Esekiele 27:1-36
-
Ulwimbo lwa bulanda pa bwato bwa Turi ubulebunda (1-36)
27 Na kabili Yehova anjebele ati:
2 “Nomba iwe we mwana wa muntu, imbila Turi ulwimbo lwa bulanda,*+
3 webe Turi auti,‘We waikala apa kwingilila pali bemba,We shimakwebo wa bantu aba mu fishi ifingi,Shikulu Mulopwe Yehova atila:
“We Turi, we mwine utila, ‘Naliyemba icine cine.’+
4 Ififulo fyobe fyaba pa kati na nkati aka bemba,Kabili bakakuula bobe balilenga wayemba icine cine.
5 Imbao shobe shonse bashifumishe ku fimuti fya mikupri ya ku Seniri,+Kabili babuulile imikedari ya ku Lebanone no kukupangilako umulongoti.
6 Inkafi shobe bashipangiile ne fimuti ifyakosa nga nshi* ifya ku Bashani,Ica ku ntashi ya bwato cobe bacipangila ne cimuti ca mutashuri ico babika mu lino lya nsofu, ifya ku fishi fya Kitimu+
7 Insalu ishisuma isha ku Egupti e shali ku mulongoti obe,Kabili ica kucingilako akasuba cobe cali ica bushishi bwa bluu no bushishi bwa masako ya mpaanga ubwa kashikila, ifya ku fishi fya ku Elisha.+
8 Abaleikala mu Sidone na mu Aavadi+ e bali bacooba bobe.
Abaume bobe abaishibisha ukwensha amato e balekwensha+ we Turi.
9 Abaume ba ku Gebali+ abaishibe* sana ifya kucilika imilale e balecilika imilale yobe.+
Amato yonse aya pali bemba na bale-ensha aya mato balishile kuli iwe no kucita nobe amakwebo.
10 Abaume ba ku Persia, aba ku Ludimu na ba ku Puti+ bali mwi bumba lyobe ilya bashilika, e balekulwila inkondo.
Balekobeka inkwela shabo ne fisote fyabo muli iwe, kabili balengele wacindama.
11 Abaume ba ku Aavadi abali mwi bumba lyobe ilya bashilika, bali pa malinga yobe yonse,Kabili abaume abashipa e balebombela pa mpungu shobe.
Balekobeka inkwela shabo ku fibumba fyobe fyonseKabili balengele waba uwayemba icine cine.
12 “‘“Walecita amakwebo na ba ku Tarshishi+ pa mulandu wa kuti walikwete sana icuma.+ Wakabushenye nabo ifipe fyobe na silfere, ifyela, kapotwe no mutofwe.+
13 Aba ku Yabani, aba ku Tubali,+ na ba ku Mesheke+ walecita nabo amakwebo. Bena balekupeela abasha+ ne fipe fya mukuba, e lyo iwe walebapeela ifipe fyobe.
14 Aba mu ng’anda ya kwa Togarma+ bakupeele bakabalwe, bakabalwe ba nkondo ne mfalashi, e lyo iwe wabapeele ifipe fyobe.
15 Abena Dedani+ walecita nabo amakwebo; walingishe bashimakwebo aba mu fishi ifingi incito; balekutuula ameno ya nsofu+ ne fimuti ifya fiita ifya mutengo.
16 Edomu alecita nobe amakwebo pa mulandu wa kuti walepanga ifintu ifingi. Balekupeela amabwe ya Tokwasi, amasako ya mpaanga ayakashikila, ifya kufwala ifisuma ifyo bayemfya, insalu ishisuma, amakorali na mabwe ya rubi, e lyo iwe walebapeela ifipe fyobe.
17 “‘“Yuda na ba ku calo ca kwa Israele balecita nobe amakwebo. Balekupeela ingano sha ku Miniti,+ ifya kulya ifisuma, ubuci,+ amafuta na balsamu,+ e lyo iwe walebapeela ifipe fyobe.+
18 “‘“Damaseke+ alecita na iwe amakwebo pa mulandu wa kuti walepanga ifipe ifingi, na pa mulandu wa fyuma fyonse ifyo wakwete. Alekushitisha umwangashi wa ku Helboni na masako ya mpaanga aya ku Sahari.*
19 Abena Vedani na bena Yabani aba ku Usali bakupeele ifipe fya fyela, kasia* ne fimenwa ifya kacena akasuma,* e lyo iwe wabapeele ifipe fyobe.
