Esaya 65:1-25
65 “Nindeka abashalemfwaya banjishiba;Nindeka abashalemfwaya+ bansanga.
Njebele uluko ulushalelilila kwi shina lyandi+ nati, ‘Ndi pano, ndi pano!’
2 “Nafungulwila amaboko yandi kuli bacintomfwa+ akasuba konse,Ku benda mu nshila iyabipa,+Abakonka fye ifyo batontonkanya;+
3 Abantu abashileka ukunkalifya pa cinso candi,+Abatuula amalambo mu mabala+ no kufutumwina icushi ce lambo pa njelwa,
4 Bekala mu manda,+Kabili balaala mu fifulo ifyafisama,*Balelya iminofu ya nkumba,+Kabili mu fipe+ fyabo muba umuto wa fyanunka.*
5 Balanda abati, ‘Ikala weka; wimpalama,Pantu ndi wa mushilo ukukucila.’*
Aba bantu cushi mu myona yandi, mulilo uulepya akasuba konse.
6 Mona! Fyalilembwa pa ntanshi yandi;Nshakekale fye ukwabula ukucitapo nangu cimo,Lelo nkabakanda,+Nkabakanda pali fyonse ifyo bacita*
7 Pa filubo fyabo na pa filubo fya bashibo,”+ e fyo Yehova alanda.
“Pa mulandu wa kuti balifutumwina icushi ce lambo pa mpili,Kabili banseebanishisha pa tupili,+Nkabalilapo ukubakanda pali fyonse ifyo bacita.”*
8 Yehova alanda ati:
“Nga filya fine mu cisansangu ca myangashi mwingaba umwangashi uupyaE lyo umuntu umo alanda ati, ‘Mwionaula icisansangu, pantu muli ifintu ifisuma,’*
Ifi fine e fyo nkacita pa mulandu wa babomfi bandi;Nshakabalofye bonse.+
9 Muli Yakobo nkabuulamo umwana*Na muli Yuda nkabuulamo uukapyana impili shandi;+Kabili abo nasala bakekala mu calo ca mpili,Na babomfi bandi e mo bakekala.+
10 Sharone+ ikaba impanga ya mulemfwe, e mo impaanga shikalalyaNa mu mupokapoka* wa Akore+ e mo ing’ombe shikalatuushisha,Ifi e fyo nkacitila abantu bandi abamfwaya.
11 Lelo mwaba pa bantu abasha Yehova,+Abalaba ulupili lwandi ulwa mushilo,+Abapekanishisha lesa we Shuko itebulo,Kabili abesusha umwangashi uukali mu makapu no ku-utuula kuli lesa uo bamona kwati alishiba ifikacitikila umuntu onse.
12 E ico nkalenga bakamwipaye ku lupanga,+Kabili imwe bonse mukakontama pa kuti bakamwipaye,+Pantu nalimwitile, lelo tamwayaswike,Nalilandile, lelo tamwaumfwile;+Mwatwalilile ukucita ifyabipa mu menso yandi,Kabili mwasalilepo ukucita ifyo napata.”+
13 E ico Shikulu Mulopwe Yehova alanda ati:
“Moneni! Ababomfi bandi bakalya, lelo imwe mukaba ne nsala.+
Moneni! Ababomfi bandi bakanwa,+ lelo imwe mukaba ne cilaka.
Moneni! Ababomfi bandi bakasekelela,+ lelo imwe mukekatwa insoni.+
14 Moneni! Ababomfi bandi bakaula utupundu pa mulandu wa kuti umutima ukasansamuka,Lelo imwe mukalila pa mulandu wa kuti umutima ukakalipaKabili mukaloosha pa mulandu wa kuti mukaba no bulanda nga nshi.
15 Mukasha ishina ilyo abo nasala bakalabomfya nge citiipu,Kabili Shikulu Mulopwe Yehova akepaya imwe bonse,Lelo ababomfi bakwe akabenika ishina limbi;+
16 Pa kuti onse uukalafwaya ukuti bamupaale mwi sonde,Lesa wa cine* akamupaala,Kabili onse uukalapa umulapo mwi sondeAkalapila muli Lesa wa cine.*+
Pantu amacushi* ya kale yakalabwa;Yakafiswa ku menso yandi.+
17 Pantu moneni! ndepanga imyulu iipya ne sonde+ ilipya;Kabili ifya kale mukafilaba,*Kabili tafyakese na mu mutima+ wenu.
18 E ico sansamukeni kabili mulesekelela umuyayaya pa mulandu ne fyo ndepanga.
Pantu moneni! ndelenga Yerusalemu abe ica kulalenga mulesekelelaKabili abantu ba mu Yerusalemu ndelenga babe ica kulalenga mulesansamuka.+
19 Kabili nkasekelela pa mulandu wa Yerusalemu, no kwanga pa mulandu wa bantu bandi;+Mu Yerusalemu tamwakomfwike na kabili ukuloosha pa mulandu no bucushi.”+
20 “Mulya tamwakabe na kabili akanya akakekala fye inshiku ishinono,Nangu umukote uukafwa ilyo inshiku shakwe tashilapwa.
Pantu onse uukafwa ninshi ali ne myaka 100 bakamumona fye ngo mulumendo,Kabili umubembu akatiipwa nangu ca kuti akaba ne myaka 100.*
21 Bakakuula amayanda no kwikalamo,+Kabili bakalima amabala ya myangashi no kulya ifisabo fya yako.+
22 Tabakakuule amayanda e lyo abantu bambi bakekalemo,Kabili tabakalimbe ifimuti fya myangashi e lyo abantu bambi bakalye ifisabo fya iko.
Pantu inshiku sha bantu bandi shikaba nge nshiku sha cimuti,+Kabili abantu bandi abo nasala bakasekelamo nga nshi mu mulimo wa minwe yabo.
23 Tabakaculile apa fye,*+Kabili tabakafyale abana abakaponenwa no bucushi,Pantu bena bana* abo Yehova+ apaala,Kabili abatuntuka muli bena bakaba pamo nabo.+
24 Na lintu bashilaita, nkasuka;Ilyo bacili balelanda, nkomfwa.
25 “Umumbulu na kana ka mpaanga fikaliila pamo,Inkalamo ikalya icani nge ng’ombe iilume,+Kabili insoka ikalalya ulukungu.
Tafyakacite ifyabipa kabili tafyakonaule nangu cimo mu lupili lwandi lonse ulwa mushilo,”+ e fyo Yehova alanda.
Amafutunoti
^ Nelyo kuti yapilibula no kuti, “mu nsakwe sha bamalonda.”
^ Nelyo “muba umuto uwa fyakowela.”
^ Nelyo kuti yapilibula no kuti, “Pantu nkakupeela bumushilo bwandi.”
^ Mu ciHebere, “Nkabalambwila pa fifuba fyabo.”
^ Mu ciHebere, “Nkabalilapo ukupima amalipilo yabo pa fifuba fyabo.”
^ Mu ciHebere, “muli ipaalo.”
^ Mu ciHebere, “ulubuto.”
^ Nelyo “impanga iyabatama.”
^ Nelyo “uwa cishinka.” Mu ciHebere, “Ameni.”
^ Nelyo “uwa cishinka.” Mu ciHebere, “Ameni.”
^ Nelyo “amafya.”
^ Nelyo “tamwakafibukishe.”
^ Nelyo kuti yapilibula no kuti, “Kabili onse uukafwa ninshi talafisha imyaka 100 bakamumona ukuti alitiipwa.”
^ Nelyo “Tabakabombeshe apa fye.”
^ Mu ciHebere, “ulubuto.”
