Esaya 39:1-8
-
Inkombe shafuma ku Babiloni (1-8)
39 Pali ilya nshita Merodakibaladani imfumu ya Babiloni, umwana wa kwa Baladani atumine abakutwalila Hisekia+ amakalata no bupe, pantu alyumfwile ukuti Hisekia alilwele kabili alipolele.+
2 Hisekia alibapokelele bwino* kabili alibalangile ing’anda+ umo asungiile icuma, e kutila silfere, golde, amafuta ya balsamu na mafuta yambi ayasuma. Alibalangile umo alesungila ifyanso fyakwe fyonse na fyonse ifyali mu fipao. Takwali nangu cimo ico Hisekia ashabalangile mu ng’anda yakwe* na mu bufumu bwakwe bonse.
3 Pa numa kasesema Esaya aishile ku Mfumu Hisekia, e lyo ayipusha ati: “Finshi aba baume balandile, kabili bafumine kwi?” E ico Hisekia amwaswike ati: “Bafumine ku calo ca kutali, ku Babiloni.”+
4 Na kabili ayipwishe ati: “Finshi bacimona mu ng’anda yobe?”* Hisekia amwaswike ati: “Bacimona fyonse ifyaba mu ng’anda yandi.* Takuli nangu cimo pa fyuma fyandi ico nshacibalanga.”
5 Nomba Esaya aebele Hisekia ati: “Umfwa ifyo Yehova wa mabumba alanda,
6 ‘Mona! Inshiku shileisa, kabili fyonse ifyaba mu ng’anda yobe* na fyonse ifyo ifikolwe fyobe fyalonganika ukufika na pali buno bushiku, bakafisenda ku Babiloni. Tabakashepo nangu cimo,’+ e fyo Yehova+ alanda.
7 ‘Kabili bamo pa bakatuntuka muli iwe, bakabasenda kabili bakayaba bacilolo mwi sano lya mfumu ya ku Babiloni.’”+
8 E lyo Hisekia aebele Esaya ati: “Ifi mwanjeba ifyo Yehova alandile fili fye bwino.” Alandile no kuti: “Pantu mu calo mukaba umutende no mutelelwe* ilyo ncili no mweo.”*+
Amafutunoti
^ Mu ciHebere, “alisekelele pa kubapokelela.”
^ Nelyo “isano lyakwe.”
^ Nelyo “mwi sano lyobe.”
^ Nelyo “mwi sano lyandi.”
^ Nelyo “mwi sano lyobe.”
^ Nelyo “icine.”
^ Mu ciHebere, “mu nshiku shandi.”
