Esaya 28:1-29
28 We bulanda ku cilongwe* icayemba* ica bacakolwa ba mu Efraimu+Na maluba ayalebonsa aya bucindami bwa ciko,Ayaba pa mpela ya mupokapoka uwafunda uwa bantu abo bacimfya ku mwangashi!
2 Moneni! Yehova nakwata umuntu uwakosa kabili uwa maka.
Akapoosa icilongwe panshi na maka,Nge mfula ya mabwe iibako ilyo kuli umwela uukalamba uonaula ifintu,Ngo mwela uukalamba ne nkuba ifibako ilyo kuli amenshi ya maka kabili ayabunsha.
3 Ifilongwe ifyayemba* ifya bacakolwa ba mu EfraimuBakafinyantaula.+
4 Kabili iluba ililebonsa ilya bucindami bwa fiko,Ilili pa mpela ya mupokapoka uwafunda,Likaba ngo mukunyu uusuma, uupya ilyo imikunyu itendeka ukupya.
Ilya kuti umuntu nga alimona, alalimina nga lyaba fye mu minwe yakwe.
5 Muli bulya bushiku, Yehova wa mabumba akaba ku bashalapo pa bantu+ bakwe nge cilongwe* ca bukata, kabili akaba nge cilongwe ico bapangila na maluba ayasuma.
6 Kabili akaba umupashi wa mulinganya ku ulepingula, kabili akaba intulo ya maka ku baletamfya abalwani pa mpongolo+ abeshile mu kusansa.
7 Aba nabo balafuma mu nshila pa mulandu wa mwangashi;Ubwalwa bulalenga balatalantanta.
Bashimapepo na bakasesema balafuma mu nshila pa mulandu wa bwalwa;Umwangashi ulabafulunganya,Kabili balatalantanta nga banwa ubwalwa;Ifimonwa ifyo bamona filalenga bafuma mu nshila,Kabili tababa no mulinganya ilyo balepingula.+
8 Pantu pa matebulo yabo yonse peswile amalushi,Tapali apo yashili.
9 Balelanda abati: “Ni bani abo akasambilisha,Kabili ni bani abo akalondolwela ifyo omfwile?
Bushe ni balya abo basumwine fye,Abo bafumishe ku mabele?
10 Ifunde likakonka pe funde linankwe, ifunde likakonka pe funde linankwe,Icipope cikakonka pa cipope cinankwe, icipope cikakonka pa cipope cinankwe,*+Ifinono pano, ifinono palya,”
11 E ico pa kulanda na bantu+ bakwe, akalandila muli balya ababulubusa,* kabili akabomfya ululimi lwa ku calo cimbi.
12 Pa nshita imo abebele ati: “Cino e cifulo ca kutuushishapo. Lekeni abanakile batuushe; cino e cifulo ca kupemwinapo,” lelo balikeene ukumfwa.+
13 E ico bakalamona amashiwi ya kwa Yehova nge fi:
“Ifunde likakonka pe funde linankwe, ifunde likakonka pe funde linankwe,Icipope cikakonka pa cipope cinankwe, icipope cikakonka pa cipope cinankwe,*+Ifinono pano, ifinono palya,”
Pa kuti ilyo bakalaenda,Bakaipunune, bakawe cimfutyanumaKabili bakaicene no kwikatwa+ mu citeyo.
14 E ico umfweni amashiwi ya kwa Yehova, mwe bayumfwa,Mwe bateka aba bantu ba mu Yerusalemu,
15 Pantu imwe mwe bantu mulanda amuti:
“Natupangana icipangano ne Mfwa,+Kabili natumfwana* ne Nshiishi.*
Ilyo ilyeshi lya maka likesa,Talyakatonaule,Pantu natulenga ubufi bwaba+ icubo cesuKabili natufisama mu bufi.”
