Esaya 36:1-22
36 Mu mwaka walenga 14 ukutula apo Imfumu Hisekia yatendekele ukuteka, e mo Sankeribu imfumu ya Asiria+ aishile mu kulwisha imisumba yonse iya malinga iya mu Yuda kabili ali-ipokele.+
2 Ilyo abena Asiria bali ku Lakishi,+ imfumu ya ku Asiria yatumine Rabsake*+ ne bumba lya bashilika ilikalamba ku Yerusalemu ku Mfumu Hisekia. Ilyo bafikile ku Yerusalemu, baileiminina mupepi no mufoolo uukalamba uwa cishiba+ ca pa muulu, icabela mu musebo wa mu mpanga+ ya uwasha insalu.
3 Lyena Eliakimu+ umwana wa kwa Hilkia, uwaleangalila aba mu ng’anda ya mfumu,* Shebna+ kalemba na Yoa umwana wa kwa Asafi uwalelembela imfumu ifyebo, balifumine baya kuli ena.
4 E ico Rabsake abebele ati: “Muye-eba Hisekia amuti: ‘Imfumu nkalamba, imfumu ya Asiria yatila: “Cinshi ucetekelemo?+
5 Iwe ulelanda auti, ‘Ninjishiba ifya kulwa kabili ninkwata na maka ya kulwa,’ lelo ayo malandakanwa fye. Nani ucetekele pa kuti umpondokele?+
6 Mona! Wacetekela ukuti Egupti itete ilyafunika akakwafwa. Egupti litete ilya kuti umuntu nga alikata pa kuti ashintilileko kuti lyakontoka lyatula no lupi lwakwe. E fyo Farao imfumu ya Egupti aaba kuli bonse abamucetekela.+
7 Kabili nga mwanjeba amuti, ‘Twacetekela Yehova Lesa wesu,’ bushe Hisekia taonaula+ ififulo fyakwe ifya kupepelapo ne fiipailo fyakwe, e lyo ninshi eba abaYuda na ba mu Yerusalemu ati, ‘Mulepepela pali ici ciipailo’?”’+
8 E ico nomba panganeni na shikulu imfumu ya Asiria+ icipangano ca kuti, nkakupeela bakabalwe 2,000 nga kuti wakwanisha ukukwata abantu bakuninapo.
9 Apo ucetekele Egupti ukuti e ukakupeela amaceleta na banina pali bakabalwe, bushe kuti wakumanisha ukucimfya nangu fye ni ntungulushi iyacepesha pa babomfi ba kwa shikulu?
10 Bushe njishile mu konaula cino calo ukwabula ukuti Yehova ansuminishe? Yehova umwine anjebele ati, ‘Kabiye kalwishe ici calo kabili uconaule.’”
11 E lyo Eliakimu, Shebna+ na Yoa baebele Rabsake+ abati: “Landeni na fwe babomfi benu mu ciAramaiki*+ pantu tulomfwa; mwilanda na ifwe mu lulimi lwa baYuda, pantu abantu abali pe linga+ kuti baumfwako.”
12 Lelo Rabsake abebele ati: “Bushe shikulu antumine ukwisaeba fye shikulwinwe na imwe aya mashiwi? Bushe tantumine ukwisaeba na baume abekala pa cibumba, abakalya amafi yabo no kunwa imisu yabo pamo na imwe?”
13 Lyena Rabsake aliminine e lyo abilikisha mu lulimi lwa baYuda,+ ati: “Umfweni amashiwi ya mfumu nkalamba, imfumu ya Asiria.+
14 Imfumu yatila, ‘Mwileka Hisekia amubepe, pantu te kuti amupusushe.+
15 Kabili mwileka Hisekia alenge mucetekele Yehova,+ nga amweba ati: “Nangu cibe shani Yehova aletupokolola. Kabili taleke imfumu ya Asiria icimfye uno musumba.”
16 Mwiumfwila Hisekia, pantu imfumu ya Asiria yatila: “Cimbeni pa kuti muleikala umutende, kabili cila muntu akulalya ku cimuti cakwe ica mwangashi na ku mukunyu wakwe, kabili akulanwa amenshi mu cishima cakwe,
17 mpaka nkesemutwala ku calo icaba nge calo+ cenu, icalo umwaba ingano no mwangashi uupya, umwaba umukate na mabala ya myangashi.
18 Mwileka Hisekia amubepe, ifi amweba ati, ‘Yehova akatupususha.’ Bushe kwaliba balesa ba nko abapusushapo ifyalo fyabo ku mfumu ya Asiria?+
19 Bushe balesa ba ku Hamati na ku Aripadi+ baba kwi? Inga balesa ba ku Sefarivaimu?+ Bushe balipuswishe Samaria mu kuboko+ kwandi?
20 Ni lesa nshi pali balesa bonse aba muli ifi fyalo uwapusushapo icalo cakwe kuli ine pa kuti Yehova apusushe Yerusalemu kuli ine?”’”+
21 Lelo baikele fye tondolo tabamwaswike nangu cimo, pantu imfumu yabebele aiti: “Mwimwasuka.”+
22 Nomba Eliakimu umwana wa kwa Hilkia, uwaleangalila aba mu ng’anda ya mfumu,* Shebna+ kalemba na Yoa umwana wa kwa Asafi, uwalelembela imfumu ifyebo, baile kuli Hisekia ninshi nabalepula ifya kufwala fyabo, kabili bamwebele fyonse ifyo Rabsake alandile.
Amafutunoti
^ Ifi e fyo baleita umukalamba wa balepeela imfumu ifya kunwa.
^ Nelyo “isano.”
^ Nelyo “mu lulimi lwa bena Siria.”
^ Nelyo “isano.”
