Amose 6:1-14
6 “We bulanda ku bekala mu Sione abaicetekela,*Na balya abamona kwati balicingililwa mu lupili lwa Samaria,+Abalumbuka pali bashimucindikwa ba mu nko,Abo abena Israele bonse bayako!
2 Kabiyeni ku Kalne muyemona.
Kabiye na ku Hamati umusumba uukalamba,+E lyo muye ku musumba wa Gati uwa baPelishiti.
Bushe iyi misumba yaliwama ukucila aya mabufumu,*Nelyo bushe icalo cabo cikalamba ukucila icalo cenu?
3 Bushe namuleka ukutontokanya pa bushiku bwa bucushi+Kabili mulelenga abankalwe e bo baleteka?*+
4 Balaala pa masanshi ya meno ya nsofu+ kabili balambalala pa fipuna,+Balya impaanga ishilume na bana ba ng’ombe abaina;*+
5 Bashika inyimbo uku ninshi nsango* alelila,+Kabili balapanga ifilimba ifya misango iipya+ nga filya fine Davidi alecita;
6 Banwena umwangashi mu mbale ishafonka ishaisula,+Kabili balaisuba amafuta ya kusubilako abantu ayasuma sana.
Tabasakamana pa bucushi bwa bantu ba kwa Yosefe.+
7 E ico e bo bakabalilapo ukusenda bunkole,+Ne ciwowo ca balambalala pa fipuna cikapwa.
8 Yehova Lesa wa mabumba atila,+ ‘Ine ne Shikulu Mulopwe Yehova nindapa mwi shina lyandi,*“Nalipata icilumba ca kwa Yakobo,+Nalipata amayanda yakwe aya malinga ayakosa,+Kabili umusumba wakwe ne fyabamo+ nkapeela abalwani bakwe.
9 “‘“Kabili mu ng’anda nga mukashala abaume 10 nabo bene bakafwa.
10 Lupwa* akesa mu kubafumya kabili akalaboca umo umo. Akafumya amafupa yabo mu ng’anda e lyo akepusha onse uuli mu muputule wa mu kati ka ng’anda ati, ‘Bushe kuli bambi abo uli nabo umo?’ Kabili akasuka ati, ‘Awe, takuli!’ Lyena akamweba ati, ‘Leka ukulanda! Pantu ino te nshita ya kulumbula ishina lya kwa Yehova.’”
11 Pantu Yehova e ulepeela ifunde,+Akabongolola ing’anda iikalamba ica kuti ikashala ifitantaala,Kabili ing’anda iinono ikashala fye ifisooso.+
12 Bushe bakabalwe kuti babutuka pa cilibwe,Nelyo bushe umuntu kuti alimapo ne ng’ombe?
Pantu mwalyalula umulinganya waba icilimwa icakwata sumu,Kabili mwalyalula ifisabo fya bulungami fyaba icilimwa icalula.+
13 Musekelela pa fintu fya cabecabe,Kabili mutila, “Bushe tatucimfisha* ku maka yesu?”+
14 E ico nkalenga uluko lukamusanse mwe ba mu ng’anda ya kwa Israele,’+ e fyo Yehova Lesa wa mabumba alanda,‘Kabili lukamucusha ukutendekela fye ku Lebo-hamati*+ ukuyafika fye na ku Mupokapoka wa Araba.’”
Amafutunoti
^ Nelyo “abailekelesha.”
^ Nalimo aya amabufumu, bufumu bwa Yuda no bwa Israele.
^ Mu ciHebere, “mulebapeela icipuna.”
^ Nelyo “ing’ombe ishilume ishana.”
^ Nelyo “icilimba ca nsale.”
^ Nelyo “nailapa ne mwine.”
^ Mu ciHebere, “Ndume nankwe wa kwa wishi.”
^ Mu ciHebere, “twaikata insengo.”
^ Nelyo “apakwingilila mu Hamati.”
