Esaya 47:1-15
47 Tentemuka wise wikale mu lukungu,We mwana mwanakashi nacisungu Babiloni.+
Ikala panshi apashili icipuna ca bufumu,+We mwana mwanakashi wa bena Kaldi,Pantu abantu tabakakwite na kabili ati namfumu.
2 Buula ilibwe lya kupelelapo, upele ubuunga.
Fuula icifimbo cobe.
Pimpula ilaya lyobe pa kuti amolu yobe yamoneke.
Abuka imimana.
3 Abantu bakamona ukuti uli ubwamba.
Bakamona ico ukabela ne nsoni.
Nkalandula+ kabili takuli umuntu nangu umo uukandesha.*
4 “Uuletulubula,Ishina lyakwe ni Yehova wa mabumba,Uwa Mushilo uwa kwa Israele.”+
5 Ikala palya tondolo, kabiye mu mfifi,We mwana mwanakashi wa bena Kaldi;+Abantu tabakakwite na kabili abati Namfumu wa Mabufumu.+
6 Nalifuliilwe abantu bandi.+
Nalengele ubupyani+ bwandi bwakowela,Kabili nabapeele mu kuboko+ kobe.
Lelo tawabomfwilile uluse.+
Na pa bakote walebikapo ikoli+ ilyafina.
7 Walelanda auti: “Nkatwalilila+ fye ukuba Namfumu.”
Tawabikileko amano kuli ifi fintu;Tawatontonkenyepo ifyo ifintu fikaba.
8 Nomba umfwa ifi we watemwa ukucita ifya kuisekesha,+We wikala umutelelwe, we ulanda mu mutima auti:
“Nine fye neka, takwaba na umbi.+
Nshakabepo mukamfwilwa.
Kabili nshakeshibe ifyo cumfwika ukufwilwa abana.”+
9 Lelo ifi fintu fibili fikesa pali iwe mu kupumikisha, mu bushiku fye bumo:+
Ukafwilwa abana kabili ukaba mukamfwilwa.
Fikesa pali iwe+ na maka sanaPa mulandu wa buloshi bobe, ne fya kupandapanda+ fyobe ifya maka.
10 Wacetekeele ifya bubifi ifyo ucita.
Walandile auti: “Takuli uumona.”
Amano yobe ne fyo waishiba e fyakulufishe,Kabili ulanda mu mutima obe auti: “Nine fye neka, takwaba na umbi.”
11 Lelo ubucushi bukesa pali iwe,Kabili ifyo wapanda tafyakabucilikile.*
Amafya yakesa pali iwe; kabili tawakayacilikile.
Ubonaushi ubo ushenekela+ bukesa pali iwe mu kupumikisha.
12 Twalilila ne fya kupandapanda fyobe, ne fya buloshi+ fyobe ifingi,Ifyo waculiile ukutula ku bwaice pa kufikwata.
Nalimo kuti fyakwafwa;Nalimo kuti wafibomfya ukutiinishako abantu.
13 Abakupanda amano abengi nabakunasha.
Nomba nabese bakupusushe,Abapepa imyulu,* abalolesha intanda,+Abasobela ifikakucitikilaNga balolesha umweshi ilyo wamoneka.
14 Mona! Bali nge mpimbili.
Umulilo ukaboca.
Te kuti baipusushe abene* ku maka ya lubingu lwa mulilo.
Aya te malasha ya konta,Kabili uyu te mulilo wa konta.
15 E fyo na baloshi banobe bakaba kuli iwe,Abo waculiile pamo nabo ukutula ku bwaice pa kuti upande ifya kupandapanda.
Bakalalulumba fye kabili bonse bakaya ukwapusanapusana.*
Takwakabe nangu umo uukakupususha.+
Amafutunoti
^ Nelyo kuti yapilibula no kuti, “kabili nshakabe ne cikuuku ku o nkakumanya.”
^ Nelyo “Tawakeshibe ifya kubomfya ifyo wapanda pa kubucilikila.”
^ Nelyo kuti yapilibula no kuti, “Abakanya imyulu; Ababukila ku ntanda.”
^ Nelyo “Te kuti bapusushe imyeo yabo.”
^ Mu ciHebere, “cila muntu akaya ku citungu cakwe.”
