Esaya 33:1-24
33 We bulanda kuli iwe we onaula, lelo uo bashaonaula;+Kuli iwe we upondoka, lelo uo bashapondokela!
Ilyo ukapwisha ukonaula, na iwe bakakonaula.+
Ilyo ukapwisha ukupondoka, na iwe bakakupondokela.
2 Mwe Yehova, beni ne cikuuku+ kuli ifwe.
Nimwe twacetekela.
Beni ukuboko*+ kwesu cila lucelo,Tupususheni mu nshita ya bucushi.+
3 Abantu balafulumuka ilyo baumfwa ifimfulunganya.
Nga mwaima, inko shilasalangana.+
4 Nga filya amapantankolo* yalongana pamo, e fyo bakalonganika ifyo bakamupokolola;Abantu bakangufyanya ukufisenda nga filya makanta angufyanya ukuya pa fimenwa.
5 Yehova akacindamikwa,Pantu ekala ku muulu.
Akesusha mu Sione umulinganya no bulungami.
6 E umucingilila mu nshita yenu;Ukupususha+ ukukalamba, amano, ukwishiba no kutiina Yehova,+E cuma cakwe.
7 Moneni! Abaume babo aba maka balelila mu musebo;Inkombe sha mutende shileloosha nga nshi.
8 Imisebo iikalamba nabailekelesha;Takuli nangu umo uulepita mu misebo.
Natoba* icipangano;Nasuula imisumba;Tacindika umuntu umwina kufwa.+
9 Icalo cileloosha* kabili nacuma.
Lebanone naikatwa insoni;+ nabola.
Sharone ali nge ciswebebe,Kabili Bashani na Karmele balelukusha amabula+ yabo.
10 “Nomba nalaima,” e fyo Yehova alanda,“Nomba nalaicindamika;+Nomba nalaikusha.
11 Mwimita icani icauma kabili mufyala impimbili.
Umupashi wenu ukamonaula ngo mulilo.+
12 Kabili abantu bakaba nge mpemba iyo baoca.
Bakaboca nga filya boca+ ifimpusa fya myunga ifyo batema.
13 Mwe baba ukutali umfweni ifyo ndi no kucita!
Kabili mwe baba apepi ishibeni amaka yandi.
14 Mu Sione ababembu bali no mwenso;+Abasangu baletutuma, baleti:
‘Nani pali ifwe uwingekala ukwaba umulilo+ uonaula?
Nani pali ifwe uwingekala no lubingu ulushingashima?’
15 Uutwalilila ukucita ifyalungama,+Uulanda ifyalungama,+Uukaana ifyuma fya mu bucenjeshi,Uo amaboko yakwe yakaana ukupoka+ amafisakanwa,Uucilika amatwi yakwe pa kuti e umfwa ifyo balelanda pa kusumya umulopa,Kabili uushibata pa kuti emona ifyabipa.
16 Akekala pa muulu;Icubo cakwe cikaba mu mabwe aya-afya ukufikako,Lyonse akalakwata ifya kulya,Kabili amenshi yakwe tayakapwe.”+
17 Amenso yobe yakamona imfumu ya bukata;Yakamona icalo icaba ukutali sana.
18 Mu mutima obe ukebukisha* ifya kutiinya, ukalanda auti:
“Ali kwi kalemba?
Ali kwi uwalepima umutuulo?+
Ali kwi uwalependa impungu?”
19 Tawakamone na kabili abantu aba musaalula,Abantu abalanda ululimi ulwa-afya ukumfwa,*Ababulubusa pa kulanda ica kuti te kuti umfwe+ ifyo balelanda.
20 Moneni Sione, umusumba umubela imitebeto+ yesu!
Amenso yobe yakamona Yerusalemu, incende ya kwikalamo iyaba tondolo,Itenti ilyo abantu bashakaseshe.+
Impoopo sha liko tabakashinukule,Kabili pa ntambo shaliko tabakaputulepo nangu imo.
21 Lelo kulya e ko Uwapulamo Yehova,Akaba kuli ifwe nge citungu umwaba imimana ne milonga iyapaabuka,Amato ya nkondo tayakapitemoNa mato ayakalamba tayakapitemo.
22 Pantu Yehova e Kapingula+ wesu,Yehova e upeela amafunde,+Yehova e Mfumu+ yesu;E ukatupususha.+
23 Intambo shobe shikakakuka;Tashakekate ico bakakako amatanga kabili tashakafungulule amatanga.
Pali ilya nshita ifintu ifingi ifyo bakapokolola bakafyakanya;Ica kuti nabalemana bakasenda ifintu ifingi.+
24 Kabili takuli uukekala mu calo uukalanda ati: “Nindwala.”+
Pantu abantu abakekalamo bakabelela imembu+ shabo.
Amafutunoti
^ Nelyo “amaka.”
^ Amapantankolo musango wa makanta uulya sana ifimenwa.
^ E kutila, umulwani.
^ Nelyo kuti yapilibula no kuti, “Icalo nacuma.”
^ Nelyo “ukatontonkanya pa.”
^ Mu ciHebere, “ululimi ulwashika.”
