Amapinda 7:1-27
7 We mwana wandi, ulekonka ifyo nkweba,Kabili ulesunga amafunde yandi.+
2 Ulekonka amafunde yandi pa kuti ukekale inshiku ishingi;+Ulesunga ifyo nkusambilisha* nga filya usunga imboni ya linso lyobe.
3 Fikake ku minwe yobe,Filembe pa mutima obe.+
4 Webe amano auti: “Niwe nkashi yandi,”
Kabili ukwiluka ukwebe auti, “Niwe lupwa wandi,”
5 Amano no kwiluka fikakucingilila ku mwanakashi uushenda mu nshila iyalungama,*+Ku mwanakashi uucita ifyabipa* na ku mashiwi alanda aya kusembeleka.+
6 Nalengeele pe windo lya ng’anda yandi,
7 Kabili namwene abashaishiba ifingi.Pe bumba lya balumendo, nalimwenepo umulumendo uushakwete mano.*+
8 Alepita mu musebo wali mupepi ne ng’anda ya mwanakashi uwaupwa uucita ubucende,Kabili alolele ku ng’anda ya uyu mwanakashi
9 Icungulo cilya akasuba kawa,+Ninshi takulafiita sana.
10 Lyena namwene umwanakashi aleya mu kumukumanya,Afwele nga cilende*+ kabili ali no mutima wa bucenjeshi.
11 Alalandikisha kabili ni cintomfwa.+
Tekala pa ng’anda.*
12 Acita fye panono afumina panse, aya mu mansa,Aya mukwikala apa kumanina imisebo.+
13 Aikata umwaume kabili amutomona;E lyo amweba ninshi napama ati:
14 “Naciya mu kutuula amalambo ya mutende.+
Lelo nimfikilisha ifyo nalapile.
15 E co nacifumina pa kuti nkukumanye,Nacisa mu kukufwaya kabili nakusanga.
16 Ninjanshika insalu ishisuma pa busanshi bwandi,Insalu ishisuma isha kolokondwe iya ku Egupti.+
17 Ninsansa muri, aloye na kinamone+ pa busanshi bwandi.
18 Tuleya tunwe muli kapu ya citemwiko cesu ukufika ulucelo;Tuleya tuipakishe icitemwiko,
19 Pantu umulume wandi talipo;Naya ukutali.
20 Nasenda indalama,Kabili akabwela ilyo umweshi ukabulungana.”
21 Amunashanasha pa kuti acite ifyabipa.+
Amweba amashiwi ya kumusembeleka pa kuti amubeleleke.
22 Ilyo line fye, atendeka ukukonka umwanakashi,Kwati ni ng’ombe iyo baleya mu kwipaya, kwati muwelewele uo bakakile amaceni* pa kuti bamukande,+
23 Mpaka umufwi wapula mwi libu lyakwe;Nga filya akoni kangufyanya ukuya ku citeyo, teshibe ukuti ifi kuti fyamwipaisha.*+
24 Nomba mwe bana bandi, umfweni ifyo ndemweba;Bikeni amano ku fyo ndelanda.
25 Mwileka abeleleke umutima wenu.
Mwilaenda mu nshila shakwe.+
26 Pantu abo aipaisha bengi,+Kabili abo aipaya bengi nga nshi.+
27 Ing’anda yakwe itwala ku Nshiishi;*Itentemukila ku miputule ya mu kati iya mfwa.
Amafutunoti
^ Nelyo “amafunde yandi.”
^ Mu ciHebere, “umwanakashi umweni.” Moneni Amapinda 2:16.
^ Mu ciHebere, “umwanakashi umbi umbi.” Moneni Amapinda 2:16.
^ Nelyo “ifyo umutima wakwe ufwaya fibi.”
^ Nelyo “Afwele ifya kufwala fya bucilende.”
^ Mu ciHebere, “Amakasa yakwe tayekala pa ng’anda.”
^ Nelyo “mu makusu.”
^ Nelyo “kuti fyaipaisha umweo wakwe.”
^ Nelyo “Sheol,” e kutila Inshiishi ya bantu bonse. Moneni Amashiwi ya mu Baibolo ne fyo Yapilibula.
