Amose 7:1-17
7 Ifi e fyo Shikulu Mulopwe Yehova anangile: Moneni! Alitumine makanta ilyo ifilimwa fya kulekeleshako fyalemena.* Pali ilya nshita ninshi balipwisha ukufuulila imfumu icani ica kuti ifitekwa fikalelya.
2 Ilyo makanta apwile ukulya ifimenwa mu calo, nalandile nati: “Mwe Shikulu Mulopwe Yehova, beleleni abantu benu uluse.+ Bushe Yakobo kuti apusuka?* Pantu takosa!”+
3 E ico Yehova alyalwile ifyo alepanga ukucita,*+ Yehova atile: “Tacakacitike iyo.”
4 Ifi e fyo Shikulu Mulopwe Yehova anangile: Moneni! Shikulu Mulopwe Yehova abomfeshe umulilo pa kukanda aba mu calo. Na o walyocele fyonse ica kuti na bemba yalikamine.
5 Lyena natile: “Mwe Shikulu Mulopwe Yehova, mwikanda abantu benu.+ Bushe Yakobo kuti apusuka?* Pantu takosa!”+
6 E ico Yehova alyalwile ifyo alepanga ukucita.+ Shikulu Mulopwe Yehova alandile ati, “Ici na co nshakacite.”
7 Ifi e fyo anangile: Moneni! Yehova aliminine pa cibumba ico bakuulile ne ntambo ya kupiminako pa kukuula,* kabili aikete intambo ya kupiminako pa kukuula.
8 Lyena Yehova anjipwishe ati: “Cinshi ulemona Amose?” Na ine na-aswike nati: “Ndemona intambo ya kupiminako pa kukuula.” E lyo Yehova atile: “Mona, ndepima abantu bandi abena Israele ukubomfya intambo ya kupiminako pa kukuula. Kabili nshakatwalilile ukubeleela.+
9 Ififulo fya kupepelapo ifya kwa Isaki+ fikonaulwa, ne ncende sha mushilo isha bena Israele shikonaulwa,+ kabili nkasanshila aba mu ng’anda ya kwa Yeroboamu ku lupanga.”+
10 Amasia shimapepo wa ku Betele+ atumiine Yeroboamu imfumu+ ya Israele amashiwi ya kuti: “Amose alemupangila mu calo cenu ica Israele mwine.+ Abena Israele te kuti batemwe ukutwalilila ukumfwa ifyo alelanda.+
11 Pantu Amose alanda ati, ‘Yeroboamu bakamwipaila ku lupanga, kabili nangu cibe shani abena Israele bakabasenda bunkole.’”+
12 Lyena Amasia aebele Amose ati: “We umona ifimonwa, kabiye, butukila ku calo ca Yuda, kulya kwine e ko ukalalya umukate, kabili e ko ukalesesemena.+
13 Lelo mu Betele+ mwena wilaesha ukusesemenamo pantu e mo imfumu isa mu kupepela+ kabili e mwaba itempele ilyo abantu bonse besa mu kupepelamo.”
14 Lyena Amose ayaswike Amasia ati: “Ine nshali kasesema, kabili nshili mwana wa kwa kasesema; lelo nali kacema+ kabili nalesakamana imikunyu.*
15 Lelo Yehova ansendele uko nalecema impaanga, kabili Yehova anjebele ati, ‘Kabiye, kasesemene abantu bandi abena Israele.’+
16 E ico nomba umfwa ifyo Yehova alelanda: ‘Ulenjeba auti: “Wilasesema ifyabipa pa bena Israele,+ kabili wilalanda+ ifyabipa pa ba mu ng’anda ya kwa Isaki.”
17 E ico Yehova atila: “Umukashi obe akaba cilende mu musumba. Kabili abana bobe abaume na bana bobe abanakashi bakabepaila ku lupanga. Pa kwakanya icalo cobe bakabomfya intambo ya kupiminako, na iwe ukafwila mu calo icakowela; kabili nangu cibe shani abena Israele bakabasenda bunkole.”’”+
Amafutunoti
^ E kutila, mu mweshi wa January no wa February.
^ Mu ciHebere, “kuti aima.”
^ Nelyo “alilangulwike.”
^ Mu ciHebere, “kuti aima.”
^ Nelyo “ico balebomfya pa kukuula pa kuti icibumba cololoke.”
^ Nelyo “naletulaula ifisabo fya mikunyu.”
