Esaya 1:1-31
1 Icimonwa ico Esaya*+ umwana wa kwa Amose amwene pa fyali no kucitikila Yuda na Yerusalemu mu nshiku sha kwa Usia,+ Yotamu,+ Ahasi+ na Hisekia,+ imfumu sha baYuda:+
2 Umfweni mwe myulu, kabili kutika we sonde,+Pantu Yehova nalanda ati:
“Nalilelele abana no kubakusha,+Lelo nabampondokela.+
3 Ing’ombe iilume yalishiba umwine wa iko,Ne mpunda yalishiba umulimba wa waiteka;Lelo abena Israele bena tabanjishiba;*+Abantu bandi tabeluka ilyo balecita ifintu.”
4 We bulanda ku luko+ ulucita imembu,Abantu abacita ifyabipa,Ibumba lya babifi, abana abashumfwa!
Balipondokela Yehova;+Balisaalula Uwa Mushilo uwa kwa Israele;Balimufutatila.
5 Ni pesa pambi apo ningamuma na kabili, apo mutwalilile fye ukumpondokela?+
Umutwe onse naulwala,No mutima onse naulwala.+
6 Ukufuma ku mutwe ukufika ku makasa, tapali apashele apatuntulu.
Namukwata ifilonda, ifikwebululwa ne filonda ifishilauma.Tabafiwamya,* ukufikakila nelyo ukubikapo amafuta+ pa kuti finake.
7 Icalo cenu baliconaula.
Imisumba yenu baliyoca.
Aba ku fyalo fimbi balyonaula icalo cenu ninshi mulemonako.+
Caba nge cibolya ico aba ku fyalo+ fimbi bacimfya.
8 Umwana umwanakashi Sione ashele nge nsakwe mwi bala lya myangashi,Nge nsakwe mwi bala lya fibimbi,Kabili ngo musumba uo bashingile.+
9 Yehova wa mabumba nga talekele abantu bamo abanono bapusuka,Nga twaba fye nga Sodomu.Kabili nga twaba fye nga Gomora.+
10 Umfweni ifyo Yehova alelanda mwe bakateka abankalwe* aba mu Sodomu.+
Bikeni amano ku mafunde* ya kwa Lesa wesu, mwe bantu ba mu Gomora.+
11 “Busuma nshi nsangamo mu malambo ayengi ayo muntuulila?”+ e fyo Yehova alanda.
“Nintendwa ne mituulo yenu iya koca iya mpaanga ishilume+ ne ya nama ishaina,+Kabili nshatemwa umulopa+ wa ng’ombe ishana ishilume,+ uwa twana twa mpaanga no wa mbushi.+
12 Nga mwaisa mu kwiminina pa ntanshi yandi,+Nani uwamweba ukuti mufwile ukulanyantaula mu mansa+ shandi?
13 Lekeni ukuleta imituulo ya ngano iya fye.
Ububani bwenu mbumona+ ukuti bwa bunani.
Mulakwata imitebeto umweshi nga watendeka,+ mulasunga amasabata+ kabili mulalongana.+Nintendwa ifinjelengwe+ ifyo mucita no kulongana kwenu ukwacindama.
14 Nalipata* imitebeto iyo musefya umweshi nga watendeka ne mitebeto imbi iyo mukwata.
Ili kwati cisendo kuli ine;Ninaka ukuisenda.
15 Kabili ilyo mwaimya amaboko yenu pa kupepa,Nshimulolesha.+
Nangu ca kuti mulapepa amapepo ayengi,+Nshikutika;+Iminwe yenu ilasumya sana umulopa.+
16 Sambeni, isangululeni;+Fumyeni ifyabipa ifyo mucita pa cinso candi;Lekeni ukucita ifyabipa.+
17 Sambilileni ukucita ifisuma, fwayeni umulinganya,+Lungikeni uucusha abantu,Cingilileni insambu sha ushakwata wishi,*Kabili landileniko mukamfwilwa.”+
18 “Nomba iseni tulanshanye, kabili nalamwafwa pa kuti bucibusa bwenu na ine bukose na kabili,” e fyo Yehova+ alanda.
“Imembu shenu nangu shakashika ce,Shikabuuta tuutu kwati ni mfula ya bungululu bwa buuta,+Nangu shingakashika ce kwati ni nsalu yakashikisha,Shikaba kwati masako ya mpaanga.
19 Nga mwaitemenwa ukukonka ifyo ndemweba,Mukalya ifisuma ifya mu calo.+
20 Lelo nga mwakaana kabili mwampondokela,Ulupanga+ lukamulya,Pantu akanwa ka kwa Yehova nakalanda.”
21 Iye ifyo umusumba+ wa cishinka wasanguka cilende!+
Muli uyu musumba mwaiswile umulinganya;+Ubulungami e mo bwaleikala,+Nomba mwikala abepaya abantu.+
22 Silfere yobe isangwike munyela,+No bwalwa* bobe nababusundula na menshi.
23 Bacilolo bobe ni bacintomfwa kabili banabo ba bapuupu.+
Bonse fye balitemwa amafisakanwa kabili bafwaisha ifya bupe.+
Tababa no mulinganya nga balepingula abana abashakwata bashibo,*Kabili balakaana+ ukupingula umulandu wa kwa mukamfwilwa.
24 E ico Shikulu wa cine, Yehova wa mabumba,Uwa Maka uwa kwa Israele, alanda ati:
“Eya! Nkailubula ku bandwisha,Kabili nkakanda abalwani+ bandi.
25 Nkakwimisha ukuboko kwandi.Nkasungulula munyela yobe yonse,Kabili nkafumyapo ifiko+ fyobe fyonse.
26 Nkakupeela bakapingula nga filya nakupeele pa kubala.Nkakupeela ne mpanda mano nga filya nacitile pa kutendeka.+
Lyena bakalakwita ati Umusumba wa Bulungami, Umusumba wa Cishinka.+
27 Sione akalubulwa+ pa mulandu wa mulinganya,Na bantu bakwe abakabwela, bakalubulwa pa mulandu wa bulungami.
28 Bacipondoka na babembu bakabonawila pamo,+Kabili abasha Yehova bakaloba.+
29 Pantu bakekatwa insoni pa mulandu wa fimuti ifikalamba ifyo mwatemenwe,+Kabili mukaseebana pa mulandu wa mabala* ayo mwasala.+
30 Pantu mukaba nge cimuti icikalamba icakwata amabula+ ayauma,Kabili mukaba nge bala ilishakwata amenshi.
31 Umwaume uwakwata amaka akaba nge cani icauma,Kabili umulimo wakwe ukaba ngo lusase;Fyonse fibili fikapiila pamo.Takwakabe no wa kufishimya.”
Amafutunoti
^ Ilyalola mu kuti “Ipusukilo lya kwa Yehova.”
^ Nelyo “tabaishiba shikulu wabo.”
^ Mu ciHebere, “Tabafitina.”
^ Nelyo “bakateka.”
^ Nelyo “ifya kukonka.”
^ Nelyo “umweo wandi naupata.”
^ Nelyo “umwana wa nshiwa.”
^ Nelyo “ubwalwa bwa ngano.”
^ Nelyo “abana ba nshiwa.”
^ Nalimo ifi ifimuti na mabala balefibomfya mu kupepa kwa bufi.
