Esaya 6:1-13
6 Mu mwaka Imfumu Usia yafwile,+ namwene Yehova naikala pa cipuna cakwe ica bufumu+ icasansuka, kabili ica kufwala afwele caiswile mwi tempele.
2 Baserafi balimushingulwike; cila serafi akwete amapindo 6. Yabili afimbile pa menso, na yambi yabili afimbile ku makasa, e lyo yambi yabili alepupukilako.
3 Kabili cila serafi ale-eba umunankwe ati:
“Wa mushilo, wa mushilo, wa mushilo Yehova wa mabumba.+
Pe sonde ponse paisula ubukata bwakwe.”
4 Kabili inceshi sha pa mwinshi shalisunkene pa mulandu ne fyo balebilikisha,* ne ng’anda yaiswilemo icushi.+
5 Lyena nalandile nati: “We bulanda kuli ine!
Ndi fye ngo wafwa,*Pantu ndi muntu uwakowela imilomo,Kabili njikala na bantu abakowela imilomo;+Pantu amenso yandi yamona Imfumu, Yehova wa mabumba!”
6 Lyena serafi umo apupukile apo nali, kabili mu minwe yakwe mwali ilasha+ lya mulilo ilyo afumishe pa ciipailo+ ukubomfya ifya kumanikilako.
7 Ankumishe pa kanwa e lyo anjeba ati:
“Mona! Ili ilasha lyakumya imilomo yobe.
Ifilubo fyobe fyapwa,Kabili waelelwa ulubembu lobe.”
8 Lyena naumfwile Yehova aleti: “Nani ndetuma, kabili nani alaba inkombe yesu?”+ E lyo nalandile nati: “E po ndi! Ntumeni!”+
9 E lyo anjebele ati: “Kabiye, kebe aba bantu auti:
‘Mukomfwa pa miku iingi,Lelo tamwakeluke;Mukamona pa miku iingi,Lelo tamwakeshibe.’+
10 Lenga imitima ya aba bantu ikunkume,+Lenga amatwi yabo yakome,+Kabili shibatika amenso yabo,Pa kuti yemona,Na matwi yabo yeumfwa,Na pa kuti imitima yabo iyilukaKabili bealuka no kupola.”
11 E lyo nalandile nati: “Kufika lilali, mwe Yehova?” Na o anjebele ati:
“Mpaka imisumba ikabongoloke ica kuti tamwakabe aba kwikalamo,Kabili mu mayanda tamwakabe abantu abakalaikalamo,Ne calo cikonaike kabili cikabe icibolya;+
12 Mpaka Yehova akatamfishe abantu ukutali,+Kabili icalo cikonaike sana.
13 Lelo mu calo mukashala abantu abanono,* kabili cikapya na kabili, nge cimuti icikalamba kabili nge cimuti icalulubala, ica kuti nga bacitema kwashala icishiki. Ulubuto* lwa mushilo e lukaba icishiki ca ciko.”
Amafutunoti
^ Mu ciHebere, “pa mulandu ne shiwi lya walebilikisha.”
^ Mu ciHebere, “Bantalalika.”
^ Nelyo “pa bantu 10 pakashala umo.”
^ Nelyo “Umwana.”
