Esaya 37:1-38
37 Ilyo fye Imfumu Hisekia yaumfwile aya mashiwi, yalepwile ifya kufwala fya iko, yafwala ne nsamu, e lyo yayaingila mu ng’anda ya kwa Yehova.+
2 Lyena yatumine Eliakimu, uwaleangalila aba mu ng’anda ya mfumu,* Shebna kalemba na bashimapepo abakalamba kuli Esaya+ kasesema umwana wa kwa Amose, ninshi nabafwala insamu.
3 Bailemweba abati: “Hisekia atila, ‘Buno bushiku bwa bulanda, bwa kwebaulwa* kabili bwa kuseebana, pantu tuli ngo mwanakashi uuli mu kupaapa, nomba takwete amaka ya kupaapa.+
4 Nalimo Yehova Lesa obe kuti aumfwa amashiwi yonse aya kwa Rabsake, uo shikulu wakwe imfumu ya Asiria atumine ku kusaalula Lesa+ wa mweo, kabili akamukanda pa mashiwi ayo Yehova Lesa obe omfwile. E ico pepelako+ abashalapo abapuswike.’”+
5 E ico ababomfi ba Mfumu Hisekia baile kuli Esaya,+
6 kabili Esaya ailebeba ati: “Muye-eba shikulwinwe amuti, ‘Yehova atila: “Witiina+ pa mulandu wa fyo umfwile ifyo ababomfi ba mfumu ya ku Asiria+ bacilanda pa kunsaalula.
7 Mona, nalalenga itontonkanye pali fimo,* kabili ikomfwa ilyashi, lyena ikabwelela ku calo+ ca iko; kulya kwine+ e ko nkalenga bakayipaile ku lupanga.”’”
8 Ilyo Rabsake aumfwile ukuti imfumu ya Asiria yalifumine ku Lakishi, alibwelelemo ukwali imfumu kabili ailesanga ilelwa na Libna.+
9 Nomba imfumu yaumfwile balelanda pali Tirhaka imfumu ya ku Etiopia abati: “Naisa mu ku kulwisha.” Ilyo yaumfwile ifi, yatumine na kabili bamo kuli Hisekia,+ yabebele ati:
10 “Muye-eba Hisekia imfumu ya Yuda amuti, ‘Wileka Lesa obe uo wacetekela akubepe, ati: “Imfumu ya Asiria+ tayakacimfye Yerusalemu.”
11 Mona! Walyumfwa ifyo imfumu sha Asiria shaonawile+ ifyalo fyonse. Bushe iwe ni we ukapusuka?
12 Bushe tulesa twa nko isho ifikolwe fyandi fyaonawile twalishipuswishe?+ Bushe Gosani, Harani,+ Resefe na bena Edene abali mu Telasari baba kwi?
13 Bushe imfumu ya Hamati, iya Aripadi ne mfumu ya misumba ya Sefarivaimu,+ ne ya Hena ne ya Iba shaba kwi?’”
14 Hisekia apokele amakalata ku nkombe e lyo ayabelenga. Lyena aile ku ng’anda ya kwa Yehova kabili ailefungulwila aya makalata pa cinso ca kwa Yehova.+
15 Kabili Hisekia apepele kuli Yehova+ ati:
16 “Mwe Yehova wa mabumba,+ Lesa wa kwa Israele, mwe baikala pa cipuna ca bufumu pa muulu wa bakerubi,* imwe nimwe Lesa wa cine mweka mu mabufumu yonse aya pano isonde. Nimwe mwabumbile imyulu ne sonde.
17 Mwe Yehova kutikeni pa kuti mumfwe!+ Mwe Yehova isuleni amenso yenu pa kuti mumone!+ Umfweni amashiwi yonse ayo Sankeribu atumine pa kumuseebanya mwe Lesa+ wa mweo.
18 Mwe Yehova, kwena ca cine, imfumu sha Asiria shalyonaula ifyalo+ fyonse, ukubikako fye ne calo ca shiko.
19 Kabili shalyoca+ na tulesa twa shiko pantu tatwali tulesa twa cine, lelo abantu e batupangile+ ukubomfya ifimuti na mabwe. E co shatonawilile.
20 E ico nomba mwe Yehova Lesa wesu, tupususheni kuli ena, pa kuti amabufumu yonse aya pe sonde yeshibe ukuti imwe mwe Yehova+ ni mwe Lesa mweka.”
21 Lyena Esaya umwana wa kwa Amose atumiine Hisekia amashiwi ya kuti: “Yehova Lesa wa kwa Israele atila, ‘Ning’umfwa ipepo ilyo upepele pali Sankeribu imfumu ya Asiria,+
22 aya e mashiwi ayo Yehova alanda pali ena:
“Nacisungu wa mu Sione akusuula, akupumya.
