Esaya 16:1-14
-
Ubukombe bwa bupingushi pali Moabu bwatwalilila (1-14)
16 Tumeni impaanga iilume kuli kateka wa mu calo,Ukufuma ku Sela ukupita mu matololo,Ukuya ku lupili lwa mwana mwanakashi Sione.
2 Nga filya fine ciba ku cuni ico batamfya pa cinsa,+E fyo cikaba na ku bana banakashi ba kwa Moabu pa fyabu fya Arnone.+
3 “Pandeni amano, citeni ifyo musalilepo ukucita.
Ilyo akasuba kali pa kati ka mutwe, lengeni icinshingwa cenu cifiite ngo bushiku.
Fiseni abo bapasa kabili mwipondokela abalefulumuka.
4 Leka abantu bandi abo bapasa baleikala muli iwe we Moabu.
Ube icifulo ca kuti bafisamemo pa mulandu wa onaula.+
Uubacusha ali no kuloba,Ubonaushi buli no kupwa,Kabili abanyantaula abantu banabo bakaloba mwi sonde.
5 Lyena ukutemwa ukushipwa kukaba e mufula apo icipuna ca bufumu bakaciteka.
Kabili uwikalapo mwi tenti lya kwa Davidi akaba uwa cishinka;+Akaba no mulinganya pa kupingula kabili akala-angufyanya ukucita icalungama.”+
6 Natumfwa ifyo Moabu aba ne cilumba, wa cilumba+ nga nshi.Natumfwa amatutumuko yakwe, icilumba cakwe no bukali+ bwakwe;Ifya fye ifyo alanda tafyakacitike.
7 E ico Moabu akaloosha Moabu;Bonse bakaloosha.+
Abo bauma bakalilila amakeke ya myangashi aya ku Kiri-haresete,+
8 Pantu amabala ya myangashi aya mu Heshebone+ nayoma, kumo ne myangashi,Pamo ne myangashi ya mu Sibma,+Bakateka ba nko nabanyantaula imisambo ya uko iyakashika;*Yalifikile na ku Yasere;+Yafikile na mu ciswebebe.
Utumisambo twa uko twalilepele kabili twafikile na kuli bemba.
9 E co nkaloosesha umwangashi wa mu Sibma nga filya ndoosha Yasere.
Nkakubomfya ku filamba fyandi we Heshebone na we Aleale,+Pantu amashiwi ya kusekelela pa fisabo fyobe ifya mu lusuba na pa kusombola ifisabo nayaleka ukumfwika.*
10 Mwi bala lya fisabo tamuli ukusekelela no kusansamuka,Mwi bala lya myangashi+ tamuli abaleimba nelyo abalesekelela.
Takuli nangu umo uulenyantaula imyangashi mu ca kukaminamo imyangashi,Pantu ninenga ukusekelela kupwe.+
11 E mulandu wine mu kati ka mubili wandi mulelilila pa mulandu wa kumfwila ubulanda Moabu,+Mulelila nge nsale sha pa nsango,Kabili mu kati sana aka mubili wandi muli ubulanda pa mulandu wa kwa Kiri-haresete.+
12 Nangu Moabu akeshe na maka yakwe yonse ukuya ku cifulo cakwe ica kupepelapo, kabili akaye mu kupepa mu cifulo cakwe ica mushilo, akaicusha fye.+
13 Ifi e fyo Yehova alandile pali Moabu kale.
14 Kabili Yehova nomba alanda ati: “Mu myaka fye itatu, iyo bapenda nge myaka ya mubomfi, ubucindami bwa kwa Moabu bukapwa. Muli ena mukaba ifimfulunganya ifyalekanalekana, kabili abakashalamo bakaba abanono sana, kabili tabakakwate amaka.”+
Amafutunoti
^ Nelyo “imisambo ya uko iyatwele imyangashi yakashika.”
^ Nelyo kuti yapilibula ukuti, “Pantu ukuwelesha kwa nkondo nakwisa pa fisabo fyobe ifya mu lusuba na pa fyo usombwele.”
