Amapinda 13:1-25
13 Umwana umwaume uwa mano alomfwa wishi nga amusalapula,+Lelo cintomfwa ena tomfwa nga bamukalipila.*+
2 Ifyo umuntu alanda fikalenga akalye ifisuma,+Lelo aba bucenjeshi balitemwa* ubunkalwe.
3 Uulama akanwa kakwe* alacingilila umweo wakwe.+Lelo uulandalanda akonaulwa.+
4 Umunang’ani alakumbwa ifintu ifingi, lelo takwata nangu cimo,*+Nomba uubombesha* akakwata ifingi.*+
5 Uwalungama alipata ubufi,+Lelo ifyo ababifi bacita filaleta insoni no museebanya.
6 Ubulungami bulacingilila uwa kaele,+Lelo ububifi bulawisha umubembu.
7 Kwaliba abacita kwati bakankaala lelo tabakwata nangu cimo;+Kwaliba na bacita kwati bapiina lelo balikwata ifyuma ifingi.
8 Ifyuma e filubula umweo wa mukankaala,+Lelo takwaba icitiinya umupiina.+
9 Ulubuuto lwa balungama lulasanika sana;*+Lelo inyali ya bacita ifyabipa bakaishimya.+
10 Ukuituntumba kulenga fye abantu balakansana,+Lelo abafwaya ukubapandako amano* e baba na mano.+
11 Ifyuma ifyo umuntu anonka mu lubilo fikapwa,+Lelo ifyuma ifyo umuntu anonka panono panono* fikafula.
12 Ico umuntu ale-enekela* nga cakokola ukucitika cilalwalika umutima,+Lelo ico alefwaya nga cacitika, ciba kwati cimuti ca mweo.+
13 Uusuula ifyo bamweba akacula,+Lelo uukonka amafunde bakamulambula.+
14 Ifyo uwa mano asambilisha* fyaba kwati kamfukumfuku ka mweo,+Kabili kuti fyapususha umuntu ku fiteyo fya mfwa.
15 Uwiluka sana, abantu balamutemwa,Lelo ifyo aba bucenjeshi bacita fileta amafya ayengi.
16 Uwa mano alacita ifilanga ukuti wa mano,+Lelo umuwelewele asokolola ubuwelewele bwakwe.+
17 Inkombe iibi ilaleta amafya,+Lelo intumi ya cishinka ilaleta ukundapa.+
18 Uukaana ukumusalapula alaba umupiina kabili alaseebana,Lelo uusumina ukumulungika bakamucindamika.+
19 Umuntu alatemwa* sana nga ca kuti ifyo alefwaya fyacitika,+Lelo umuwelewele tafwaya ukuleka ukucita ifyabipa.+
20 Uwenda na ba mano akaba uwa mano,+Lelo uwangala na bawelewele akacula.+
21 Icabipa cikonka ababembu,+Lelo abalungama balabalambula ifisuma.+
22 Umuntu umusuma alashiila abeshikulu bakwe ubupyani,Lelo icuma ca mubembu bakasungila uwalungama.+
23 Umupiina alasombola ifya kulya ifingi mu mabala yakwe,Lelo kuti bamupoka fyonse* pa mulandu wa lufyengo.
24 Uushibomfya inkonto* alipata umwana wakwe,+Lelo uwamutemwa alamusalapula.+
25 Uwalungama alakwata ifya kulya ifingi ica kuti alekuta,+Lelo mu lufumo lwa mubifi tamuba aka kulya nangu kamo.+
Amafutunoti
^ Nelyo “nga bamulungika.”
^ Nelyo “umweo wa ba bucenjeshi watemwa.”
^ Nelyo “ifyo alanda.”
^ Nelyo “umweo wakwe taukwata nangu cimo.”
^ Nelyo “umweo uubombesha.”
^ Mu ciHebere, “akena.”
^ Mu ciHebere, “lulasekelela.”
^ Nelyo “abapandishanya amano.”
^ Mu ciHebere, “alonganika ne minwe.”
^ Nelyo “alesubila.”
^ Nelyo “Amafunde ya wa mano.”
^ Nelyo “Umweo ulatemwa.”
^ Nelyo “kuti bamulofya.”
^ Nelyo “Uushisalapula; uushikanda.”
