Esaya 38:1-22
38 Muli shilya nshiku Hisekia alilwele ica kuti ali fye mu kufwa.+ E ico kasesema Esaya+ umwana wa kwa Amose aile kuli ena e lyo amweba ati, “Yehova atila: ‘Eba aba mu ng’anda yobe ifya kucita, pantu tawakapole,+ uli no kufwa.’”
2 E ico Hisekia apilibukile ku cibumba, alapepa kuli Yehova ati:
3 “Napaapaata mwe Yehova, ibukisheni+ ifyo naba ne cishinka kuli imwe no mutima+ wandi onse kabili ndacita ifisuma mu menso yenu.” Lyena Hisekia alililile nga nshi.
4 Lyena Yehova aebele Esaya ati:
5 “Bwelelamo, kebe Hisekia+ auti: ‘Yehova Lesa wa kwa Davidi icikolwe cobe atila: “Ning’umfwa ipepo+ lyobe. Nimona ifilamba+ fyobe. Mona! Nalakulundilako imyaka 15.+
6 Nkakupokolola, nkapokolole na uno musumba ku mfumu ya Asiria, nkacingilila uno umusumba.+
7 Icishibilo ca kwa Yehova ica kukulanga ukuti Yehova ali no kucita ifyo alandile+ ni ci:
8 Mona, ndelenga icinshingwa ca pa matabo* ya kwa Ahasi cibwelele ku numa amatabo+ 10.”’” E ico alengele icinshingwa cabwelela ku numa amatabo 10.
9 Ifi e fyo Hisekia imfumu ya Yuda yalembele ilyo yalwele na lintu yapolele.
10 Nalandile nati: “Ilyo nshilakotaMfwile ukuya mu mpongolo sha Nshiishi.*
Bakampoka imyaka yandi iyashalako iya kuba no mweo.”
11 Nalandile nati: “Nshakamone Jah kabili nshakabe pa ba mweo+ abakalamona Jah.*
Nshakamone na kabili abantunseIlyo nkaba pamo na bekala mu cifulo umo fyonse filoba.
12 Icifulo candi ica kwikalamoCili nge tenti lya kwa kacema ilyo bafumya no kulisenda.+
Nimfuunga umweo wandi nga filya uupikula insalu afunga insalu iyo apwisha ukupikula;Alaputula umweo wandi nga filya baputula insalu ku ca kupikwilako.
Ukutula akasuba ukufika ubushiku atwalilila fye ukuntwala ku mpela.+
13 Ndatalalika umutima wandi mpaka ulucelo.
Nga filya inkalamo itobaula amafupa ya nama ikete, e fyo atobaula amafupa yandi yonse;Ukutula akasuba ukufika ubushiku atwalilile fye ukuntwala ku mpela.+
14 Ndalila+ nga filya utuni utunono tulila;Ndila nga filya inkunda+ ilila.
Amenso yandi yalosha ku muulu;+
‘Mwe Yehova, ndecula nga nshi;Ngafweni!’+
15 Inga finshi ningalanda?
Alinjeba kabili alicitapo cimo.
Nakulaenda bulanda bulanda imyaka yandi yonsePa mulandu wa kuti ndacula nga nshi.*
16 ‘Mwe Yehova, muli ifi fintu* e mo abantu bonse babela aba mweo,Kabili muli fyena e mwaba ubumi bwa mupashi wandi.
Mukamposha kabili mukansunga uwa mweo.+
17 Moneni! Mu cifulo ca kuba no mutende, nalecula nga nshi;Lelo apo mwalintemwa,*Tamwalekele naya mu cilindi ca bonaushi.+
Mwalipoosa imembu shandi shonse ku numa yenu.*+
18 Pantu Inshiishi* te kuti imucindike,+Imfwa te kuti imulumbanye.+
Abaya mu cilindi te kuti bamone ukuti muli ba cishinka+ mu fyo mucita.
19 Aba mweo fye e bengamulumbanya,Nga fino ndemulumbanya buno bushiku.
Wishi kuti asambilisha abana bakwe ukuti muli ba cishinka.+
20 Mwe Yehova mpususheni,Tukalisha inyimbo shandi pa filimba+ fya nsaleInshiku shonse isha mweo wesu pa ng’anda ya kwa Yehova.’”+
21 Lyena Esaya abebele ati: “Leteni keke ya makunyu ayauma, muibike pa cipute pa kuti apole.”+
22 Hisekia aipwishe ati: “Cinshi nalaishibilako ukuti nkaya ku ng’anda ya kwa Yehova?”+
Amafutunoti
^ Nalimo aya matabo baleyabomfya pa kupima inshita, nga bamona apo icinshingwa cibelele.
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ “Jah,” e fyo balemba ishina lya kuti Yehova mu kwipifya.
^ Nelyo “umweo wandi ulacula nga nshi.”
^ E kutila, ifyo Lesa alanda ne fyo acita.
^ Nelyo “mwalitemwa umweo wandi.”
^ Nelyo “Mwalifumishe imembu shandi shonse pa cinso cenu.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
