Esaya 34:1-17
34 Iseni mupepi mwe nko, pa kuti mumfwe,Na imwe mwe bantu bonse, mubikeko amano ku fyo nalalanda.
Lekeni isonde na fyonse ifyabapo fikutike,Kumo no mushili na fyonse ifyabapo.
2 Pantu Yehova nafulilwa inko+ shonse,Kabili ubukali bwakwe buli pa bashilika+ bashiko bonse.
Akabalofya;Akabepaya.+
3 Abantu bashiko abakafwa tabakabashiike,Kabili ifitumbi fyabo fikalanunka;+Impili shikasunguluka pa mulandu wa mulopa+ wabo.*
4 Ifya mu muulu fyonse fikabola,Kabili imyulu bakaipomba nge buuku lyapombwa.
Ne fyabamo fyonse fikooma,Nga filya ibula lyuma ku cimuti ca mwangashi no kuponaKabili nga filya fine ikunyu libonsa no kupona ku cimuti ca mukunyu.
5 “Pantu mu muulu, ulupanga lwandi lukaba fye umulopa weka weka.+
Lukesa pali Edomu mu kumupingula,+Pa bantu abo napingula ukuti bafwile ukonaulwa.
6 Yehova alikwata ulupanga; lukaba fye umulopa weka weka.
Lukaba fye amafuta+ yeka yeka,Ku lupanga kukaba umulopa wa mpaanga ishana ishilume no wa mbushi,Kukaba amafuta ya ku mfyo aya mpaanga ishilume.
Pantu Yehova nakwata ilambo mu Bosera,Kukaba ukwipaya ukukalamba mu calo ca Edomu.+
7 Imboo shikaya pamo nabo,Ing’ombe ishana ishilume shikaya pamo na ba maka.
Mu calo cabo mukaba fye umulopa weka weka,Kabili umushili wa mu calo cabo ukaba fye amafuta yeka yeka.”
8 Pantu Yehova alisala ubushiku akalandula,+Umwaka akakanda abacitile Sione+ ifyabipa.
9 Imilonga yakwe* ikaba amanenekela,No lukungu lwakwe lukaba ilibwe lya mingu,Kabili icalo cakwe cikaba nga amanenekela ayalepya.
10 Takashime akasuba nelyo ubushiku;Icushi cakwe cikalafutumuka umuyayaya.
Akatwalilila ukuba icibolya mu nkulo shonse;Takwakabe nangu umo uukapita muli ena umuyayaya.+
11 Mukanga ne cinungi fikekala muli ena,Ifipululu fya matwi ayatali na ba mwankole fikekala muli ena.
Kabili Lesa akapima icalo ku ntambo ya kupiminakoNa ku ntambo ya kupiminako ukwaba ilibwe pa kulanga ukuti tamwakashale nangu cimo, kabili cikonaulwa.
12 Takuli shimucindikwa nangu umo muli ena uo bakabika pa bufumu,Kabili intungulushi shakwe shonse shikonaulwa.
13 Ifimpusa fya myunga fikamena pa mpungu shakwe ishakosa,Kaenya na ficilasa fikamena mu misumba yakwe iya malinga.
Muli ena e mo bamumbwe+ bakalaikala,Kabili akaba icifulo ca ba mwakatala.
14 Inama sha mu fiswebebe shikakumana pamo ne nama ishikuwa,Kabili imbushi ya mu mpanga* iketa iinankwe.
Mulya e mo akambasa kakekala kabili e mo kakasanga icifulo ca kutuushishamo.
15 Mulya e mo insoka iibutukisha ikalaikala no kubikila amani,Kabili ikatoota no kulonganika abana mu cintelelwe ca iko.
Kulya e ko bapungwa bakalongana, cila pungwa na pungwa munankwe.
16 Fwayeni mwi buuku lya kwa Yehova no kubelengamo ninshi namwikatisha ishiwi:
Takuli nangu imo iikabulilapo;Yonse ikakwata umunankwe,Pantu akanwa ka kwa Yehova e kafumya icipope,Kabili umupashi wakwe e ushilonganike pamo.
17 E ufipendwilileko,Kabili ku kuboko kwakwe napima ififulo bafipeela.*
Fikaba ififulo fya fiko umuyayaya.Mulya e mo fikekala mu nkulo shonse.
Amafutunoti
^ Nelyo “shikalakonkoloka umulopa.”
^ Uo balelandapo, musumba wa Bosera, umusumba uukalamba uwa mu Edomu.
^ Nelyo kuti yapilibula no kuti, “icibanda icapala imbushi.”
^ Mu ciHebere, “nafyakanya ififulo ukubomfya intambo ya kupiminako.”
