Amapinda 20:1-30
20 Umwangashi ulenga umuntu alapumya abantu,+ ubwalwa bulenga umuntu afilwa ukuilama;+Onse uucita ifyabipa pa mulandu wa kuti nakolwa taba na mano.+
2 Imfumu ilalenga abantu batiina nga nshi, nga filya ukubuluma kwa nkalamo* kubatiinya;+Onse uulenga imfumu yakalipa, abika ubumi bwakwe mu kapoosa mweo.+
3 Umuntu uushifwaya ukukansana na bantu, balamucindika,+Lelo umuwelewele alangufyanya ukuitumpa mu fikansa.+
4 Nga kuli impepo umunang’ani talima,E ico mu nshita ya kusombola takwata nangu cimo, alombelesha fye.*+
5 Amatontonkanyo ya mu mutima wa muntu* yaba nga menshi mu cishima icitali,Lelo umuntu uwiluka e utapamo.
6 Abantu abengi balanda ukuti baliba no kutemwa ukushipwa,Lelo nani uwingasanga umuntu uwaba ne cishinka?
7 Uwalungama alaba uwa kaele muli fyonse ifyo alecita.+
Ba nsansa abana bakwe.*+
8 Imfumu nga yaikala pa cipuna ca iko pa kuti ipingule,+Amenso ya iko yaleshiba* ifibi fyonse.+
9 Nani uwingalanda ati: “Ningwamya umutima wandi;+Ninsanguluka ku lubembu lwandi”?+
10 Ifya kupiminako ukufina kwa fintu ifya bucenjeshi, ne fya kupiminako ifishalungama*—Yehova afimona ukuti fya bunani.+
11 Nangu fye mwana* bamwishibila ku fyo acita,Nga fyalisanguluka kabili nga fyalilungama.+
12 Ukutwi ukumfwa ne linso ilimona—Fyonse ni Yehova afipangile.+
13 Wilatemwisha ukulaala, pantu kuti waba umupiina.+
Shibatuka kabili walakwata ifya kulya ifingi.+
14 Uushita alanda ati, “Te cisuma, te cisuma!”Lyena nga aya, alaya mu kuitakisha pa fyo ashitile.+
15 Kwaliba golde na makorali* ayengi,Lelo akanwa akalanda ifya mano kalicindamapo.+
16 Poka ica kufwala ca muntu uwalaya ukulipililako umweni inkongole;+Mupoke icikatilo nga alaya ukulipililako umwanakashi umbi umbi* inkongole.+
17 Ifya kulya ifyo umuntu akwata mu bucenjeshi filawama,Nomba pa numa mu kanwa kakwe mwisula insakalabwe.+
18 Ukupandana amano kulenga ifyo abantu balepanga ukucita fyaenda bwino,+Kabili nga mwaya mu kulwa inkondo mulekonka ifyo balemweba.*+
19 Uwatemwa ulwambo alasokolola inkaama;+Wilaenda no watemwa ulwambo.*
20 Onse uutiipa bawishi na banyina,Inyali yakwe ikashima ilyo pakafiita.+
21 Nga ca kuti umuntu abalilapo ukunonka ifyuma muli bukaitemwe,Mu kulekelesha Lesa takamupaale.+
22 Wilalanda ati: “Nalalandula!”+
Ulelolela Yehova,+ na o akakupususha.+
23 Ifya kupiminako ukufina kwa fintu ifya bucenjeshi* Yehova afimona ukuti fya bunani;Na masekelo ya bucenjeshi te yasuma.
24 Yehova e utungulula intampulo sha muntu.+Bushe umuntu kuti aishiba inshila afwile ukuyamo?
25 Citeyo ku muntu nga ayangufyanya ukulanda ati, “Ca mushilo!”+
E lyo pa numa atontonkanya pa mulapo alapile.+
26 Imfumu ya mano ilalekanya ababifi na balungama+Nga filya balekanya imisungu ne ngano nga bapishapo umupeto wa cipuulilo.+
27 Umupu wa muntu ni nyali ya kwa Yehova,Ulafwayafwaya mu kati sana aka mubili wakwe.
28 Ukutemwa ukushipwa ne cishinka filacingilila imfumu;+Pa mulandu wa kuti yaliba no kutemwa ukushipwa, icipuna ca iko ica bufumu cilatwalilila ukubako.+
29 Ubusuma bwa balumendo maka yabo,+No bucindami bwa bakoloci ni mfwi shabo.+
30 Ifikwebululwa ne filonda, filalenga umuntu ataluka ifyabipa,+Kabili impumo shilasangulula umutima wa muntu.
Amafutunoti
^ Nelyo “inkalamo iyana iya masense.”
^ Nelyo kuti yapilibula no kuti, “mu nshita ya kusombola akalafwayafwaya, lelo takasange nangu cimo.”
^ Nelyo “ifyo umuntu afwaya ukucita.”
^ Mu ciHebere, “abana bakwe abaume.”
^ Nelyo “yalolulula.”
^ Nelyo “Amabwe yabili ayakupiminako ayapusana ne fipe fibili ifyakupiminako ifyapusana.”
^ Nelyo “umulumendo.”
^ Nelyo “uwafuma ku calo cimbi.”
^ Nelyo “ubutungulushi bwa mano.”
^ Nelyo “uusembelekela ku milomo yakwe.”
^ Nelyo “Amabwe yabili ayakupiminako ayapusana.”
