleka ukubomba,Kabili tamumwafwilisha mu nkondo.
44 Mwalilenga ubucindami bwakwe bwapwaKabili mwalipoosa ne cipuna cakwe ica bufumu panshi.
45 Mwalipifya inshiku sha bulumendo bwakwe;Mwamufwika umuseebanya. (Selah)
46 Ni lilali mwe Yehova mukaleka ukufisama? Bushe mukatwalilila fye ukufisama?+
Bushe ubukali bwenu bukatwalilila fye ukubilima ngo mulilo?
47 Ibukisheni ifyo inshiku sha bumi bwandi shacepa!+
Bushe mwabumbiile abantu bonse apa fye?
48 Muntu nshi uushingafwa?+
Bushe kuti aipokolola* ku maka ya Nshiishi?* (Selah)
49 Mwe Yehova, cinshi mwalekela ukucita ifilanga ukuti mwaliba no kutemwa ukushipwa,Ifyo mwalaile Davidi pa mulandu wa kuti muli ba cishinka?+
50 Mwe Yehova, ibukisheni ifyo ababomfi benu balebapumya;Ifyo naleshipikisha* ilyo abantu bonse balempumya;
51 Ibukisheni ifyo abalwani balesaalula umuntu wenu uwasubwa, mwe Yehova;Ifyo balemusaalula pali fyonse ifyo alecita.
52 Yehova nacindikwe umuyayaya. Ameni. Ameni.+
Amafutunoti
^ Mu ciHebere, “ulubuto.”
^ Nelyo “ulukuta.”
^ Mu ciHebere, “tulemya ulusengo.”
^ Mu ciHebere, “tulemya ulusengo.”
^ Nelyo “amaka yakwe.”
^ Mu ciHebere, “ulubuto.”
^ Nelyo “ubupingushi bwandi.”
^ Nelyo “bucipondoka.”
^ Mu ciHebere, “Ulubuto.”
^ Nelyo “icisote ca bufumu.”
^ Mu ciHebere, “Namwimya ukuboko kwa ku kulyo ukwa balwani bakwe.”
^ Nelyo “kuti apokolola umweo wakwe.”
^ Mu ciHebere, “mu kuboko kwa Sheol,” e kutila inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “nalesendela ukupumya pa cifuba candi.”
