Esaya 40:1-31
40 “Sansamusheni, sansamusheni abantu bandi,” e fyo Lesa+ wenu alanda.
2 “Koselesheni Yerusalemu ilyo mulelanda nankwe,Kabili mumwebe amuti inshita yakwe iya kubomba umulimo wa kumupatikisha naipwa,Mumwebe no kuti nabamwelela+ ulubembu lwakwe.
Yehova namupeela icilingene ne membu+ shakwe shonse.”*
3 Umuntu alebilikisha mu matololo, aleti:
“Wamyeni* inshila ya kwa Yehova!+
Olweleleni Lesa+ wesu umusebo uukalamba+ uwapita mu ciswebebe.
4 Imipokapoka yonse nabailundumanike,Kabili impili shonse no tupili nabafipase.
Ifyulu bafwile ukufipasa,Ne mpanga iyalundumana ibatame.+
5 Ubukata bwa kwa Yehova bukasokololwa,+Kabili iminofu yonse* ikabumwena pamo,+Pantu akanwa ka kwa Yehova nakalanda.”
6 Umfweni, kuli uulelanda ati: “Bilisha!”
E lyo umbi aipusha ati: “Finshi nalabilisha?”
Bilisha auti, “Abantu bonse* cani iciteku.
Ukutemwa kwabo ukushipwa konse kwaba nge luba ilyabalula mu mpanga.+
7 Icani iciteku cauma,Iluba ilyabalula lyabonsa,+Pantu umupu* wa kwa Yehova wapuupapo.+
Cine cine abantu cani iciteku.
8 Icani iciteku ciloma,Iluba ilyabalula lilabonsa,Lelo icebo ca kwa Lesa wesu, cikatwalilila ukubako.”+
9 Nina pa lupili ulutali,We mwanakashi uuleletela Sione+ imbila nsuma.
Sansula ishiwi lyobe na maka,We mwanakashi uuleletela Yerusalemu imbila nsuma.
Sansula ishiwi, Witiina.
Bilisha mu misumba ya mu Yuda auti: “Uyu e Lesa+ wenu.”
10 Moneni! Shikulu Mulopwe Yehova akesa na maka,Kabili ukuboko kwakwe kukalamutekelako.+
Moneni! Ali ne cilambu cakwe,Kabili amalipilo apeela abantu bakwe yaba pa ntanshi yakwe.+
11 Nga filya kacema acita, akasakamana bwino impaanga+ shakwe.
Utwana twa mpaanga akatulonganikila ku kuboko kwakwe,Kabili akatusendela pa cifuba cakwe.
Ishileonsha+ akashisakamana* bwino.
12 Nani uwapimapo amenshi mu lupi+ lwakweNo muulu ku cisansa* cakwe?
Nani uwapimapo ulukungu lwa pe sonde+Nelyo uwapimapo impili pa ca kupiminakoNo tupili pa masekelo?
13 Nani uwapimapo* umupashi wa kwa Yehova,Kabili nani uwingamweba ifya kucita kabili uwingaba impanda mano+ yakwe?
14 Nani aipwishe pa kuti aleiluka ifintu,Nelyo nani uumusambilisha inshila ya mulinganya,Nangu nani uumusambilisha pa kuti eshibe ifintu,Nelyo nani uumulanga inshila ya kwilukilamo+ bwino bwino ifintu?
15 Moneni! Inko shaba nge toni lya menshi ililetona ku mbeketi,Kabili ashimona+ ngo lukungu uluba pa masekelo.
Moneni! Emya ifishi ngo lukungu.
16 Nangu fye fimuti* fya mu Lebanone te kuti filenge umulilo watwalilila ukwaka,Kabili inama shabamo te kuti shikumane ukushituula umutuulo wa koca.
17 Amona inko shonse kwati no kuba tashabako;+Ashimona ukuti tashaba kantu.+
18 Ni kuli nani mwingalinganya Lesa?+
Cinshi mwingalanda ukuti e co apalana na co?+
19 Uwaishiba ifya kupangapanga, apanga icilubi,*Uufula ifyela abikako golde,+Kabili apanga na maceni ya silfere.
20 Asala icimuti ica kupangamo icilubi,+Icimuti icishakabole.
Afwaya uwaishibisha ukubasaPa kuti apangemo icilubi icishingawa.+
21 Bushe tamwaishiba?
Bushe tamwaumfwa?
Bushe tabamweba ukutula pa kutendeka?
Bushe tamwaishiba ukutula apo imifula ye sonde baipangile?+
22 Kwaliba uwaikala pa muulu wa calo+ icabulungana,Kabili abekalamo bamoneka nge fipaso.
Afungulula imyulu nge nsalu iya-anguka,Kabili aitanika nge tenti lya kwikalamo.+
23 Alafumya intungulushi pa fifulo fya shikoKabili alalenga bakapingula* ba pe sonde baba kwati tababa nako.
24 Tabalimbwa,Tababyalwa,Imishila yabo tayalimba mu mushili,Umwela wapupila pali bena kabili bauma,Kabili umwela wabasenda nga filya usenda impimbili.+
25 “Ni kuli nani mwingampashanya pa kuti ningane nankwe?” e fyo Uwa Mushilo alanda.
26 “Lolesheni mu muulu no kumona.
Nani uwabumbile ishi intanda?+
Ni uyo uutungulula ibumba lya shiko kabili uushipenda;Shonse alashita amashina ya shiko.+
Pa mulandu wa kuti alikwatisha amaka, kabili amaka+ yakwe ya kutiinya,Tapabulila nangu lumo.
27 Cinshi we Yakobo ulandila, kabili cinshi we Israele ulandila auti,‘Inshila yandi yalifisama kuli Yehova,Kabili Lesa+ tabika amano ku fyo bamfyenga’?
28 Bushe tawaishiba? Bushe tawaumfwa?
Yehova, Kabumba wa mpela she sonde, ni Lesa umuyayaya.+
Tanaka kabili tatompoka.+
Takuli nangu umo uwingeshiba+ bwino amano yakwe.
29 Alapeela uunakile amakaKabili alakosha sana abashikwete amaka.+
30 Abaice bakanaka kabili bakatompoka,Na balumendo bakaipununa no kuwa,
31 Lelo abacetekela Yehova bakaba na maka na kabili.
Bakapupuka kwati bali na mapindo nga bakapumpe.+
Bakabutuka lelo tabakatompoke;Bakenda lelo tabakanake.”+
Amafutunoti
^ Nelyo “napokelela imiku ibili ifilingene ne membu shakwe shonse.”
^ Nelyo “Pekanyeni.”
^ Nelyo “abantu bonse.”
^ Mu ciHebere, “Iminofu yonse.”
^ Nelyo “umupashi.”
^ Nelyo “akashicema.”
^ Mu nshita balelemba Baibo, ubutali bwa cisansa bwaleba ukufuma pa cikumo ukufika pa ka munwe akanono. Moneni Ifyebo Fyalundwako pa B14.
^ Nelyo kuti yapilibula no kuti, “uwaishiba.”
^ Nelyo “inkuni.”
^ Nelyo “apanga icimpashanya ca kwenga.”
^ Nelyo “bakateka.”