16 E co Shikulu Mulopwe Yehova alanda ati:
“Moneni ndebika ilibwe+ ilyakosa mu Sione pa kuti libe umufula,Ilibwe ilyacindama nga nshi ilya pa koona,+ ilya pa mufula wakosa,+
Onse uulitetekela takatiine.+
17 Kabili nkalenga umulinganya ukabe intambo ya kupiminako+E lyo ubulungami bukabe ica kulinganishishako.*+
Imfula ya mabwe ikasenda icubo ca bufi,Kabili amenshi yakabunsha icifulo ca kufisamamo.
18 Icipangano mwapangene ne Mfwa cikapwa,Ne fyo mwaumfwene ne Nshiishi* tafyakacitike.+
Ilyo ilyeshi lya maka likesa,Likamonaula.
19 Lyonse nga lyapita,Likalamusenda;+Pantu likalapita cila lucelo,Akasuba na mu nshita ya bushiku.
Ifya kutiinya e fikalenga bakeluke ifyo baumfwile.”*
20 Pantu ubusanshi bwalipipa ica kuti umuntu te kuti ayololepo,Kabili ica kufimbana ico bapikula te kuti cikumane ukuifimba.
21 Pantu Yehova akema nga filya aimine pa Lupili lwa Perasimu;Akacitapo cimo mu mupokapoka* uwaba mupepi na Gibeone,+Pa kuti abombe umulimo wakwe, umulimo wakwe uwa kupapusha,Kabili pa kuti abombe umulimo+ wakwe uwaibela.
22 Nomba mwilapumya,+Pa kuti bemukakisha amaceni ayo bamukaka,Pantu ning’umfwa kuli Shikulu Mulopwe Yehova wa mabumbaUkuti napanga ukonaula icalo+ conse.*
23 Umfweni ifyo ndelanda, bikeniko amano;Kabili kutikeni ifyo ndelanda.
24 Bushe umulimi atwalilila fye ukulima akasuba konse ukwabula ukubyala imbuto?
Bushe atwalilila fye ukushima umushili+ no kukunta?
25 Nga alinganya umushili,Bushe takuba kumini yafiita, kabili bushe tatanda kumini?Bushe tatanda ingano, amale, na barle umo afwile ukufitanda?Kabili bushe tatanda+ mu mbali ingano ishimoneka nge shapapa?
26 Pantu alamusambilisha mu nshila iisuma;Lesa wakwe alamusambilisha.*+
27 Pantu kumini yafiita tabaipumina ku ca kusokwelako,+Kabili tabapisha umupeto wa ca kusokwelako pali kumini.
Lelo kumini yafiita baipumina ku nkonto,Na kumini baipumina ku nkonto.
28 Bushe umuntu alapela ingano ilyo aleshisokola pa kuti apangemo umukate?
Awe, tashipela;+Kabili ilyo alepishapo umupeto wa ca kusokwelako ico bakabalwe batinta,Tashipela.+
29 Ici na co cafuma kuli Yehova wa mabumba,Uupanda amano ayasuma nga nshi*Kabili uwacita ifintu ifikalamba.*+
Amafutunoti
^ Nelyo “ica matutumuko, ica cilumba.”
^ Nalimo ico balelandapo musumba uukalamba uwa Samaria.
^ Nelyo “ifya matutumuko, ifya cilumba.”
^ Nelyo “icisote ca bufumu.”
^ Nelyo “Ica kupiminako pa ca kupiminako cinankwe, ica kupiminako pa ca kupiminako cinankwe.”
^ Mu ciHebere, “abo imilomo yabo ibulubusa.”
^ Nelyo “Ica kupiminako pa ca kupiminako cinankwe, ica kupiminako pa ca kupiminako cinankwe.”
^ Nelyo kuti yapilibula no kuti, “natumona icimonwa.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “intambo ya kupiminako.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo kuti yapilibula no kuti, “ilyo bakeluka e lyo bakatiina nga nshi.”
^ Nelyo “impanga iyabatama.”
^ Nelyo “isonde lyonse.”
^ Nelyo “alamusalapula.”
^ Nelyo “Uo ubufwayo bwakwe busuma nga nshi.”
^ Nelyo “Kabili uwakwatisha amano yene yene.”
