Esekiele 13:1-23
13 Na kabili Yehova anjebele ati:
2 “We mwana wa muntu, sesema ifyabipa ifikacitikila bakasesema ba kwa Israele,+ kabili webe abasesema ifyebo*+ auti, ‘Umfweni icebo ca kwa Yehova.
3 Shikulu Mulopwe Yehova atila: “We bulanda kuli bakasesema abatumpa, abakonka ifya mu mitima yabo, e lyo ninshi tapali ico bamwene!+
4 We Israele, bakasesema bobe bali kwati ni bamumbwe abali mu fibolya.
5 Tamwakaye uko ifibumba fya mabwe fyatobeka pa kuti mukuulile aba mu ng’anda ya kwa Israele+ ifi fibumba cipya cipya, pa kuti Israele akapusuke inkondo mu bushiku bwa kwa Yehova.”+
6 “Bamona ifimonwa fya bufi kabili basobela ifya bufi, abatila, ‘Aya e mashiwi ya kwa Yehova,’ e lyo ninshi Yehova umwine tabatumine, kabili balolela ukuti ifyo basobela fifikilishiwe.+
7 Bushe te cimonwa ca bufi mwamona, kabili bushe te fya bufi musobela ilyo mutila, ‘Aya e mashiwi ya kwa Yehova,’ e lyo ninshi nshalanda nangu cimo?”
8 “‘E ico Shikulu Mulopwe Yehova atila: “‘Apo mulanda ifya bufi kabili ifimonwa fyenu fya bufi, ndemulwisha,’ e fyo Shikulu Mulopwe Yehova alanda.”+
9 Nkabomfya ukuboko kwandi ukwa maka pa kukanda bakasesema abamona ifimonwa fya bufi+ kabili abasobela ifya bufi. Pe bumba lya fibusa fyandi tabakabepo; kabili amashina yabo tayakabe mu fyalembwa fya bena Israele; tabakabwekele na ku calo ca Israele; kabili mukeshiba ukuti nine Shikulu Mulopwe Yehova.+
10 Icikalenga fyonse ifi ni co balilufya abantu bandi pantu babeba abati, “Kuli umutende!” e lyo ninshi takuli umutende.+ Ilyo bakuula icibumba icishakosa, bakupawilako impemba.’*+
11 “Eba abalekupawila impemba ku cibumba auti cikawa. Imfula iikalamba ikesa, imfula ya mabwe ikaloka* kabili icimwela icikalamba ica maka cikaciwisha.+
12 Kabili ilyo icibumba cikawa, bakamwipusha abati: ‘Inga impemba mwashingwilileko ili kwi?’+
13 “E ico Shikulu Mulopwe Yehova atila: ‘Nkalenga kukabe icimwela icikalamba ica maka pa mulandu wa bukali bwandi, kabili nkalenga kukabe imfula iikalamba ninshi nimfulwa nga nshi, nkalosha ne mfula ya mabwe iikaconaula ninshi ninkalipa nga nshi.
14 Nkabongolola icibumba ico mwakupawilako impemba kabili nkaciwisha panshi, no mufula wa ciko ukashala pa mbilibili. Ilyo umusumba ukawa, mukafwila mu musumba wine uyu; kabili mukeshiba ukuti nine Yehova.’
15 “‘Ilyo nkaleka ubukali bwandi bonse bukese pa cibumba na pa balekupawilako impemba nkamweba nati: “Icibumba naciwa kabili abalekupawilako impemba nabaloba.+
16 Bakasesema ba kwa Israele abalesesemena mu musumba wa Yerusalemu kabili abalemona ifimonwa fya mutende e lyo ninshi tamwali umutende,+ nabaloba.”’ E fyo Shikulu Mulopwe Yehova alanda.
17 “Nomba iwe we mwana wa muntu, losha icinso cobe pa bana banakashi ba bantu abasesema ifyabo abene, kabili useseme pa fyabipa ifikabacitikila.
18 Bebe auti, ‘Shikulu Mulopwe Yehova atila: “We bulanda ku banakashi abalebilila abantu insalu sha kufwala ku maboko* kabili abalepanga ififimbo fya ku mitwe iyapusanapusana ubukulu, pa kuti mulelunga* abantu kwati fyuni! Bushe mulelunga abantu bandi* kwati fyuni e lyo ninshi imwe mulefwaya mutwalilile ukuba abomi?*
19 Bushe mukampontela pa bantu bandi pa mulandu fye wa barle ya mu lupi na pa mulandu wa bufungau bwa mikate?+ Bushe mwipaya abantu abashifwile ukufwa* e lyo mwaleka abantu abafwile ukufwa* baba no mweo ilyo mubepa abantu bandi abakutika ifya bufi ifyo mubeba?”’+
20 “E ico Shikulu Mulopwe Yehova atila: ‘Moneni nalipata impimpi shenu mwe banakashi isho mubomfya pa kulunga abantu* bandi kwati mulelunga ifyuni. Nkashiputaula ku maboko yenu kabili nkaleka abantu abo mulelunga kwati fyuni bakaye.
21 Nkaputaula ififimbo fyenu, nkapokolola na bantu bandi mu minwe yenu kabili tamwakatwalilile ukubalunga kwati fyuni; lyena mukeshiba ukuti nine Yehova.+
22 Pantu mwalifuupula umutima wa walungama pa mulandu wa bufi bwenu+ e lyo ninshi ne mwine nshalenga aba no bulanda,* kabili mwalikosha amaboko ya mubifi+ pa kuti eleka ukucita ifyabipa, kabili engatwalilila ukuba no mweo.+
23 E ico imwe mwe banakashi tamwakatwalilile ukumona ifimonwa fya bufi, kabili tamwakatwalilile ukubuka;+ kabili nkapokolola abantu bandi mu minwe yenu. Lyena mukeshiba ukuti nine Yehova.’”
Amafutunoti
^ Nelyo “abasesema ifya mu mitima yabo.”
^ Bakuula icibumba ca mu kati icishakosa e lyo bakupawilako impemba pa kuti cilemoneka kwati calikosa.
^ Mu ciHebere, “we mfula ya mabwe ukaloka.”
^ E kutila, impimpi isho balefwala pa nkonkoni nelyo pa fisansa.
^ Nelyo “mulelunga imyeo ya bantu.”
^ Nelyo “mulelunga imyeo ya bantu bandi.”
^ Nelyo “mulefwaya ukutwalilila ukuba no mweo.”
^ Nelyo “imyeo iishifwile ukufwa.”
^ Nelyo “imyeo iifwile ukufwa.”
^ Nelyo “ifyo mubomfya pa kulunga imyeo ya bantu.”
^ Nelyo “nshamukalifya.”
