Esaya 66:1-24
66 Yehova alanda ati:
“Imyulu e cipuna candi ica bufumu, kabili isonde cipuna candi ico nyantapo amakasa.+
E ico ni ng’anda ya musango nshi mwingankuulila,+Kabili cifulo nshi ningatuushishamo?”+
2 “Ukuboko kwandi e kwapanga ifi fyonse,Kabili ifi e fyo ifintu fyonse fyaishilebako,” e fyo Yehova+ alanda.
“Lelo nkalolesha umuntu uwaicefya,Uwaba no bulanda kabili uututuma* nga aumfwa ishiwi+ lyandi.
3 Uuleipaya ing’ombe iilume ali ngo uleipaya umuntu.+
Uuletuula impaanga ali ngo ulefuna umukoshi wa mbwa.+
Uuletuula ubupe ali ngo uletuula umulopa wa nkumba!+
Uuletuula ububani bwabuuta+ ubwa cibukisho, ali ngo ulepaala uku ninshi alelanda amashiwi ya buloshi.*+
Balisalapo ukukonka inshila shabo abene,Kabili balitemwa* ukucita ifya bunani.
4 E ico nkasala inshila sha kubakandilamo,+Kabili nkabaletela ifyo batiina.
Pantu ilyo naitile takwali uwayaswike;Ilyo nalandile takwali uwaumfwile.+
Batwalilile ukucita ifyabipa mu menso yandi,Kabili basalilepo ukucita ifyo napata.”+
5 Umfweni ifyo Yehova alelanda, mwe batutuma* nga mwaumfwa ishiwi lyakwe:
“Bamunyinenwe abamupata, kabili abamukankamba pa mulandu we shina lyandi, balanda abati, ‘Yehova nacindikwe!’+
Lelo akamoneka kabili akalenga mukasekelele, kabili bena e bakaseebana.”+
6 Mu musumba muli icongo ca fimfulunganya, mwi tempele muli icongo!
Pantu Yehova alekanda abalwani bakwe pa fyo bacita.
7 Ilyo ashilaya mu kupaapa, alipaapile.+
Ilyo ubukali bwa pa kupaapa bushilamwikata, alipaapile umwana umwaume.
8 Nani uwaumfwapo ica musango yu?
Nani uwamonapo ifya musango yu?
Bushe icalo kuti cafyalwa mu bushiku bumo?
Nelyo bushe uluko lonse kuti lwafyalwa pa muku umo?
Lelo Sione ena ilyo aile fye mu kupaapa, alifyele abana abaume.
9 “Bushe kuti nalenga umwana aba mupepi no kufyalwa e lyo nalenga afilwa ukufuma?” e fyo Yehova alanda.
“Nelyo bushe kuti nalenga umwana afyalwa e lyo naisala ifumo?” e fyo Lesa wenu alanda.
10 Sekeleleni pamo na Yerusalemu kabili angileni pamo nankwe,+ imwe bonse mwe bamutemwa.+
Sansamukeni nga nshi pamo nankwe, mwe bamuloosha,
11 Pantu mukoonka ibele lyakwe ilya cisansamushi kabili mukekuta,Mukanwa sana kabili mukasekelamo mu bucindami bwakwe ubwingi.
12 Pantu Yehova alanda ati:
“Moneni ndemuletela umutende uwaba ngo mumana+No bucindami bwa nko ubwaba ngo mulonga uwaisula.+
Mukoonka ibele kabili bakamusendela pa lutungu,Kabili bakalamwangashisha pa makufi.
13 Nga filya nyina asansamusha umwana wakwe umwaume,E fyo nkatwalilila ukumusansamusha;+Kabili nkamusansamusha+ pa mulandu wa Yerusalemu.
14 Mukamona ifi ne mitima yenu ikasekelela,Amafupa yenu yakalelema nge cani iciteku.
Kabili ababomfi ba kwa Yehova bakamona ukuboko kwakwe,*Lelo akakalipila abalwani bakwe.”+
15 “Pantu Yehova akesa ngo mulilo,+Na maceleta yakwe yaba ngo mwela uukalamba,+Akesa mu kubakanda ninshi nakalipa,Akesa no lubingu lwa mulilo+ mu kubakalipila.
16 Pantu Yehova akesa no mulilo mu kubapingula,Akesa no lupanga mu kukanda iminofu yonse;*Kabili abo Yehova akepaya bakaba abengi.
17 “Abaleisangulula no kuiwamya pa kuti baye mu mabala*+ balekonka uuli pa kati, abalelya iminofu ya nkumba,+ bakoswe, ne fintu fimbi ifyakowela,+ bonse bakalobela pamo,” e fyo Yehova alanda.
18 “Apo nalishiba ifyo bacita ne fyo batontonkanya, ndeisa mu kulonganika aba mu nko shonse na balanda indimi ishalekanalekana, kabili baleisamona ubukata bwandi.”
19 “Nkabika icishibilo pali bena, kabili nkatuma bamo pa bakapusuka ku nko, nkabatuma ku bantu abaishiba bwino ukutinta ubuta ku Tarshishi,+ ku Puli, na Ludi.+ Nkabatuma na kubekala ku Tubali, ku Yabani,+ na ku bekala pa fishi ifyaba ukutali sana, nelyo abashamona ubukata bwandi; kabili bakabilisha ubukata bwandi mu nko.+
20 Bakaleta bamunyinenwe bonse ukufuma mu nko+ shonse pa kuti bakabe ubupe kuli Yehova. Bakabasendela pali bakabalwe, mu maceleta, mu maceleta ya mutenge, pa mfalashi na pa ngamila ishibutukisha. Bakabaleta ku lupili lwandi ulwa mushilo, Yerusalemu,” e fyo Yehova alanda, “nga filya fine abena Israele baleta ubupe ku ng’anda ya kwa Yehova mu fipe fya busaka.”
21 “Nkabuulapo bamo pa kuti bakabe bashimapepo, e lyo bambi bakabe abena Lebi,” e fyo Yehova alanda.
22 “Pantu nga filya fine imyulu ipya ne sonde lipya+ ifyo ndepanga fikatwalilila ukuba pa ntanshi yandi,” e fyo Yehova alanda, e fyo na bana* benu ne shina lyenu fikatwalilila ukubako.+
23 “Kabili lyonse umweshi nga wamoneka na cila Sabata,Iminofu yonse* ikalaisa mu kunkontamina,”*+ e fyo Yehova alanda.
24 “Kabili bakaya mu kumona ifitumbi fya bantu abamupondokeele;Pantu imititi ikaba pali fyena tayakafwe,Kabili umulilo uukalafyoca tawakashime,+Kabili ifitumbi fyabo fikaba ifya bunani ku bantu bonse.”*
Amafutunoti
^ Nelyo “uusakamikwa.”
^ Nelyo kuti yapilibula no kuti, “uku ninshi alelumbanya akalubi.”
^ Nelyo “imyeo yabo yalitemwa.”
^ Nelyo “mwe basakamikwa.”
^ Nelyo “amaka yakwe.”
^ Nelyo “abantu bonse.”
^ E kutila, amabala yaibela umo bapepela ifilubi.
^ Mu ciHebere, “ulubuto.”
^ Nelyo “Abantu bonse.”
^ Nelyo “mu kumpepa.”
^ Mu ciHebere, “ku minofu yonse.”