20 Abena Dedani+ balekushitisha insalu sha kubika apa kwikala* pa nama sha kwendelapo.
21 Abena Arabia ne ntungulushi sha ku Kedari+ abaleshitisha utwana twa mpaanga, impaanga ishilume ne mbushi,+ e bo waingishe incito.
22 Bashimakwebo ba ku Sheba na ba ku Raama+ balecita nobe amakwebo; balekupeela ifyanunkila fyonse ifisuma nga nshi, amabwe ya mutengo sana na golde, e lyo iwe walebapeela ifipe fyobe.+
23 Abena Harani,+ abena Kane, abena Edene,+ bashimakwebo ba ku Sheba,+ ku Ashuri+ na ku Kilmadi balecita nobe amakwebo.
24 Pa cifulo cobe ica makwebo e po balekushitishisha ifya kufwala ifisuma, ifya kufwala fya mu mpepo ifya bluu, ne fya kufwala ifisuma ifyo bayemfya ne fya kwanshika panshi ifyabalabata. Fyonse ifi balefikakapo intambo.
25 “‘“Amato ya ku Tarshishi+ e yalekusendela ifipe fya makwebo,E ico waishilekwata ifyuma ifingi* pa kati na nkati ka bemba.
26 “‘“Bacooba bobe bakutwala muli babemba abashika;Umwela wa ku kabanga wakubunshisha pa kati na nkati ka bemba.
27 Ifyuma fyobe, ifipe fyobe, ifipe fyobe ifya makwebo, bacooba bobe na bakwensha,Abacilika imilale yobe, abashitisha ifipe fyobe ifya makwebo+ na baume bonse aba nkondo+—Bonse aba muli iwe*—Bonse bakabunda pa kati na nkati ka bemba pa bushiku ukawa.+
28 “‘“Ilyo abakwensha bakapunda, ifyalo fya mu lulamba lwa bemba fikatenta.
29 Bonse abooba amato ukubomfya inkafi, abensha amato na benda na matoBakafuma mu mato yabo no kwiminina ku mulundu.
30 Bakasansula amashiwi yabo kabili bakakuloosha nga nshi+Uku ninshi baleikuba ulukungu pa mitwe, balealangana na mu mito.
31 Bakabeya ulukuso kabili bakafwala insamu;Bakakuloosha nga nshi kabili bakapumapo imisowa.
32 Ilyo bakalakuloosha bakalaimba ulwimbo lwa bulanda kabili bakalalanda pali iwe abati:
‘Nani uwaba nga Turi? Nomba nabamonaula* mu kati na nkati ka bemba.+
33 Ilyo ifipe fyobe fyaishile ukufuma pali bemba, walengele abantu abengi baba ne nsansa.+
Ifyuma fyobe ifingi ne fipe fyobe ifya makwebo fyalengele imfumu sha pe sonde shaba ishikankaala.+
34 Nomba naubunda muli bemba, mu menshi ayashika,+Kabili naubundila kumo ne fipe fyobe fyonse ifya makwebo na bantu bobe.+
35 Bonse abekala pa fishi bakalakulolesha ninshi balepapa fye,+Kabili ishamfumu shabo shikatutuma pa mulandu wa mwenso+—ifinso fya shiko fikalanga ukuti shili no bulanda.
36 Bashimakwebo ba mu nko bakalalisha iminsooli pa fikakucitikila.
Impela yobe ikaba ya kupumikisha kabili ikabipa sana,Kabili ukaloba umuyayaya.’”’”+
Amafutunoti
^ Nelyo “ulwimbo lwa kuloosha.”
^ Mu ciHebere, “imioke.”
^ Mu ciHebere, “abaume abakalamba.”
^ Nelyo “na masako ya mpaanga ayakashikila.”
^ Nelyo “icimuti icapala icimuti ca kinamone.”
^ Itete ilyanunkila.
^ Nelyo “insalu shapikulwa.”
^ Nelyo kuti yapilibula no kuti, “waishileba uwacindama.”
^ Mu ciHebere, “icilonganino conse.”
^ Mu ciHebere, “nabalenga aba tondolo.”
