Esekiele 12:1-28
12 Na kabili Yehova anjebele ati:
2 “We mwana wa muntu, wikala mu ng’anda ya bacipondoka. Balikwata amenso lelo tabamona, balikwata amatwi lelo tabomfwa,+ pantu bena ni ng’anda ya bacipondoka.+
3 Lelo iwe we mwana wa muntu, uipekanishishe ifipe fya kusenda kwati uleya muli bunkole. Lyena mu nshita ya kasuba ufwile ukuya muli bunkole ninshi balemonako. Ukafume mu calo cobe ukaye muli bunkole ku calo cimbi ninshi balemonako. Nalimo kuti batontonkanyapo, nangu ca kuti ni ng’anda ya bacipondoka.
4 Mu nshita ya kasuba, ufumye ifipe fyobe ifyo walonga kwati uleya muli bunkole, ninshi nabo balemonako. Lyena mu nshita ya cungulo ufwile ukuya kwati muntu uo basenda bunkole,+ ninshi nabo balemonako.
5 “Utule icipunda mu ng’anda yobe ninshi balemonako, e po ufifumishe.+
6 Ufisendele pa kubeya ninshi balemonako. Kabili ufifumye ninshi nakufiita. Uifimbe pa menso pa kuti wimona umushili, pantu ndelenga ube icishibilo ca ba mu ng’anda ya kwa Israele.”+
7 Nalicitile filya fine banjebele. Mu nshita ya kasuba nalifumishe ifipe fyandi, nge fipe fya kusenda muli bunkole, kabili mu nshita ya bushiku natulile icibumba ku minwe yandi. Kabili ilyo kwafiitile nalifumishe ifipe fyandi no kufisendela pa kubeya, ninshi balemonako.
8 Mu nshita ya lucelo na kabili Yehova anjebele ati:
9 “We mwana wa muntu, bushe aba mu ng’anda ya kwa Israele, ing’anda ya bacipondoka, tabakwipwishe abati, ‘Cinshi ulecita?’
10 Ubebe auti, ‘Shikulu Mulopwe Yehova aleti: “Aya amashiwi yakumine intungulushi+ sha mu Yerusalemu na bonse aba mu ng’anda ya kwa Israele abali mu musumba.”’
11 “Landa auti, ‘Ndi cishibilo cenu.+ Ifyo nacita, nabo e fyo bakabacita. Bakabasenda bunkole, bakabasenda.+
12 Intungulushi iili pali bena ikasendela ifipe fya iko pa kubeya kabili ikaya ninshi napafiita. Ikatula icibumba no kupushishapo ifipe fya iko.+ Ikaifimba pa menso pa kuti ikamona umushili.’
13 Nkapoosa isumbu lyandi pali iyi intungulushi, kabili ikekatwa muli ili isumbu.+ Lyena nkaitwala ku Babiloni, ku calo ca bena Kaldi, lelo tayakacimone; kabili kulya kwine e ko ikafwila.+
14 Kabili bonse abo yaba nabo, abayafwa na bashilika, nkabasalanganishisha mu ntunga shonse;+ kabili nkasomona ulupanga no kubapepeka.+
15 Kabili ilyo nkabasalanganishisha mu nko na mu fyalo, e lyo bakeshiba ukuti nine Yehova.
16 Lelo nkalenga abantu abanono fye e bo bakapusuke ku lupanga, ku cipowe na ku cikuko, pa kuti mu nko isho bakayamo, bakalelondolola ifya bunani fyonse ifyo balecita; kabili bakeshiba ukuti nine Yehova.”
17 Na kabili Yehova anjebele ati:
18 “We mwana wa muntu, ufwile ukulalya umukate ninshi uletutuma no kulanwa amenshi mwenso mwenso kabili ninshi nausakamikwa.+
19 Eba abantu ba mu calo auti, ‘Shikulu Mulopwe Yehova ale-eba abekala mu Yerusalemu, mu calo ca Israele aleti: “Bakalalya umukate wabo ninshi nabasakamikwa, kabili bakulanwa amenshi yabo mwenso mwenso pantu icalo cabo cikaba icibolya+ pa mulandu wa kuti bonse abekalamo balecita ulukakaala.+
20 Imisumba iyo abantu bekalamo ikonaulwa, kabili icalo cikashala icibolya;+ e lyo mukeshiba ukuti nine Yehova.”’”+
21 Yehova anjebele na kabili ati:
22 “We mwana wa muntu, inga iyi insoselo mwakwata mu Israele, iitila ‘Napapita inshiku ishingi, lelo ifyaba mu cimonwa tafyacitika’?+
23 E ico ubebe auti, ‘Shikulu Mulopwe Yehova aleti: “Nkalenga iyi insoselo ikapwe, kabili tabakatwalilile ukuilanda mu Israele.”’ Lelo ubebe auti, ‘Inshiku nashipalama,+ kabili fyonse ifyaba mu fimonwa fikacitika.’
24 Pantu mu ng’anda ya kwa Israele tamwakatwalilile ukuba ifimonwa fya bufi nelyo ukubuka kwa bucenjeshi.+
25 ‘“Pantu ine ne Yehova nkalanda, conse ico nkalanda cikacitika ukwabula ukushingashinga.+ Mu nshiku shenu+ mwe ba mu ng’anda ya bacipondoka nkalanda icebo kabili nkacita ifyo nkalanda,” e fyo Shikulu Mulopwe Yehova alanda.’”
26 Na kabili Yehova anjebele ati:
27 “We mwana wa muntu, aba mu Israele* baleti, ‘Ifyo alemona mu cimonwa fikacitika ku ntanshi, kabili ifyo alesesemenapo fikacitika ku ntanshi sana.’+
28 E ico ubebe auti, ‘Shikulu Mulopwe Yehova aleti: “‘Fyonse ifyo nanda tafyakashingashinge; fyonse ifyo nalanda fikacitika,’ e fyo Shikulu Mulopwe Yehova alanda.”’”
Amafutunoti
^ Mu ciHebere, “aba mu ng’anda ya kwa Israele.”
