Esaya 3:1-26
3 Pantu moneni! Shikulu wa cine, Yehova wa mabumba,Alefumya mu Yerusalemu na mu Yuda ubwafwilisho bonse,E kutila ifya kulya na menshi,+
2 Umwaume wa maka no mushilika,Kapingula na kasesema,+ uusobela ifya ku ntanshi no mukalamba,
3 Intungulushi ya pa bantu 50,+ shimucindikwa, ne mpanda mano,Uwaishibisha ukucita ifinjelengwe no waishibisha ifya kushilika insoka.+
4 Nkalenga abalumendo bakabe intungulushi shabo,Kabili abaluka-aluka e bakalabateka.
5 Abantu bakalacusha abantu banabo,Cila muntu akalacusha umunankwe.+
Umulumendo akacena umukote,Kabili uwasuulwa akasaalula uwacindikwa.+
6 Umuntu umo na umo akekata munyina mu ng’anda ya kwa wishi, kabili akamweba ati:
“Naukwata ica kufwala ca kunse, akututeka.
Kabili ulesakamana no yu umwina wa fitantaala.”
7 Lelo pali bulya bushiku akakaana, akatila:
“Nshabe uwa kukukaka pa filonda;*Mu ng’anda yandi tamuli fya kulya ne fya kufwala.
Mwimbika pali bukateka bwa kuteka abantu.”
8 Pantu Yerusalemu naipununa,Na Yuda nawa,Pantu mu fyo balanda na mu fyo bacita balalwisha Yehova;Balacita ifya bucipondoka pa cinso cakwe ica bukata.*+
9 Ifyo bamoneka pa menso filabashinina,Kabili tabomfwa insoni ukulanda pa lubembu lwabo, nga filya abena Sodomu+ balecita;Tabalufisa.
We bulanda ku myeo yabo, pantu balailetela ubucushi!
10 Eba abalungama ukuti ifintu fikabawamina;Bakabalambula pa fyo bacita.*+
11 We bulanda ku mubifi!
Ubucushi bukamwishila,Pantu ifyo iminwe yakwe yacita, e fyo na o bakamucita!
12 Lelo abantu bandi bena, balabacusha kuli bakapitao babo,Kabili abanakashi e babateka.
Mwe bantu bandi, abamutungulula balalenga mule-endauka fye,Kabili balilenga mwafuma mu nshila+ iyo mufwile ukulaendamo.
13 Yehova aleipekanya pa kuti alubulwishe abantu;Naiminina pa kuti apingule inko.
14 Yehova akapingula abakalamba ne ntungulushi sha bantu bakwe.
“Namoca ibala lya myangashi,Kabili ifyo mwaibila abapiina fili mu mayanda+ yenu.
15 Cinshi mushonawila abantu bandiNo kushonawila ifinso fya bapiina mu mushili?”+ e fyalanda Shikulu Mulopwe Yehova wa mabumba.
16 Yehova atila: “Pa mulandu wa kuti abana banakashi aba mu Sione bacilumba,Benda ninshi nabemya imitwe yabo,*Balolesha kubembula kubembula, balameka pa kwenda,Kabili balalisha ifinkwingili* ku makasa yabo,
17 Yehova akalwalika imitwe ya bana banakashi aba mu Sione impele,Kabili Yehova akalenga imitwe yabo ikabe na mapala.+
18 Muli bulya bushiku, Yehova akafumyapo ifyo baiyemfeshako,Ifinkwingili, uto bafwala ku mutwe no tubekobeko+ utwaba nga filya umweshi uba nga wamoneka,
19 Amasikiyo, amakoosa ne fifimbo,
20 Ifitambala, utumaceni twakufwala mu nkolokoso, ifya kufwala pa cifuba,Ifya kubikamo amafuta yanunkila* ne mpinga,
21 Inindaminwe na masikiyo ya ku myona,
22 Imingila bafwala nga balesefya, ifya kufwala fya kunse, ifya kufwala fya kunse fimbi no tufyola,
23 Ifilola*+ fya kwikata ku minwe, ifya kufwala fya nsalu iisuma,*Ifya kupomba ku mutwe e lyo ne fifimbo.
24 Mu cifulo ca kulanunkila amafuta ya balsamu,+ bakalanunka piipi;Mu cifulo ca kukaka umushipi, bakakaka intambo;Mu cifulo ca kusakula umushishi bwino, bakaba na mapala;+Mu cifulo ca kufwala ica kufwala ica mutengo, bakafwala insamu;+Mu cifulo ca kulamoneka bwino, bakaba ne mikofu.
25 Abaume bobe bakafwa ku lupanga,Na baume bobe aba maka bakafwila mu nkondo.+
26 Impongolo shakwe isha musumba shikaloosha+ kabili shikaba no bulanda,Kabili akekala panshi ninshi naonaulwa.”+
Amafutunoti
^ Nelyo “Nshabe uwa kundapa ifilonda fyobe.”
^ Mu ciHebere, “mu menso ya bukata bwakwe.”
^ Mu ciHebere, “bakalya ifisabo fya milimo yabo.”
^ Mu ciHebere, “ninshi nabatongomona imikoshi yabo.”
^ E kutila, ifya kuiyemfeshako ifyo abanakashi balefwala mu nkolokoso.
^ Mu ciHebere, “Amayanda ya mweo.”
^ Nelyo “Mira.”
^ Nelyo “ifya kufwala fya mu kati.”
