Esaya 14:1-32
14 Pantu Yehova akabelela Yakobo+ uluse, kabili akasala Israele+ na kabili. Akalenga bakekale* mu calo+ cabo, na ba ku fyalo fimbi bakailunda kuli bena kabili bakekala na ba mu ng’anda ya kwa Yakobo.+
2 Kabili abantu ba mu nko shimbi bakabwesesha abena Israele ku calo cabo, kabili aba mu ng’anda ya kwa Israele bakabuula aba mu nko shimbi, bakabe ababomfi babo abaume na babomfi+ babo abanakashi mu calo ca kwa Yehova; kabili bakekata ababekete, kabili abalebapatikisha ukubomba* bakalanakila abena Israele.
3 Mu bushiku Yehova akalenga ukatuushe ku kukalipwa kobe na ku bucushi na ku busha ubo walimo,+
4 ukalanda ili ipinda pa kupumya imfumu ya ku Babiloni auti:
“Iye ifyo uwalepatikisha* abantu ukubomba aleka ukubapatikisha!
Iye ifyo ukucula kwapwa!+
5 Yehova akontola inkonto ya babifi,Inkonto ya bakateka,+
6 Akontola inkonto ya utwalilila fye ukuuma abantu ninshi nakalipa,+Uutwalilila fye ukucusha+ inko ninshi nakalipa pa kuti ashicimfye.
7 Isonde lyonse nalituusha, lili tondolo.
Abantu balesekelela.+
8 Ne mikupri ilesekelela pali iwe,Kumo ne mikedari ya mu Lebanone,
Ileti, ‘Ukutula apo wawila,Takwaba nangu umo uutema ifimuti uwisa mu kututema.’
9 Ne Nshiishi* panshi naitemwaUkukumona waisa.
Pa mulandu obe, yabuusha abafwa,Intungulushi* shonse isha pe sonde ishalecusha abantu.
Yalenga imfumu shonse isha mu nko shaima pa fipuna fya shiko ifya bufumu.
10 Shonse shatendeka ukulanda kabili shalakweba ashiti,‘Bushe na iwe naunaka nga ifwe?
Bushe uli nga ifwe?
11 Icilumba cobe nabacitwala mu Nshiishi,*Pamo no kulila kwa filimba+ fya nsale ifyo bakulishisha.
Panshi yobe nabanshikapo imititi pa kuti ibe ica kusendamapo cobe,Ne myambo e ca kufimbana cobe.’
12 Yangu ifyo wapona ukufuma mu muulu,We ubengeshima, umwana wa macaca!
Ifyo bakuputula, waponena na pe sonde,We walecimfya inko!+
13 Walandile mu mutima obe auti, ‘Nkaya ku muulu.+
Nkabika icipuna candi ica bufumu+ pa muulu wa ntanda sha kwa Lesa,Kabili nkekala pa lupili lwa kukumaninapo,Ku mpela ya kapinda ka ku kuso.+
14 Nkaya pa ncende iyasansuka iyaba pa muulu wa makumbi;Nkaba ngo Wapulamo.’
15 Lelo bakakwingisha mu Nshiishi,*Panshi sana iya cilindi.
16 Abakalakumona bakalakulolekesha;Bakalakuceeceeta bwino bwino kabili bakalalanda abati,‘Bushe e uyu uwaletensha isonde,Uwalelenga amabufumu yalatutuma,+
17 Uwalengele isonde lyaba nga matololoKabili uwacimfishe imisumba+ ya liko,Uushalefwaya ukuleka abafungwa baye ku mwabo?’+
18 Imfumu shimbi isha mu nko,Shonse fye shalaala mu bucindami,Cila mfumu mu nshiishi* ya iko.
19 Lelo bakupoosa fye ukwabula ukukushiika,Ngo musambo uo bapata,Ifitumbi fya bantu abo balashile ku lupanga,Abaleya panshi ku mabwe ya mu cilindi fyalikufimba,Waba nge citumbi ico banyantaula.
20 Tawakabe ne mfumu mu nshiishi,Pantu walyonawile icalo cobe,Walipeye abantu bobe.
Abana ba bacita ifyabipa tabakabebukishe umuyayaya.
21 Pekanyeni apa kwipaila abana bakwePa mulandu ne membu sha fikolwe fyabo,Pa kuti bekema no kupoka isondeKabili bekesusha mu calo imisumba yabo.”
22 “Nkabemina,”+ e fyo Yehova wa mabumba alanda.
“Kabili nkalofya mu Babiloni ishina, abashalapo, abatuntuka muli bena na bana abakafyalwa,”+ e fyo Yehova alanda.
23 “Kabili nkamulenga akabe umwakwikala ifinungi* kabili akabe ilungu umwaba amenshi. Nkamupyangila ku cipyango ca bonaushi,”+ e fyo Yehova wa mabumba alanda.
24 Yehova wa mabumba nalapa ati:
“Ifyo mfwaya, e fyo cikaba,Kabili ifyo nasalapo, e fikacitika,
25 Nkashonaula umwina Asiria mu calo candi,Kabili nkamunyantaula pa mpili+ shandi.
Ikoli lyakwe likafuma pali bena,Kabili icipe cakwe icafina cikafuma pa mabeya+ yabo.”
26 Ifi e fyo isonde lyonse balipingwile,*Kabili uku e kuboko ukutambalikwe pa kuti kuume inko shonse.
27 Pantu Yehova wa mabumba nasalapo ifya kucita,Nani wingafulunganya+ ifyo asalilepo ukucita?
Natambalika ukuboko kwakwe,Nani uwingakubwesha?+
28 Mu mwaka Imfumu Ahasi yafwile,+ Lesa alitumine aya amashiwi ya bupingushi:
29 “Wisekelela we calo ca Pelishiti na bonse abekalamo,Pa mulandu fye wa kuti inkonto ya ulekuuma naikontoka.
Pantu mu mani* ya nsoka+ mukafuma insoka ya busungu,+Kabili abana ba iko bakaba ni nsoka iipupuka kabili iifumya umulilo.*
30 Ilyo amabeli ya bapiina yakalalya,Kabili ilyo abapiina bakalaala mu mutende,Nkaleta icipowe icikepaya umushila obe,Kabili abakashalapo pa bantu bobe bakabepaya.+
31 Loosha we mpongolo! Loosha we musumba!
Bonse mwe baPelishiti mukanenuka!
Pantu icushi cilefuma ku kapinda ka ku kuso,Kabili takuli uulefuma mwi bumba lyakwe ilya bashilika.”
32 Bushe bafwile ukwasuka shani inkombe sha luko?
Bafwile ukushasuka ati Yehova napanga umufula wa Sione,+No kuti abapiina pa bantu bakwe e mo bakooba.
Amafutunoti
^ Nelyo “Akalenga bakatuushe.”
^ Nelyo “bakapitao wabo.”
^ Nelyo “kapitao.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “Imbushi ishilume.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “mu ng’anda.”
^ Nelyo “inungi.”
^ Mu ciHebere, “balipangiile.”
^ Mu ciHebere, “mu mushila.”
^ Nelyo “insoka iyangufyanya pa kwenda kabili iya busungu.”
