Amapinda 22:1-29
22 Ukusala ishina ilisuma* kwawamapo ukucila ifyuma ifingi;+Ukupeelwa umucinshi kwawamapo ukucila silfere na golde.
2 Ico umukankaala no mupiina bapalanamo ni ci:*
Bonse uwababumbile ni Yehova.+
3 Uwa mano nga amona ububi alafisama,Lelo uushaba na mano atwalilila fye ukuya kabili alakumana no bucushi.
4 Ififuma mu kuicefya na mu kutiina Yehova,Fyuma no bucindami no mweo.+
5 Imyunga ne fiteyo fyaba umwenda umubifi,Lelo uwacindika umweo wakwe alafitaluka.+
6 Sambilisha umulumendo* inshila iyo afwile ukulaendamo;+Na lintu akakula takafumemo.+
7 Umukankaala alateka umupiina,Kabili uukongola alaba umusha ku o akongolako.+
8 Uubyala ifyabipa akasombola ifyabipa,+Kabili inkonto iyo ominako abantu nga akalipa ikakontoka.+
9 Uwaba na bukapekape* akapaalwa,Pantu alapeelako umupiina ifya kulya.+
10 Tamfya uwa miponto,Pa kuti ukukansana kupwe;Ukuumana* no musaalula fyalapwa.
11 Uwatemwa umutima uwasanguluka kabili uulanda ifisumaAkaba cibusa wa mfumu.+
12 Amenso ya kwa Yehova yalalinda ukwishiba,Lelo alapenuna amashiwi ya ba bucenjeshi.+
13 Umunang’ani alanda ati: “Panse pali nkalamo!
Yalayanjipaila mu lubansa lwa musumba nga nafuma!”+
14 Akanwa ka mwanakashi uushenda mu nshila iyalungama* kaba ngo bucinga ubutali.+
Uo Yehova afulilwa e uwilamo.
15 Ubuwelewele bulalambatila ku mutima wa mulumendo,*+Lelo ubwembya bwa kusalapwilako bulabutalushako.+
16 Uufyenga umupiina pa kuti ifyuma fyakwe fifulileko,+E lyo no upeela umukankaala ubupe,Akaba umupiina.
17 Bika amano ku filelanda aba mano,+Pa kuti ubike umutima obe ku fyo nsambilisha.+
18 Pantu cisuma ukufisunga mu mutima obe,+Pa kuti fyonse fileba lyonse pa milomo yobe.+
19 Pa kuti ucetekele Yehova,Ndekupeela ukwishiba buno bushiku.
20 Bushe nshakupanda amano,No kukweba ifya kucita mu fyo nakulembela kale,
21 Pa kuti nkusambilishe amashiwi ya cine kabili ayacetekelwa,Ica kutila kuti waeba uwakutumine amashiwi ya cine.
22 Wilapokolola umupiina ifintu pa mulandu fye wa kuti mupiina,+Kabili wilacusha umupiina mu mpongolo ya musumba,+
23 Pantu Yehova akabalubulwilako+Kabili akepaya* bonse ababapoka ifipe.
24 Wilaba pamo no ufulwa bwanguNelyo ukula-angala no wa cipyu,
25 Pa kuti wiba nga enaKabili wi-iteya iciteyo.*+
26 Wilaba pamo na baposhanya mu minwe,Pa kulaya ukuti bakalipililako abantu bambi inkongole.+
27 Nga taukwete ifya kulipila,Bakakupoka ubusanshi bobe!
28 Wilasesha umupaka wa kaleUo ifikolwe fyobe fyapakwile.+
29 Bushe naumona uwaishiba sana ukubomba umulimo wakwe?
Akeminina pa ntanshi ya mfumu;+Takeminine pa ntanshi ya bantu yaweyawe.
Amafutunoti
^ Mu ciHebere, “Ukusala ishina.”
^ Mu ciHebere, “Ico umukankaala no mupiina bakumanamo pamo ni ci.”
^ Nelyo “umwana; umwaice.”
^ Mu ciHebere, “Uwaba ne linso ilisuma.”
^ Nelyo “umulandu uuli ku cilye.”
^ Mu ciHebere, “Umweni.” Moneni Amapinda 2:16.
^ Nelyo “umwana; umwaice.”
^ Nelyo “akapoka umweo.”
^ Nelyo “witeya umweo obe iciteyo.”
