Amapinda 21:1-31
21 Umutima wa mfumu waba nge milonga mu minwe ya kwa Yehova.+
Aulosha konse uko alefwaya.+
2 Umuntu amona inshila shakwe shonse ukuti shalilungama,+Lelo Yehova e uceeceeta imitima ya bantu.*+
3 Ukucita ifyalungama no kuba no mulinganyaE fyo Yehova atemwa sana ukucila ilambo.+
4 Amenso ya cilumba no mutima uuitutumuna—Ni nyali ya bacita ifyabipa, lelo fyonse ifi lubembu.+
5 Ifyo uwacincila apanga ukucita filamwendela bwino,+Lelo bonse abacita ifintu lubilo lubilo ukwabula ukutontonkanyapo balola ku bupiina.+
6 Ukubepa ubufi pa kuti umuntu anonke ifyuma,Kwaba nga fubefube iileya ilepwa, kabili citeyo icipaya.*+
7 Ubunkalwe bwa babifi bukabapyanga,+Pantu tabafwaya ukuba no mulinganya.
8 Inshila ya ubembwike tayaololoka,Lelo ifyo uwasanguluka acita fyalilungama.+
9 Cawamapo ukwikala pa koona pa mutengeUkucila ukwikala mu ng’anda imo no mukashi uwatemwa ukuumana.+
10 Umubifi* alafwaisha ukucita ifyabipa;+Tomfwila umunankwe uluse.+
11 Uupumya nga bamukanda, uushaishiba ifingi alabelako na mano,Kabili uwa mano nga asambilila ukwiluka, aleshibilako na fimbi.*+
12 Lesa uwalungama alabebeta ing’anda ya mubifi;Alalenga umubifi acula.+
13 Onse uushumfwa ukulila kwa mupiina ukwa kuti bamwafwe,Na o akabilikisha, lelo takwakabe uukamwasuka.+
14 Ubupe bwa mu bumfisolo bulalenga umuntu anashako ubukali,+Na mafisakanwa ya mu bumfisolo* yalanasha icipyu.
15 Uwalungama alitemwa ukucita ifyalungama,+Lelo ababifi balipata ifyalungama.
16 Umuntu nga afuma mu nshila umo ukwiluka kumutungululaAkatuushisha pamo na bafwa.+
17 Uwatemwa ukwangala akaba umupiina;+No watemwa umwangashi na mafuta takabe umukankaala.
18 Umubifi e cilubula ca walungama,+Kabili uwa bucenjeshi bakamukanda, uwalungama tabakamukande.
19 Cawamapo ukwikala mu matololoUkucila ukwikala no mwanakashi uwatemwa ukuumana, kabili uukalipa bwangu.+
20 Mu ng’anda ya wa mano mwaba icuma icisuma na mafuta,+Lelo umuwelewele alonaula* ifyo akwata.+
21 Onse uuibikilishako ukucita icalungama no kuba no kutemwa ukushipwaAkasanga umweo, ubulungami no bucindami.+
22 Uwa mano kuti anina ifibumba* fya musumba wa ba makaKabili kuti abongolola ifibumba ifyakosa ifyo bacetekelamo.+
23 Uulama akanwa kakwe no lulimi lwakwe,Tailetela amafya.*+
24 Umuntu uwailekelesha, uushitontonkanya na pa fingafuma mu fyo acitaBamwita ukuti alaituntumba, wa cilumba kabili alayumfwa.+
25 Ico umunang’ani afwaisha e cikamwipaya,Pantu iminwe yakwe ilakaana ukubomba.+
26 Akasuba konse alafwaisha ifingi,Lelo uwalungama alapeela, kabili tatana nangu cimo.+
27 Lesa amona ilambo lya babifi ukuti lya bunani.+
Alacilanapo ukumona ukuti lya bunani, nga ca kuti uuletuula* ali na mapange yabipa!
28 Kambone wa bufi akafwa,+Lelo umuntu uubikako amano ilyo aleumfwa, akalanda ifyo aumfwile ukwabula ubwafya.*
29 Umubifi alipama,+Lelo uwalungama alasala bwino inshila ya kwendamo.+
30 Takwaba amano, ukwiluka, nelyo amapange ayengalesha ifyo Yehova afwaya ukucita.+
31 Ico basambilishisha kabalwe, bushiku bwa nkondo,+Lelo uupususha ni Yehova.+
Amafutunoti
^ Nelyo “icilenga umuntu acita fimo.”
^ Nelyo kuti yapilibula no kuti, “citeyo ca bafwaya ukufwa.”
^ Nelyo “Umweo wa mubifi.”
^ Nelyo “aleshiba ifya kucita.”
^ Mu ciHebere, “amafisakanwa ya mu ca kufwala ca pa cifuba.”
^ Mu ciHebere, “alamina.”
^ Nelyo “akacimfya.”
^ Nelyo “Taletela umweo wakwe amafya.”
^ Nelyo “atuula ninshi alecita ifya nsoni.”
^ Mu ciHebere, “akalanda umuyayaya.”