Umwana mwanakashi wa mu Yerusalemu apukunya umutwe pali iwe.
23 Nani uo waseebanya+ no kupontela?
Nani uo wasanswila ishiwi+Kabili uo watulumwina amenso yobe aya cilumba?
Uwa Mushilo wa kwa Israele+ e o wacitila ifi!
24 Nauseebanya Yehova+ ukupitila mu babomfi bobe, kabili utile,‘Nkanina pa muulu wa mpili+Na maceleta yandi ayengi aya nkondo,Ku ncende sha mu Lebanone ishaba ukutali sana.
Nkatema ifimuti fya uko ifya mikedari iitali.
Nkengila umwakutushisha mwa uko umwaba ukwalepesha, mu mutengo uusuma.
25 Nkemba ifishima kabili nkanwa amenshi;Nkakamya imilonga* yonse iya mu Egupti ku makasa yandi,
26 Bushe tawaumfwa? Ukutula fye na ku kale e fyo mfwaya ukucita.
Ukufuma ku nshiku sha ku kale nalipanga.+
Nomba nalacicita.+
Ukalenga imisumba ya malinga ayakosa ikabe ifitantaala.+
27 Abekalamo tabakakwate aba kubafwa;Bakatiina nga nshi kabili bakaseebana.
Bakaba nge fimenwa fya mu mpanga kabili nge cani iciteku,Bakaba nge cani ca pa mutenge icapya ku mwela wakaba uwa ku kabanga.
28 Lelo nalishiba bwino bwino ifyo ucita nga waikala, ifyo ucita nga wafuma, ne fyo ucita nga wabwela,+Kabili nalishiba ifyo uba nga naumfulilwa,+
29 Pantu nalishiba ukuti ulamfulilwa+ kabili nalyumfwa+ ifyo ubuluma.
E ico nkakoba ica kulobelako+ candi ku myona yobe, kabili nkabika umukobelo wandi mu milomo yobe,Kabili nkalenga ukabwelele mu nshila iyo waishilemo.”
30 “‘Kabili ifi e fyo ukeshibilako:* Uno mwaka mukalalya ifikaimenena fye, kabili mu mwaka walenga bubili mukalalya ifikapuuka ku fikaimenena fye;* lelo mu mwaka walenga butatu, mukabyala imbuto kabili mukasombola, mukalima ne myangashi kabili mukalya ifisabo+ fya iko.
31 Aba mu ng’anda ya kwa Yuda, abakapusuka, abakashalapo+ bakalimba imishila kabili bakatwala ifisabo.
32 Pantu abakashalapo bakafuma mu Yerusalemu, kabili abakapusuka bakafuma mu Lupili lwa Sione.+ Yehova akacita ifi+ pantu alicincila.
33 “‘E ico Yehova alanda pa mfumu ya Asiria+ ati:
“Tayakengile muli uno musumba,+Tayakalasemo umufwi,Tayakesemo ne nkwela,Kabili tayakakuule ica kuninapo pa kusansa umusumba.”’+
34 ‘Mu nshila umo yapitile pa kwisa e mo ikapita na pa kubwelelamo;Tayakese muli uno musumba,’ e fyo Yehova alanda.
35 ‘Nkacingilila uno musumba+ kabili nkaupususha pa mulandu we shina lyandi+Na pa mulandu wa kwa Davidi+ umubomfi wandi.’”
36 Kabili malaika wa kwa Yehova aileipaya abaume 185,000 mu nkambi ya bena Asiria. Ilyo abantu babukile lucelocelo, bamwene ifitumbi+ fili fye mpanga yonse.
37 E ico Sankeribu imfumu ya Asiria alimine abwelelamo ku Ninebe,+ kabili kulya kwine+ e ko aileikala.
38 Nomba ilyo afukeme alepepa mu ng’anda* ya kwa Nisroke lesa wakwe, Adrameleke na Sharesere, abana bakwe balimwipeye ku lupanga,+ kabili bafulumukile ku calo ca Ararati.+ Lyena Esari-hadone+ umwana wakwe alimupyene pa bufumu.
Amafutunoti
^ Nelyo “isano.”
^ Nelyo “bwa kutukwa.”
^ Mu ciHebere, “nkabika umupashi muli yena.”
^ Nelyo kuti yapilibula no kuti, “pa kati ka bakerubi.”
^ Nelyo “imifoolo iyafuma mu mumana wa Naelo.”
^ Nelyo “ifikamena ku mbuto ishikapona.”
^ E kutila, Hisekia.
^ Nelyo “mwi tempele.”
