Esekiele 28:1-26
28 Na kabili Yehova anjebele ati:
2 “We mwana wa muntu, eba intungulushi ya ku Turi auti, ‘Shikulu Mulopwe Yehova atila:
“Apo umutima obe wa cilumba,+ kabili utila, ‘Nine lesa.
Naikala pa cipuna ca bufumu ica kwa lesa pa kati na nkati ka bemba.’+
Lelo uli muntunse fye, te iwe lesa,Nangu ca kuti mu mutima obe umfwa kwati niwe lesa.
3 Mona! Uli wa mano ukucila Daniele.+
Takuli ifya nkaama ifyo wingafilwa ukwilula.
4 Walikwata ifyuma ifingi pa mulandu wa kuti uli wa mano kabili uleluka,Kabili ulatutila golde na silfere umo usungila ifyuma fyobe.+
5 Waishilekwata ifyuma ifingi+ pa mulandu wa kuti walishiba sana amakwebo,Kabili waishileba ne cilumba mu mutima pa mulandu wa fyuma fyobe.”’
6 “‘E ico Shikulu Mulopwe Yehova atila:
“Apo mu mutima obe umfwa ukuti niwe lesa,
7 Ndelenga abena fyalo bakusanse, abantu abakalukisha pa nko shonse,+Kabili bakasomona ulupanga no konaula ifintu ifisuma ifyo wakwata pa mulandu na manoKabili bakakowesha ubucindami bobe ubukalamba.+
8 Bakakutentemushisha ku nindi,*Kabili ukafwa imfwa iyabipa mu kati na nkati ka bemba.+
9 Bushe na pali iyi nshita ukeba uukalakwipaya auti, ‘nine lesa?’
Mu minwe ya bakalakukowesha ukaba fye umuntunse, tawakabe lesa.”’
10 “‘Mu minwe ya bantu ba mu nko shimbi e mo ukafwila imfwa ya bantu abashasembululwa,Pantu ine ninanda, e fyo Shikulu Mulopwe Yehova alanda.”
11 Na kabili Yehova anjebele ati:
12 “We mwana wa muntu, imbila imfumu ya ku Turi ulwimbo lwa bulanda,* kabili uyebe auti, ‘Shikulu Mulopwe Yehova atila:
“Wali icilangililo ca kupwililika,Walikwatishe amano+ kabili wali uwayemba nga nshi.+
13 Wali mu Edeni, mwi bala lya kwa Lesa.
Waleiyemfya ukubomfya amabwe yonse aya mutengo nga nshi—Rubi, topasi na yaspi; krusoliti, shohamu na yade; safiri, tokwasi+ na emarodi;Kabili aya amabwe yonse yabikilwe mu fyapangilwe na golde.
Fyapekanishiwe pa bushiku wabumbilwe.
14 Nalikusubile kabili nakupeele umulimo wa kuba kerubi uucingilila.
Wali pa lupili lwa kwa Lesa+ ulwa mushilo, kabili wale-endauka pa mabwe ya mulilo.
15 Tamwali akalema nangu kamo mu fyo walecita ukufuma pa bushiku wabumbilweMpaka ilyo watendeke ukucita ifishalungama.+
16 Pa mulandu wa kuti walecita sana amakwebo,+Walicitile sana ulukakaala, kabili watendeke ukubembuka.+
E ico nkakufumya mu lupili lwa kwa Lesa ulwa mushilo kwati cintu icasuulwa kabili nkakonaula,+We kerubi uucingilila, nkakufumya pa mabwe ya mulilo.
17 Waishileba ne cilumba mu mutima obe pa mulandu wa kuti wali uwayemba.+
Waonawile amano yobe pa mulandu wa kuti wali uwacindama.+
Nkakupoosa pe sonde.+
Nkalenga ishamfumu shikalekutamba.
18 Pa mulandu wa kufula kwa filubo fyobe, na pa mulandu wa kuti ulacita ubucenjeshi mu makwebo yobe, ulasaalula ififulo fyobe ifya mushilo.
Nkalenga umulilo ukaake muli iwe, kabili ukakoca.+
Nkalenga ukashale imito pe sonde pa menso ya bonse abakalakutamba.
19 Abantu bonse aba mu nko abakwishiba, bakakulolekesha ninshi balepapa fye.+
Impela yobe ikesa mu kupumikisha kabili ikabipa nga nshi,Kabili ukaloba umuyayaya.”’”+
20 Na kabili Yehova anjebele ati:
21 “We mwana wa muntu, losha icinso cobe kuli Sidone,+ no kusesema ifyabipa ifikamucitikila.
22 Ufwile ukulanda auti, ‘Shikulu Mulopwe Yehova atila:
“Mona, nkakulwisha we Sidone, kabili nkaicindamika mu kati kobe;Na bantu bonse bakeshiba ukuti nine Yehova ilyo nkakupingula no kuicindamika ukupitila muli iwe.
23 Nkatuma icikuko muli ena kabili umulopa ukalakonkoloka mu misebo yakwe.
Ulupanga lukamusansa ukufuma mu ntunga shonse, kabili abo bakepaya bakalaala mu kati kakwe;Kabili bakeshiba ukuti nine Yehova.+
24 “‘“Lyena ing’anda ya kwa Israele tayakashingulukwe na ficilasa ifyabipa ne myunga iikali,+ e kuti bonse ababasaalula; kabili abantu bakeshiba ukuti nine Shikulu Mulopwe Yehova.”’
25 “‘Shikulu Mulopwe Yehova atila: “Ilyo nkalonganika aba mu ng’anda ya kwa Israele ukufuma mu nko umo basalanganina,+ nkalenga inko shikamone ukuti ndi wa mushilo.+ Kabili bakekala mu calo cabo+ ico napeele umubomfi wandi Yakobo.+
26 Bakekalamo umutende+ kabili bakakuula amayanda no kulima amabala ya myangashi,+ kabili bakekala umutende ilyo nkapingula bonse ababashinguluka ababasaalula;+ kabili bakeshiba ukuti nine Yehova Lesa wabo.”’”